Read Dikateny Iombonana Eto Madagasikara 1 Tantara 11 Bible Online

1 Tantara 11 - Dikateny Iombonana Eto Madagasikara bible

1 Tantara 11

¹Dia nivory teo amin’i Davida tao Hebrôna[89] i Israely manontolo ka nanao hoe: — Indreto izahay havanao sy tapakao.

²Fahiny, fony mbola nanjaka aza i Saoly, dia ianao ihany no mpitarika ny miaramilan’i Israely tamin’ny ady. Ary ny TOMPO Andriamanitrao efa nilaza taminao hoe: «Ianao no hitondra ilay Israely vahoakako, ary ianao no ho mpanapaka azy.»

³Tonga tao amin’ny mpanjaka tao Hebrôna avokoa ny loholon’i Israely. Ary tao Hebrôna dia nanaovan’i Davida fanekempihavanana teo anatrehan’ny TOMPO ry zareo, ka nanosotra azy ho mpanjakan’i Israely araka ny tenin’ny TOMPO nampilazainy an’i Samoela.

⁴Ary nandeha i Davida sy ny Israelita rehetra hanao fahirano an’i Jerosalema, izay natao hoe Jebosa satria ny Jebosita[90], mponina tao amin’io faritany io, no nitoetra tao.

⁵Dia hoy ireo mponina tao Jebosa tamin’i Davida: — Tsy ho tafiditra ato an-tanànanay ianao! Kanjo azon’i Davida ihany ny tanànamimanda, dia i Tsiôna izay hatao hoe «Tanànan’i Davida».

⁶Dia hoy i Davida: «Izay hamely voalohany ny Jebosita dia hatao filohan’ny tafika». Ary i Jôaba, zanakalahin’i Tseroià, no nanafika voalohany; koa izy no nanjary filohan’ny tafika.

⁷Ary nipetraka tao amin’ilay tanànamimanda i Davida, koa izany no niantsoana azy hoe «Tanànan’i Davida».

⁸Dia narafitr’i Davida ny tanàna manodidina, manomboka hatreo Milao[91] ka miafara amin’ny trano fonenany; fa i Jôaba kosa no nanamboatra ny sisa tamin’ny tanàna.

⁹Dia nihanatanjaka hatrany i Davida, satria ny TOMPOn’izao rehetra izao no niaraka taminy.

¹⁰Ireto no filohan’ireo kalazan’i Davida, dia ireo kalaza nifikitra taminy nandritra ny nanjakany, ka efa niaraka tamin’i Israely lafy valo mba hampanjaka azy teo amin’i Israely araka ny tenin’ny TOMPO.

¹¹Izao no lisitr’ireo kalazan’i Davida[92]: I Isbahala, zanakalahin’i Hakmônỳ sady filohan’ny «Tariky ny telo lahy». Izy no ilay nampandihy lefona hamelezana fahavalo telonjato lahy ka nahafaty azy tamin’ny ady indray mandeha monja.

¹²Manaraka azy dia i Elehazara, zanakalahin’i Dôday avy any Ahôa sady anisan’ny «Tariky ny telo lahy» kalaza.

¹³Niaraka tamin’i Davida izy tao Efesa-Damîna raha tafangona hiady tao ny Filistinina, ka vaky nandositra ny tafik’i Israely. Ary nisy tanimbary feno vary ôrza tao an-tsaha;

¹⁴koa nanotrika tao afovoan’ny tanimbary i Elehazara sy ny olony, ka sady nanavotra ny tanimbary no namely ny Filistinina. Dia nomen’ny TOMPO fandresena miezinezina i Israely[93].

¹⁵Indray andro, dia nisy telo lahy anisan’ny «andian’ny telopolo lahy» nidina ho eny amin’i Davida teo amin’ny harambato akaikin’ny zohin’i Hadolama, fa nisy tafiky ny Filistinina nitoby tao an-dohasahan’ny Refaîta[94].

¹⁶Ary i Davida efa tao amin’ny fiereny raha mby tao Betlehema ny andia-miaramilan’ny Filistinina.

¹⁷Tamin’izay, dia velom-paniriana tampoka i Davida ka nanao hoe: — Iza no hitondra rano hosotroiko avy amin’ilay fantsakana eo akaikin’ny vavahadin’i Betlehema?

¹⁸Dia namakivaky ny tobin’ny Filistinina izy telo lahy ireto ka nanovo rano tamin’ilay fantsakana teo akaikin’ny vavahadin’i Betlehema, ary nitondra izany ho any amin’i Davida; kanjo tsy nety nisotro i Davida fa nanolotra izany ho an’ny TOMPO kosa ho fanatitra araraka,

¹⁹sady hoy izy hoe: — Fady ahy eo anatrehan’Andriamanitra ny hisotro izany, fa midika ho misotro ny ran’ireo lehilahy nandeha nanao vy very ny ainy naka azy! Koa tsy nety nisotro i Davida. Izany no zava-bitan’ireo telo lahy maherifo ireo.

²⁰I Abisay, rahalahin’i Jôaba, no filohan’ny «andian’ny telopolo lahy». Izy no ilay nampandihy lefona hamelezana fahavalo telonjato lahy ka nahafaty azy, kanefa tsy tafiditra anarana tao anatin’ny «Tariky ny telo lahy».

²¹Nomen-kaja avo roa heny kosa i Abisay teo amin’ny «andian’ny telopolo lahy» ka lasa lehibeny; saingy tsy afaka nifaninana tamin’ny «Tariky ny telo lahy» izy.

²²I Benaià, avy any Kabitseela, dia zanakalahin’i Jôiadà sady zafikelin’ny miaramila anankiray maherifo. Nahavita asa goavana maro i Benaià: izy no nahafaty ireo Ariela roa lahy avy any Môaba; izy koa ilay nidina tanaty lavaka iray ka nahafaty liona tao tamin’ny indray andro nisy oram-panala.

²³Mbola izy koa no nahafaty ilay Ejiptianina izay roa metatra sy sasany ny halàvany sady nirongo lefona lehibe toy ny voditenon’ny mpanenona. Tehina no namelezany azy, dia nosarihany teny an-tanan’ilay Ejiptianina ny lefony ka iny ihany no namonoany azy ho faty.

²⁴Ireo no zava-bitan’i Benaià, zanakalahin’i Jôiadà; kanefa tsy tafiditra anarana tao anatin’ny «Tariky ny telo lahy» kalaza izy.

²⁵Nomen-kaja i Benaià tao amin’ny «andian’ny telopolo lahy», kanefa tsy afaka nifaninana tamin’ny «Tariky ny telo lahy». Izy no voatendrin’i Davida hifehy ny mpiambina azy.

²⁶Ireto kosa ny kalaza maherifo hafa: i Hasahela, rahalahin’i Jôaba; i Elehanàna, zanakalahin’i Dôday, avy any Betlehema;

²⁷i Samôta[95], avy any Harôra; i Heletsa, avy any Palôna;

²⁸i Hirà, zanakalahin’i Hikesy, avy any Tekôa; i Abihezera, avy any Hanatôta;

²⁹i Sibekay, avy any Hosà; i Hilay, avy any Ahôa;

³⁰i Maheray, avy ao Netôfà; i Heleda, zanakalahin’i Bahanà, avy any Netôfà;

³¹i Itahy, zanakalahin’i Ribay, avy any Gibehà-n’ireo taranak’i Benjamîna; i Benaià, avy any Pirehatôna;

³²i Horay, avy any amin’ny lohasahan-driakan’i Gahasa; i Abiela[96], avy any Harabà;

³³i Hazmavety, avy any Bahorîma; i Eliahabà, avy any Sahalbôna;

³⁴i Hasema, avy any Gizôna; i Jônatàna, zanakalahin’i Sagè, avy any Harara;

³⁵i Ahiama, zanakalahin’i Sakara, avy any Harara; i Elifala, zanakalahin’i Ora;

³⁶i Hefera, avy any Mekerà; i Ahià, avy any Palôna;

³⁷i Hetsirao, avy any Karmela; i Naharay, zanakalahin’i Ezbay;

³⁸i Jôela, rahalahin’i Natàna; i Mibihara, zanakalahin’i Hagrỳ[97];

³⁹i Tselèka, ilay Hamônita; i Naharay, avy any Beerôta, mpitondra ny fiadian’i Jôaba zanakalahin’i Tseroià;

⁴⁰i Hirà sy i Gareba, samy taranak’i Jetera;

⁴¹i Orià, ilay Hetita; i Zabada, zanakalahin’i Ahelay;

⁴²i Hadinà, zanakalahin’i Sizà, anankiray amin’ireo lohandohan’ny foko robenita, sady ombàn’ny namany 30 lahy koa;

⁴³i Hanàna, zanakalahin’i Mahekà; i Jôsafata, avy any Metèna;

⁴⁴i Hozià, avy any Hastarôta; i Samà sy i Jehoela, samy zanakalahin’i Hôtama, avy any Harôhera;

⁴⁵i Jedihaela, zanakalahin’i Simrỳ, sy i Jôhà rahalahiny, avy any Titsa;

⁴⁶i Eliela, avy any Mahavà; i Jerihay sy i Jôsavià, zanakalahin’i Elnahama; i Jitmà, avy any Môaba;

⁴⁷i Eliela sy Hôbeda ary i Jahasiela, avy any Tsôbà.