Read Dikateny Iombonana Eto Madagasikara 1 Tantara 29 Bible Online

1 Tantara 29 - Dikateny Iombonana Eto Madagasikara bible

1 Tantara 29

¹Dia hoy i Davida mpanjaka tamin’ny olona rehetra tafangona teo: — I Salômôna zanako, ilay hany nofidin’Andriamanitra, dia mbola tanora sady tsy za-draharaha; nefa goavana ny asa hatao, satria tsy lapa ho an’olombelona fa tempoly ho an’ny TOMPO Andriamanitra.

²Nanao izay tratry ny aiko aho namonona fitaovana ho an’ny tranon’Andriamanitro: dia ny volamena hanaovana ny fanaka volamena; ny volafotsy hanaovana ny fanaka volafotsy; ny halimo hanaovana ny fanaka halimo; ny vy hanaovana ny fanaka vy; ary hazo hanaovana fanaka hazo. Nataoko vonona ny vato berila sy vato halatsaka an-tranontranony, ny vatomainty sy vato misoratsoratra, ny vatosoa isan-karazany ary ny vatokaranana betsaka[188].

³Ankamamiko tokoa ny tranon’Andriamanitro; ka ho fanampin’ny zavatra rehetra nomaniko ho an’ity Toeramasina ity, dia omeko ho an’ny tranon’Andriamanitro koa izay volamena sy volafotsy ananako manokana:

⁴dia volamena avy any Ôfira[189], milanja zato taonina; volafotsy madio milanja 240 taonina, natao hapetaka amin’ny ati-rindrina isan’efitrano.

⁵Iza àry, amin’izao andro anio izao, no mba mazoto hanolotra fanomezana an-tsitrapo amin’ny TOMPO mba hanaovan’ireo mpahay taozavatra ny fanaka volamena sy volafotsy ary ny asa isan-karazany?

⁶Tamin’zay, dia samy nanolotra fanomezana an-tsitrapo avokoa ny lohan-pianakaviana, ny filohan’ireo fokon’i Israely, ny komandin-tafika mpifehy arivo sy mpifehy zato, mbamin’ny mpiandraiki-draharahan’ny mpanjaka

⁷ka nanome izay hanaovana ny fanompoana ao amin’ny tranon’Andriamanitra: dia volamena milanja 170 taonina; farantsa volamena miisa 10 000; volafotsy milanja telonjato taonina; halimo milanja eninjato taonina eo ho eo ary vy milanja telo arivo taonina.

⁸Izay nanana vatosoa dia nanome azy teo am-pelatanan’i Jehiela, taranak’i Gersôna[190], mba ho zava-tsarobidy tahirizina ao an-tranon’ny TOMPO.

⁹Dia samy faly ny besinimaro nanolotra fanomezana an-tsitrapo, satria tamin’ny fony manontolo no nanaovany an’izany ho an’ny TOMPO; ary faly dia faly koa i Davida mpanjaka.

¹⁰Dia nankalaza ny TOMPO teo imason’ny olona rehetra tafangona teo i Davida ka nanao hoe: — Hankalazaina anie Ianao, ry TOMPO Andriamanitr’i Israely razambenay; hankalazaina anie Ianao hatrizay ka ho mandrakizay[191]!

¹¹Anao, TOMPO ô, ny halehibiazana sy hery; Anao ny voninahitra sy hamirapiratana ary fiandrianana; satria Anao ny zava-drehetra any an-danitra sy etỳ an-tany! Ianao, TOMPO ô, no mpanjaka; Ianao no asandratra ho filohan’ny zavatra rehetra.

¹²Avy aminao ny harena sy ny voninahitra; ary Ianao no mifehy izao rehetra izao. Eo an-tananao ny fahefana sy ny hery, ka Ianao no mahalehibe sy manamafy ny zavatra rehetra.

¹³Koa misaotra Anao izahay, ry Andriamanitray ô, sy midera ny anaranao be voninahitra.

¹⁴Fa zinona moa aho, ary zinona moa ny mpiray firenena amiko, no hanan-kery hanolotra fanomezana an-tsitrapo toy izao? Eny, avy aminao ny zavatra rehetra; ary ny avy taminao ihany no nanomezanay Anao.

¹⁵Fa toy ny vahiny sy mpivahiny an-tanin’olona izahay eo anatrehanao, tahaka ny razanay rehetra rahateo; miserana tahaka ny aloka ny andronay etỳ an-tany, ka tsy azo ianteherana.

¹⁶Ry TOMPO Andriamanitray ô, ireo harena rehetra novononinay ireo, hanorenana tempoly ho Anao mba hanajana Anao ilay Masina, dia avy taminao; ary Anao rahateo izy rehetra.

¹⁷Fantatro, ry Andriamanitro ô, fa mandinika ny ao am-pon’ny olona Ianao ary mankasitraka ny hitsim-po. Raha izaho, dia tamin-kitsim-po no nanolorako an-tsitrapo ireo fanomezana rehetra ireo; ary ankehitriny, dia amin-kafaliana no ahitako ny vahoakanao izay vory eto, nanolotra an-tsitrapo ny fanomezany ho Anao.

¹⁸Ry TOMPO Andriamanitr’i Abrahama sy i Itsehàka ary i Jakôba razanay ô, tahirizo mandrakizay izany toe-tsaina sy toe-po ananan’ny vahoakanao izany ka ataovy mitodika aminao hatrany ny fony;

¹⁹ary omeo an’i Salômôna zanako ny fo vonona manontolo hitandrina ny didinao sy baikonao ka hanatanterahany azy rehetra sady hanorina ny tempoly lapanao izay efa nanomanako fitaovana.

²⁰Dia hoy i Davida tamin’ny olona rehetra tafangona teo: — Aoka ianareo hankalaza ny TOMPO Andriamanitrareo! Dia nankalazain’izy rehetra ilay TOMPO Andriamanitry ny razany; sady niondrika izy ka niankohoka teo anatrehan’ny TOMPO sy teo anatrehan’ny mpanjaka.

²¹Nisy sorom-pihavanana sy sorona dorana manontolo natolotra ho an’ny TOMPO, ny ampitson’iny: dia vantotr’ombilahy arivo, ondrilahy arivo, ary zanak’ondry arivo, mbamin’ny fanatitra divay araraka momba ireo. Be dia be tokoa ny sorom-pihavanana ka ampy hamahanana ny Israelita rehetra tonga teo.

²²Tamin’izany andro izany, dia tamin-pifaliana lehibe no nihinanan’ny olona sy nisotroany teo anatrehan’ny TOMPO. Dia nanaovana fanambaràna fanindroany[192] ny maha mpanjaka an’i Salômôna ka natolotra azy teo anatrehan’ny TOMPO ny fahefana maha mpanjaka; ary natokana ho mpisorona kosa i Tsadôka.

²³Dia nipetraka teo amin’ny sezafiandrianana nomen’ny TOMPO azy i Salômôna mba ho mpanjaka handimby an’i Davida rainy; sady nambinina izy ka nanaiky azy i Israely manontolo.

²⁴Samy nanaiky an’i Salômôna mpanjaka avokoa ny mpifehy sy ny miaramila mahery fo ary na dia ny zanaka hafa rehetra naterak’i Davida aza[193].

²⁵Nasandratry ny TOMPO teo imason’i Israely manontolo ny lazan’i Salômôna, ary nomeny voninahitra mihoatra noho ny an’ny mpanjaka rehetra talohany tao Israely ny fanjakany.

²⁶Nanjaka tamin’i Israely manontolo i Davida zanakalahin’i Jisay.

²⁷Efapolo taona no nanjakany: ka fito taona tao Hebrôna ary 33 taona tao Jerosalema[194].

²⁸Efa tratra antitra tsara sady voky andro sy heni-karena amam-boninahitra izy vao maty; ary i Salômôna zanany no nanjaka nandimby azy.

²⁹Ny tantaran’i Davida mpanjaka, na ny voalohany na ny farany, dia efa voasoratra ao amin’ny boky milohateny hoe «Asan’i Samoela mpaminany manam-pahitana[195]» sy «Asan’i Natàna mpaminany» ary «Asan’i Gada mpaminany manam-pahitana»:

³⁰voatantara ao avokoa ny zavatra rehetra momba ny nanjakàn’i Davida, sy ny asa nanehoany herimpo mbamin’ny zava-nitranga taminy sy tamin’i Israely ary tamin’ny fanjakana rehetra an-tany hafa.