Read Dikateny Iombonana Eto Madagasikara 1 Tantara 17 Bible Online

1 Tantara 17 - Dikateny Iombonana Eto Madagasikara bible

1 Tantara 17

¹Taorian’izany i Davida dia nipetraka tao amin’ny lapany; ka hoy izy tamin’i Natàna mpaminany: — Indro aho ity mipetraka amin’ny lapa vita hazo sedera kanefa ny Vatamasina mirakitra ny fanekempihavanan’ny TOMPO kosa ao anaty tranolay[132]!

²Dia hoy i Natàna namaly an’i Davida: — Tanteraho avokoa izay noeritreretinao hatao; fa momba anao Andriamanitra.

³Tamin’ny alina iny ihany dia nisy tenin’Andriamanitra tamin’i Natàna nanao hoe:

⁴— Ndeha lazao amin’i Davida mpanompoko fa Izaho TOMPO dia manambara izao hafatro izao: ‹Tsy ianao no hanao tempoly hitoerako.

⁵Fa tsy mbola nitoetra an-tempoly aho hatramin’ny andro nampiakarako ny Israelita avy any Ejipta ka mandraka androany; fa Izaho dia nifindrafindra lay ary nifindrafindra fonenana.

⁶Nandritra ny fotoana rehetra nifindrafindrako manerana an’i Israely, dia nanendry ireo mpitsaran’i Israely Aho mba ho mpiandry ny vahoakako; kanefa tsy nisy nomeko tsiny na dia anankiray tamin’ireo mpitsara ireo aza ka nilazako hoe: Nahoana Aho no tsy nanaovanareo trano vita hazo sedera?›

⁷«Noho izany, lazao koa amin’i Davida mpanompoko fa Izaho TOMPOn’izao rehetra izao no mampita hafatra hoe: Izaho no naka anao tao am-piandrasana ondry tany an-kijàna mba hataoko mpanapaka eo amin’ny Israely[133] vahoakako.

⁸Nomba anao Aho tamin’izay rehetra nalehanao, ka nandripaka ny fahavalonao rehetra teo anoloanao; ary hataoko lehibe ny lazanao tahaka ny an’ireo olona ambony eto an-tany.

⁹Ary handraiketako toerana iray hampiorenako azy ny Israely vahoakako, ka dia honina tsy hanana ahiahy amin’izany izy. Fa tsy hisy firenen-dozabe hampahory azy intsony tahaka ny taloha,

¹⁰dia tamin’ny andro izay nanendreko ny mpitsara hifehy ny Israely vahoakako; ary haetriko ny fahavalonao. Ambarako aminao koa fa Izaho TOMPO no hanome taranaka ho anao[134].

¹¹Ary rehefa tapitra ny andronao ka lasa any amin’ny razanao ianao, dia hatsangako handimby anao ny anankiray amin’ireo zanakalahy naterakao ka haoriko mafy ny fanjakany[135].

¹²Izy no hanao trano ho Ahy[136], ary haoriko mafy mandrakizay ny sezafiandrianany.

¹³Izaho ho rainy, ary izy ho zanako; ka tsy hanesotra aminy na oviana na oviana ny fitiavako Aho tahaka ny nanesorako izany tamin’ilay mpanjaka talohanao[137].

¹⁴Hataoko maharitra mandrakizay ao amin’ny tempoliko sy eo amin’ny fanjakako izy; ary ny sezafiandrianany tsy ho voahozongozona mandrakizay.»

¹⁵Dia nambaran’i Natàna tamin’i Davida avokoa izay rehetra nolazain’Andriamanitra azy nandritra io fahitana io.

¹⁶Ary nankeo anatrehan’ny TOMPO tao an-tranolay i Davida mpanjaka, ka nipetraka sady nivavaka hoe: — Ry TOMPO Andriamanitro ô, mba iza moa aho; ary mba inona ny fianakaviako no tonganao amin’ny toerana misy ahy izao[138]?

¹⁷Kanefa mbola kely izany eo imasonao, Andriamanitra ô, ka efa nanaovanao fampanantenana koa hatramin’ny taranako mbola any aoriana lavitra any; ary dia noheverinao ho olona ambony saranga aho. Ry TOMPO Andriamanitro ô,

¹⁸inona no mbola azoko lazaina aminao momba ny voninahitra nomenao ahy satria Ianao no mahalala ahy mpanomponao?

¹⁹TOMPO ô, noho ny amiko mpanomponao sy araka ny sitraponao no nanaovanao izao asa lehibe manontolo izao mba hampahalalanao ny zava-dehibe rehetra vitanao.

²⁰TOMPO ô, tsy misy tahaka Anao, ary tsy misy Andriamanitra afa-tsy Ianao, araka izay rehetra ren’ny sofinay.

²¹Ary iza moa no firenena hafa eto ambonin’ny tany tahaka ny Israely vahoakanao, ka nandehananao Andriamanitra mba havotanao ho vahoakanao? Eny, nampalaza Anao ireo zava-mahagaga sy mahatahotra vitanao mba handroahanao ny firenena hafa tsy ho eo anatrehan’ny vahoakanao izay navotanao avy tany Ejipta.

²²Ny Israely vahoakanao dia nataonao ho vahoakanao mandrakizay; ary Ianao kosa, TOMPO ô, no efa tonga Andriamaniny.

²³Ankehitriny, ry TOMPO, ny fampanantenana nolazainao momba ahy sy ny taranako dia aoka ho tanteraka hatrany hatrany, ka ataovy araka izay efa nampanantenainao.

²⁴Eny, aoka ho tanteraka izany, dia halaza mandrakizay ny anaranao, ka hatao hoe: «Ny TOMPOn’izao rehetra izao no Andriamanitra ho an’i Israely!»; ary aoka ny taranako haharitra tsy azo hozongozonina eo anatrehanao.

²⁵Satria Ianao, Andriamanitro ô, efa nanambara tamiko fa hanome taranaka ho ahy; koa izany no maha eto ahy mba hivavaka manatrika anao.

²⁶TOMPO ô, Ianao mihitsy no Andriamanitra, ary izaho mpanomponao no efa nampanantenainao izany zava-tsoa izany.

²⁷Koa dia ho sitrakao ny hitahy ireo taranako mba hitohy mandrakizay eo anatrehanao; satria raha Ianao no mitahy, TOMPO ô, dia ho voatahy mandrakizay izy[139].