Read Dikateny Iombonana Eto Madagasikara 1 Tantara 16 Bible Online

1 Tantara 16 - Dikateny Iombonana Eto Madagasikara bible

1 Tantara 16

¹Dia nentina ny Vatamasina ka napetraka tao afovoan’ny tranolay izay efa namboarin’i Davida ho azy. Avy eo dia nisy sorona dorana manontolo sy sorom-pihavanana natolotra teo anatrehan’Andriamanitra.

²Ary rehefa nahavita ireo sorona ireo i Davida, dia nitsodrano ny vahoaka tamin’ny anaran’ny TOMPO.

³Nasainy nizaràna sakafo ny Israelita rehetra teo, ka na lehilahy na vehivavy dia samy nahazo mofo boribory iray sy didin-kena voatono iray ary ampempam-boaloboka iray avy[120].

⁴Nisy levita sasany notendren’i Davida ho amin’ny fanompoana teo anoloan’ny Vatamasin’ny TOMPO mba hampahatsiaro sy hidera ary hanome voninahitra ny TOMPO Andriamanitr’i Israely.

⁵I Asafa no filohany, ary i Zakarià no lefitra. I Jahaziela[121] sy i Semiramôta, i Jehiela sy i Matitià, i Eliaba sy i Benaià ary i Hôbeda-Edôma sy i Jehiela no nitendry ny valiha sy ny lokanga; fa i Asafa no nively ny kipantsona.

⁶I Benaià sy i Elihezera[122] mpisorona kosa no mpitsoka ny trompetra mandrakariva eo anoloan’ny Vatamasina mirakitra ny fanekempihavanan’Andriamanitra.

⁷Koa tamin’io andro io no voalohany nanendren’i Davida an’i Asafa sy ny namany hidera ny TOMPO.

⁸Miderà ny TOMPO ianareo: ataovy antso avo ny lazany, ampahafantaro ny firenen-kafa ny asany lehibe[123]!

⁹Mihirà ho Azy ary mankalazà Azy amin-java-maneno; tantarao ny asa mahagaga rehetra nataony.

¹⁰Ireharehao ny anarany masina; aoka hifaly ny fon’ireo mitady ny TOMPO.

¹¹Katsaho ny TOMPO mahery; tadiavo lalandava ny fanatrehany.

¹²Ry taranak’i Israely[124] mpanompony sady terak’i Jakôba voafidiny, tsarovy ny asa mahagaga nataony, dia ny zava-mahatalanjona vitany sy ny didim-pitsarana navoakany.

¹⁴Izy no TOMPO Andriamanitsika; manerana ny tany tontolo ny fanapahany.

¹⁵Tsarovy hatrany ny fanekempihavanany, dia ny fampanantenana izay napetrany ho an’ny taranaka arivo mifandimby:

¹⁶Fanekempihavanana nataony tamin’i Abrahama sy fianianana nataony tamin’i Itsehàka.

¹⁷Naoriny ho zo raikitra ho an’i Jakôba izany ho fanekempihavanana mandrakizay ho an’ny taranak’i Israely,

¹⁸fony Andriamanitra nilaza hoe: «Homeko ho anao ny tany Kanahàna ho anjara lova ho anao sy ny taranakao[125]».

¹⁹Tamin’izay ianareo mbola mora isaina, mpifindra monina vitsy kely teo amin’ny tany;

²⁰nivezivezy nitety firenena ianareo ka niala tamin’ny fanjakana iray hankany amin’ny vahoaka hafa.

²¹Kanefa tsy nisy navelan’Andriamanitra hampahory anareo fa nampitandrina ny mpanjaka Izy noho ny aminareo hoe:

²²«Aza kasihina ireo voahosotro, ary aza asian-dratsy ireo mpitondra hafatro[126]!»

²³Mihirà ho an’ny TOMPO, ry mponin’ny tany tontolo, torio isan’andro isan’andro ny namonjeny antsika[127].

²⁴Ambarao amin’ireo firenena ny voninahiny, lazao amin’ny vahoaka rehetra ny zava-mahagaga nataony.

²⁵Fa lehibe ny TOMPO ka mendrika hoderaina fatratra sady mahatahotra mihoatra noho ny andriamanitra rehetra.

²⁶Tsinontsinona avokoa ireo andriamanitry ny firenen-kafa, fa ny TOMPO kosa no nanao ny lanitra.

²⁷Fahalehibeazana sy famirapiratana no manodidina Azy, ary hery sy fifaliana no mameno ny fonenany.

²⁸Ianareo fianakaviamben’ny firenen-drehetra, tolory haja ny TOMPO fa be voninahitra sy hery.

²⁹Tolory haja ny TOMPO satria be voninahitra Izy. Mitondrà fanatitra ka mankanesa eo anatrehany; dia miankohofa eo anatrehan’ny TOMPO, rehefa miseho ny fahamasinany.

³⁰Mangovita eo anoloany, ry mponin’ny tany tontolo, fa izao rehetra izao voaorina mafy ka tsy hihontsona.

³¹Aoka hifaly ny lanitra, ary hiravoravo ny tany! Lazao amin’ny olona hoe: «Ny TOMPO no mpanjaka!»

³²Aoka hirohondrohona ny ranomasina mbamin’izay ao anatiny! Aoka hibita-kafaliana ny saha mbamin’izay rehetra ao aminy!

³³Aoka ny hazo any an’ala hihoby mba hitsena ny TOMPO, satria tamy Izy. Eny, tamy Izy mba hifehy ny tany.

³⁴Miderà ny TOMPO ianareo fa tsara Izy: Eny, maharitra mandrakizay ny fitiavany[128].

³⁵Lazao hoe: «Vonjeo izahay, ry Andriamanitra mpamonjy anay ô! Afaho avy any amin’ny hafa firenena izahay ka angony mba hideranay ny anaranao masina, sy hireharehanay amin’ny fankalazana Anao[129]!»

³⁶Hisaorana anie ny TOMPO Andriamanitr’i Israely hatrizay hatrizay ka ho mandrakizay. Ary ny vahoaka rehetra niredona hoe: «Amen!» sy hoe: «Ankalazao ny TOMPO!»

³⁷Dia teo anoloan’ny Vatamasina mirakitra ny fanekempihavanan’ny TOMPO teo i Davida no nanankina adidy tamin-dry i Asafa sy ny namany mba hanao fanompoam-pivavahana tsy an-kiato eo, araka ny raharaha tokony hatao isan’andro;

³⁸nanankinany adidy koa ry i Hôbeda-Edôma sy ny namany 68 lahy, sy ilay Hôbeda-Edôma zanakalahin’i Jeditòna, ary i Hôsà mba ho mpiandry vavahady.

³⁹Ny adidy nankinin’i Davida tamin’i Tsadôka mpisorona sy ny mpisorona namany kosa dia ny raharaha teo anoloan’ny Tranolain’ny TOMPO izay tao amin’ny toeram-panasinana any Gibehôna[130].

⁴⁰Izy ireo no hanatitra sorona dorana manontolo ho an’ny TOMPO tsy an-kiato marain-tsy hariva ary eo amin’ny alitara fisoronana sy hanao izay fandraharahana rehetra voasoratra ao amin’ny lalàna nandidian’ny TOMPO an’i Israely,

⁴¹Niaraka tamin’ny mpisorona ry i Hemàna sy i Jedotòna ary ireo sisa voafidy sy voatondro anarana mba hidera ny TOMPO noho ny fitiavany maharitra mandrakizay.

⁴²Niaraka tamin’i Hemàna sy i Jedotòna, dia nisy trompetra sy kipantsona natao hampanenoina ary zava-maneno hafa natao hanarahana ny hira ho an’Andriamanitra; ary ny zanakalahin’i Jedotòna no mpiandry vavahady.

⁴³Farany, dia samy nody tany an-tranony avy ny olona rehetra; ary i Davida koa lasa nody mba hiarahaba ny ankohonany[131].