Read Dikateny Iombonana Eto Madagasikara 1 Tantara 15 Bible Online

1 Tantara 15 - Dikateny Iombonana Eto Madagasikara bible

1 Tantara 15

¹I Davida dia nanao trano ho an’ny tenany tao «an-tanànan’i Davida», sady nanomana toerana sy nanorina tranolay teo ho an’ny Vatamasina mirakitra ny fanekempihavanan’Andriamanitra.

²Tamin’izay i Davida dia nilaza hoe; — Aza misy mitondra ilay Vatamasina afa-tsy ny levita ihany, satria ireo no efa nofidin’ny TOMPO hitondra ny Vatamasiny sy hanao ny fanompoana momba izany[113] hatrany hatrany.

³Dia novorin’i Davida tao Jerosalema i Israely lafy valo mba hampakatra ny Vatamasin’ny TOMPO ho eo amin’ny toerana izay efa namboarina ho azy.

⁴Novorin’i Davida koa ny taranak’i Aharôna sy ny levita.

⁵Ireto avy ny levita: tamin’ny taranak’i Kehata dia i Oriela lehibeny mbamin’ny namany 120 lahy;

⁶tamin’ny taranak’i Merarỳ dia i Hasaià lehibeny mbamin’ny namany 220 lahy;

⁷tamin’ny taranak’i Gersôna dia i Jôela lehibeny mbamin’ny namany 130 lahy;

⁸tamin’ny taranak’i Elitsafàna dia i Semahià lehibeny mbamin’ny namany roanjato lahy;

⁹tamin’ny taranak’i Hebrôna dia i Eliela lehibeny mbamin’ny namany valopolo lahy;

¹⁰tamin’ny taranak’i Hoziela dia i Haminadaba lehibeny mbamin’ny namany 112 lahy.

¹¹Nantsoin’i Davida ny mpisorona, dia ry i Tsadôka sy i Abiatara, nantsoiny koa ny levita, dia ry i Oriela sy i Hasaià ary i Jôela mbamin-dry i Semahià sy i Eliela ary i Haminadaba,

¹²ka nilazany hoe: — Ianareo loham-pianakaviana levita, manaova ny fomba fidiovana ianareo sy ny namanareo, dia ampakaro ilay Vatamasin’ny TOMPO Andriamanitr’i Israely, ho eo amin’ny toerana izay efa namboariko ho azy.

¹³Fa tamin’ny nampiakarana azy voalohany, dia tsy teo ianareo; noho izany, dia nasian’ny TOMPO Andriamanitsika mafy izahay satria tsy nanontany Azy araka ny fitsipika[114].

¹⁴Dia nanao ny fomba fidiovana ny mpisorona sy ny levita mba hampakatra ny Vatamasin’ny TOMPO Andriamanitr’i Israely.

¹⁵Ary nolanjain’ny levita teny an-tsorony tamin’ny hazo[115] ny Vatamasina, araka izay didin’i Mosesy mifandraika amin’ny tenin’ny TOMPO.

¹⁶Ireo lehiben’ny levita kosa nasain’i Davida hanendry ny namany izay tokony hihira miaraka amin’ny zava-maneno, dia ny valiha sy ny lokanga ary ny kipantsona, ka hampanakoako ny feon-kira ho mariky ny firavoravoana.

¹⁷Dia notendren’ny levita i Hemàna zanakalahin’i Jôela, sy i Asafa zanakalahin’i Berekià sady naman’i Hemàna, ary i Etàna zanakalahin’i Kosaià avy amin’ny fokon’i Merarỳ sady naman-dry i Hemàna sy i Asafa.

¹⁸Miaraka amin’izy telo lahy, amin’ny laharana faharoa, ireto mpiandry vavahady namany ireto: dia i Zakarià zanakalahin’i..., i Jahaziela sy i Semiramôta, i Jehiela sy i Honỳ, i Eliaba sy i Benaià, i Mahaseià sy i Matitià, i Elifalà sy i Mikneià, i Hôbeda-Edôma sy i Jehiela ary i Hazazià[116].

¹⁹I Hemàna sy i Asafa ary i Etàna mpiventy hira dia nively ny kipantsona varahina;

²⁰i Zakarià sy i Jahaziela, i Semiramôta sy i Jehiela, i Honỳ sy i Eliaba ary i Mahaseià sy i Benaià no nitendry tamin’ny valiha ireo gadom-peo ambony;

²¹i Matitià sy i Elifalà, i Mikneià sy i Hôbeda-Edôma ary i Jehiela sy i Hazazià kosa no nitendry tamin’ny lokanga ireo gadom-peo ambany[117] mba hanaingàn-kira.

²²I Kenanià, lehiben’ny levita nisahana ny fitondrana ny Vatamasina, no nampianatra momba ny fitondrana[118] azy satria nanavanana azy izany.

²³I Berekià sy i Elkanà mpiandry vavahady no teo anilan’ny Vatamasina;

²⁴toraka izany koa i Hôbeda-Edôma sy i Jehià mpiandry vavahady. Ary ireto mpisorona ireto kosa, dia i Sebanià sy i Jôsafata, i Natanaela sy i Hamasay mbamin’i Zakarià sy i Benaià ary i Elihezera, no nitsoka trompetra teo alohan’ny Vatamasin’Andriamanitra.

²⁵Feno fifaliana i Davida sy ny loholon’i Israely mbamin’ny komandin-tafika mifehy arivo no nandeha hampakatra ny Vatamasina mirakitra ny fanekempihavanan’ny TOMPO, avy ao an-tranon’i Hôbeda-Edôma.

²⁶Ary mba hanampian’Andriamanitra ny levita izay nitondra ny Vatamasina mirakitra ny fanekempihavanan’ny TOMPO, dia notolorana sorona ombilahy fito sy ondrilahy fito Izy.

²⁷Akanjo rongony fotsy madinika no nanaovan’i Davida; niakanjo toy izany koa ny levita rehetra izay nitondra ny Vatamasina, sy ny mpiventy hira mbamin’i Kenanià lehiben’ny fitondrana ny Vatamasina[119]. Ary ankoatra izany i Davida dia nisalotra ny lambahoany rongony fanaon’ny mpisorona.

²⁸I Israely lafy valo no nampakatra ny Vatamasina mirakitra ny fanekempihavanan’ny TOMPO ho any Jerosalema; ka tamin’ny horakora-pifaliana, ombàn’ny feon’anjombona aman-trompetra sy kipantsona miaraka amin’ny tendry valiha sy lokanga, no nampakarany azy.

²⁹Fa rehefa tonga tao an-tanànan’i Davida ny Vatamasina mirakitra ny fanekempihavanan’ny TOMPO, dia nitsirika teo am-baravarankely i Mikala, zanakavavin’i Saoly; ka nony nahita an’i Davida mpanjaka nitotorebika nandihy izy, dia naneso azy anakampony.