Read Dikateny Iombonana Eto Madagasikara 1 Tantara 13 Bible Online

1 Tantara 13 - Dikateny Iombonana Eto Madagasikara bible

1 Tantara 13

¹Niarahan’i Davida nihevi-draharaha ny komandin-tafika mifehy arivo na mifehy zato ary ny mpanapaka rehetra;

²ka taorian’izany, dia hoy i Davida tamin’ny Israelita rehetra tafangona teo: — Raha sitraky ny TOMPO Andriamanitsika, sady heverinareo fa tsara, dia andeha isika haniraka faingana ho any amin’ny mpiray firenena havantsika tavela manerana ny tanin’i Israely, indrindra amin’ny mpisorona sy ny levita any amin’ny tanànany sy ny kijanany avy, mba hitaona azy hikambana amintsika.

³Dia halaintsika ho atỳ amintsika indray ny Vatamasina mirakitra ny Fanekempihavanan’ilay Andriamanitsika, satria tsy nahoantsika izany tamin’ny andron’i Saoly.

⁴Dia niombon-kevitra ny olona rehetra tafangona teo fa hanao araka izany satria teo imason’ny vahoaka rehetra dia mitombina ny fikasana.

⁵Dia novorin’i Davida i Israely lafy valo, manomboka amin’ny sisin-tanin’i Ejipta ka hatrany Lebô-Hamàta, mba handeha haka ny Vatamasina, any Kiriata-Jeharima[104].

⁶Ary niakatra niaraka tamin’ny Israelita rehetra i Davida ho any Bahalà, na hoe Kiriata-Jeharima, izay any Joda, mba hampakatra ilay Vatamasina fa eo amin’io Vatamasina io no iantsoana ny anaran’ny TOMPO Izay mipetraka eo ambonin’ny kerôbima[105].

⁷Nalaina tao an-tranon’i Abinadaba ny Vatamasina, dia nataingina teo ambony sarety vaovao; ka i Hozà sy i Ahiao no mpandroaka ny sarety.

⁸Ary i Davida sy ny Israelita rehetra dia niravoravo araka izay tratry ny heriny manontolo teo anatrehan’Andriamanitra, ka nihira niaraka tamin’ny lokanga sy ny valiha mbamin’ny amponga sy ny kipantsona ary ny trompetra.

⁹Nony tonga teo akaikin’ny famoloan’i Kidôna[106] izy ireo, dia naninji-tanana hihazona ny Vatamasina i Hozà satria saika hazeran’ny omby io.

¹⁰Fa nirehi-pahatezerana tamin’i Hozà ny TOMPO ka namono nahafaty azy noho ny naninjirany tanana tamin’ny Vatamasina; dia teo anatrehan’Andriamanitra teo izy no maty.

¹¹Taitra i Davida satria tena namely mafy an’i Hozà ny TOMPO, koa io toerana io dia nantsoiny hoe «Peretsa-Hozà[107]», ary mbola izany no fiantso azy mandraka androany.

¹²Natahotra an’Andriamanitra i Davida tamin’izany andro izany ka nanao hoe: — Fomba ahoana no hitondrako ho atỳ amiko ny Vatamasin’Andriamanitra?

¹³Koa tsy nafindran’i Davida ho any aminy, any an-tanànan’i Davida, ny Vatamasina; fa naviliny kosa izany ho ao an-tranon’i Hôbeda-Edôma, lehilahy avy any Gata.

¹⁴Telo volana no nipetrahan’ny vatamasin’Andriamanitra niaraka tamin’ny ankohonan’i Hôbeda-Edôma, tanaty efitrano voatokana ho azy; ary dia notahîn’ny TOMPO ny ankohonan’i Hôbeda-Edôma sy izay rehetra fananany[108].