Read Dikateny Iombonana Eto Madagasikara 2 Tantara 10 Bible Online

2 Tantara 10 - Dikateny Iombonana Eto Madagasikara bible

2 Tantara 10

¹Nankany Sekema[75] i Rehabohama, satria tao no efa nahatongavan’ny Israelita tavaratra rehetra hampanjaka azy.

²Tamin’izay i Jerobohama, zanakalahin’i Nebata, dia tany Ejipta, noho izy nandositra lavitra an’i Salômôna mpanjaka. Koa rehefa ren’i Jerobohama fa hisy izany fivoriana izany, dia niverina avy tany Ejipta izy.

³Nisy olona nirahina haka azy ary tonga izy mbamin’ny Israelita tavaratra rehetra, ka niteny tamin-dRehabohama hoe:

⁴— Irainao dia nampitondra zioga mavesatra anay. Fa ankehitriny kosa, raha mba hamaivaninao ny fanompoana mafy tamin-drainao sy ny zioga mavesatra nampiantsorohany taminay, dia hanompo anao izahay.

⁵Dia hoy ny navalin’i Rehabohama: — Rehefa afaka telo andro, dia miverena atỳ amiko indray ianareo. Dia lasa nody ny olona.

⁶I Rehabohama mpanjaka kosa naka hevitra tamin’ny loholona izay mpandraharahan’i Salômôna rainy fony fahavelony, ka nanontany azy hoe: — Ahoana no hevitra omenareo havaliko an’ireo vahoaka ireo?

⁷Dia hoy ny loholona tamin’i Rehabohama: — Raha ho tsara fo amin’ireo vahoaka ireo ianao, ka halemy paika aminy sy hanao teny mamy aminy, dia ho mpanomponao hatrany izy.

⁸Kanjo tsy noraharahain’i Rehabohama ny torohevitra nomen’ny loholona azy; fa ny tovolahy izay nitovitovy taona aminy sady efa mpandraharahany no nakany hevitra,

⁹ka nanontaniany hoe: — Inona kosa no mba hevitra omenareo havalintsika ny vahoaka izay niangavy ahy hanamaivana ny zioga nampiantsorohan-draiko azy?

¹⁰Dia hoy ireto tovolahy ireto tamin’i Rehabohama: — Niangavian’ireo vahoaka ireo ianao hanamaivana ny zioga mavesatra nampiantsorohan-drainao azy. Koa izao no lazao aminy: «Ny ankikeliko dia lehibe noho ny sandrin-draiko[76].

¹¹Raha nampitondra zioga mavesatra anareo ny raiko, izaho kosa vao mainka hanampy trotraka izany; karavasy tsotra no namaizan-draiko anareo, fa karavasy misy faraingo kosa no hamaizako anareo.»

¹²Tamin’ny andro fahatelo dia nankany amin-dRehabohama i Jerôbohama sy ny vahoaka israelita tavaratra, araka ny tenin’ny mpanjaka hoe: «Miverena atỳ amiko ianareo amin’ny andro fahatelo».

¹³Teny mahery no navalin’ny mpanjaka ireo vahoaka fa tsy noraharahainy akory ny torohevitry ny loholona;

¹⁴ary araka ny torohevitr’ireo tovolahy no nitenenany taminy hoe: — Nampitondra zioga mavesatra anareo ny raiko[77], fa izaho kosa vao mainka hanampy trotraka an’izany; karavasy tsotra no namaizan-draiko anareo, fa karavasy misy faraingo kosa no hamaizako anareo.

¹⁵Koa tsy nankatò ny fitakian’ny vahoaka ny mpanjaka; fa ny TOMPO no nahatonga izany zavatra izany hahatanteraka ny fampanantenana izay nampilazainy an’i Ahià avy any Silao tamin’i Jerôbohama zanakalahin’i Nebata[78].

¹⁶Rehefa tsapan’ny Israelita tavaratra rehetra fa tsy nankatoavin’ny mpanjaka ny fitakiany, dia hoy ny navalin’ireo hoe: — Tsy manana anjara inona amin’i Davida isika na manana anjara lova amin’ny taranak’i Jisay. Samia mody any an-tranony avy isika, ry Israelita tavaratra! Ianao kosa, ry zafikelin’i Davida, karakarao ny fanjakanao[79]. Dia samy nody ho any an-tranony avy ny Israelita tavaratra rehetra.

¹⁷Ny Israelita nonina tany an-tanànan’i Joda ihany no nanjakàn’i Rehabohama.

¹⁸Ary naniraka an’i Adôrama[80] mpiandraikitra ny asa an-terivozona i Rehabohama mpanjaka; nefa nitora-bato an’i Adôrama ny Israelita tavaratra ka nahafaty azy. Zara raha afa-nitaingina ny kalesiny haingana i Rehabohama mba handositra any Jerosalema.

¹⁹Toy izany no nikomian’i Israely avaratra tamin’ny taranak’i Davida mandraka androany.