Read Dikateny Iombonana Eto Madagasikara 2 Mpanjaka 20 Bible Online

2 Mpanjaka 20 - Dikateny Iombonana Eto Madagasikara bible

2 Mpanjaka 20

¹Tamin’izany andro izany dia narary efa ho faty i Hezekià. Tonga nitsidika azy i Isaià mpaminany zanakalahin’i Amôtsa ary nilaza taminy ny tenin’ny TOMPO hoe: — Ataovy ny farahafatrao amin’ny ankohonanao, satria efa ho faty ianao fa tsy ho velona.

²Dia nitodika tany amin’ny rindrina i Hezekià ka nivavaka tamin’ny TOMPO

³ary nanao hoe — TOMPO ô, tsarovy fa nitondra tena tamim-pahamarinana sy tamim-kitsimpo teo anatrehanao aho ary nanao izay tsara eo imasonao. Dia nitomany nanao ranomaso havozona i Hezekià.

⁴Fa raha mbola tsy tonga teo amin’ny kianja anatin’ny lapa[125] i Isaià, dia nisy tenin’ny TOMPO taminy nandidy azy

⁵hiverina ka hilaza amin’i Hezekià filohan’ny vahoakan’Andriamanitra hoe: — Izao no lazain’ny TOMPO Andriamanitr’i Davida razambenao: Reko ny vavakao ary hitako ny ranomasonao. Koa hositraniko ianao, ary raha afakampitso ihany dia hiakatra ao an-tranoko ianao.

⁶Hampiako 15 taona ny andro hiainanao; ary ny tenanao sy i Jerosalema dia hafahako amin’ny vahohon’ny mpanjakan’i Asiria. Eny, ity tanàna ity dia harovako noho ny amin’ny tenako sy i Davida mpanompoko.

⁷Ary nampaka ampempan’aviavy i Isaià mba hapetaka eo amin’ny vay ka hahasitrana ny mpanjaka.

⁸Dia hoy i Hezekià taminy: — Inona no famantarana fa hositranin’ny TOMPO aho ka afaka hiakatra any an-tranony raha afakampitso?

⁹Ka novaliany hoe: — Izao no famantarana omen’ny TOMPO anao mba hahalalanao fa hotanterahiny tokoa izay nolazainy: Hikisaka ambaratonga folo ny aloka eo amin’ny tohatr’i Ahaza[126]; koa handroso sa hihemotra no tianao hikisahany?

¹⁰Ary i Hezekià namaly hoe: — Mora amin’ny aloka ny handrosoany ambaratonga folo, fa aoka izy hihemotra ambaratonga folo.

¹¹Dia nivavaka tamin’ny TOMPO i Isaià mpaminany ka nahemony ambaratonga folo ny aloka teo amin’ny tohatr’i Ahaza[127].

¹²Tamin’izany fotoana izany i Merôdaky-Baladàna zanakalahin’i Baladàna sady mpanjakan’i Babilôna no nandre fa narary i Hezekià; koa dia nandefa masoivoho mba hitondra taratasy sy fanomezana ho azy izy[128].

¹³Faly i Hezekià tamin’ny fahatongavan’ireto iraka; dia nasehony azy avokoa ny trano fitahirizany zava-tsarobidy, dia volafotsy sy volamena ary zava-manitra sy menaka mamerovero; nasehony azy koa ny trano fitobian’ny fitaovam-piadiana rehetra mbamin’ny zavatra hafa isan-karazany tao amin’ny fitoeran-drakiny. Tsy nisy zavatra nafeniny azy na ny tao an-dapany na ny tao amin’ny fanjakany manontolo.

¹⁴Taorian’izany dia nankany amin’i Hezekià mpanjaka i Isaià mpaminany ka nanontany azy hoe: — Inona no nolazain’ireny olona nankatỳ aminao ireny? Ary mba avy taiza moa izy ireo? Dia novalian’i Hezekià hoe: — Avy any Babilôna lavitra any izy no nankatỳ amiko.

¹⁵Ka hoy indray i Isaià: — Inona avy anefa no hitany tato an-dapanao? Dia hoy ny navalin’i Hezekià: — Izay rehetra ato an-dapako dia hitany avokoa. Tsy nisy zavatra nafeniko azy ny tao amin’ny fitoeran-drakitro.

¹⁶Ary hoy i Isaià tamin’i Hezekià: — Henoy àry ny tenin’ny TOMPO:

¹⁷«Indro ho avy ny andro hitondrana any Babilôna izay rehetra ao an-dapanao sy izay rehetra nangonin’ny razanao ka voatahiry mandraka androany. Tsy hisy tavela eto na inona na inona, hoy Izaho TOMPO[129].

¹⁸Ary na dia ny sasany amin’ireo taranakao aza hoentina any koa ho mpanompo hanao raharaha ao an-dapan’ny mpanjakan’i Babilôna[130].»

¹⁹Dia hoy i Hezekià tamin’i Isaià: — Tsara ny tenin’ny TOMPO izay nambaranao ahy. Fa hoy izy manko anakampo hoe: «Raha velona koa ny aiko, dia hanjaka ny fiadanana sy ny fandriampahalemana.»

²⁰Ny sisa amin’ny tantaran’i Hezekià ary koa ny herimpo isan-karazany nasehony mbamin’ny nanaovany ny dobo sy ny lakan-drano hitarika rano hankao an-tanàna[131], dia voasoratra ao amin’ny boky milohateny hoe Asan’ireo mpanjakan’i Joda.

²¹Ary rehefa lasa nodimandry any amin’ny razany izy, dia i Manase zanany lahy no nanjaka nandimby azy.