Read Dikateny Iombonana Eto Madagasikara 1 Tantara 20 Bible Online

1 Tantara 20 - Dikateny Iombonana Eto Madagasikara bible

1 Tantara 20

¹Rehefa niherina ny lohataona, fotoana fiaingan’ny mpanjaka handeha hiady, dia i Jôaba no nitarika ny tafika manontolo ka nandrava ny tanin’ny Hamônita sy tonga nanao fahirano an’i Rabà renivohiny; fa i Davida kosa nijanona tao Jerosalema ihany. Nony azon’i Jôaba sy noravany i Rabà,

²dia avy i Davida nanaisotra ny satroboninahitra teny an-dohan’i Milkôma[146] ilay andriamanitry ny Hamônita. Mihoatra ny telopolo kilao no hita fa lanjan’io satroboninahitra volamena io; sady nisy vatosoa anankiray koa taminy, vatosoa izay napetraka teo an-tampon’ny satroboninahitr’i Davida. Be dia be ny zavatra voababo tao an-drenivohitra no nentin’i Davida;

³ary ny mponina izay tao dia navoakany ka notereny hiasa amin’ny tsofa sy ny hersa ary ny famaky[147]. Nataon’i Davida toy izany avokoa ny tanàna hafa rehetra fonenan’ny Hamônita. Dia niverina nankany Jerosalema i Davida sy ny tafiny manontolo.

⁴Taorian’izany, dia nisy ady tamin’ny Filistinina tao Gezera. Tamin’izay i Sibekay, avy any Hosà, no nahafaty an’i Sipay isan’ny taranak’i Rafà[148]; ka dia voaetry ny Filistinina.

⁵Dia nisy ady tamin’ny Filistinina indray. Ka i Elihanàna, zanakalahin’i Jahîry, no nahafaty an’i Lahemỳ, rahalahin’i Gôliata avy any Gata[149], dia i Gôliata izay nanana zaran-defona vaventy tahaka ny voditenon’ny mpanenona.

⁶Nisy ady koa tao Gata. Tao dia nisy lehilahy anankiray avo be sady enin-drantsana isan-tanana aman-tongotra ka dia 24 no fitambarany; taranak’i Rafà koa izy.

⁷Nohantsiny ny Israelita, ka i Jonatàna, zanakalahin’i Simehà izay rahalahin’i Davida, no nahafaty azy.

⁸Ireo miaramila filistinina ireo dia samy taranak’i Rafà tao Gata, ka matin’ny tanan’i Davida sy ny tanan’ny mpanompony.