Read Dikateny Iombonana Eto Madagasikara 2 Tantara 11 Bible Online

2 Tantara 11 - Dikateny Iombonana Eto Madagasikara bible

2 Tantara 11

¹Vao tonga tany Jerosalema i Rehabohama, dia namory miaramila voafantina miisa vondrona 180 tamin’ny fokon’i Joda sy i Benjamîna mba hiady amin’i Israely avaratra ka hamerina indray io fanjakana io ho an’ny tenany.

²Kanjo nisy tenin’ny TOMPO tamin’i Semahià olon’Andriamanitra, dia teny nanao hoe:

³— Ambarao amin’i Rehabohama, zanakalahin’i Salômôna sady mpanjakan’i Joda, ary koa amin’ny Israelita rehetra ao anatin’ny faritr’i Joda sy i Benjamîna,

⁴fa izao no lazain’ny TOMPO: «Aza mandeha hiady amin’ny mpiray firenena aminareo; samia mody any an-tranony avy ianareo, satria Izaho no nahatonga izao zavatra izao.» Dia nankatoavin’ny olona izany tenin’ny TOMPO izany, ka samy lasa nody izy fa tsy nandeha hamely an’i Jerôbohama.

⁵Nitoetra tao Jerosalema i Rehabohama ary nanamboatra tanànamimanda tany Joda,

⁶dia ireto avy: i Betlehema sy i Hetama ary i Tekôa,

⁷i Bety-Tsoro sy i Sôkao ary i Hadolama,

⁸i Gata sy i Maresà ary i Zifa,

⁹i Adôraîma sy i Lakisy ary i Hazekà,

¹⁰mbamin’i Tsôrehà sy i Aialôna ary i Hebrôna, izay samy tanànamimanda ao anatin’ny faritr’i Joda sy i Benjamîna.

¹¹Nohamafisin’i Rehabohama ny mandan’ireo tanàna ireo sady nametrahany mpifehy ary koa sakafo sy menaka aman-divay tao aminy.

¹²Isan-tanàna dia nasiany ampinga lehibe sy lefona avokoa. Ny nanamafisany tsara ireo tanàna ireo no nitazonan’i Rehabohama ny faritr’i Joda sy i Benjamîna ho azy.

¹³Ny mpisorona sy ny levita izay nonina tany Israely avaratra manontolo dia niainga avy any amin’ny faritra rehetra nisy azy ka niandany tamin’i Rehabohama.

¹⁴Fa nandao tanim-bilona amam-pananana ny levita ka nankany Joda sy Jerosalema, satria i Jerôbohama sy ireo zanany lahy efa nisakana azy tsy hanao ny raharaham-pisoronany ho an’ny TOMPO;

¹⁵nanendry olona ho mpisorona manko izy hisahana ireo toeram-panasinana sy hikarakara ireo sarin’osilahy na ombilahikely[81] izay sampy nampamboariny.

¹⁶Na iza na iza anisan’ny foko rehetra tamin’i Israely avaratra, ka nafana fo hitady ny TOMPO Andriamanitr’i Israely, dia nanaraka ireo levita nankany Jerosalema mba hanolotra sorona amin’ny TOMPO Andriamanitry ny razany.

¹⁷Ka dia nampahery ny fanjakàn’i Joda izy ireny sady nijoro ho mpanohana an’i Rehabohama zanakalahin’i Salômôna, nandritra ny telo taona; fa ny fitondrantena tsara narahin’i Davida sy i Salômôna no nizoran’i Rehabohama nandritra ny telo taona.

¹⁸I Rehabohama dia nanambady an’i Mahalato izay i Jerimôta zanakalahin’i Davida no rainy ary i Abihaîla zanakavavin’i Eliaba sady zafin’i Jisay no reniny.

¹⁹I Mahalato dia nahazoan’i Rehabohama zazalahy telo, dia i Jehosa sy i Semarià ary i Zahama.

²⁰Ankoatran’i Mahalato dia nalain’i Rehabohama ho vady koa i Mahekà zanakavavin’i Absalôma[82] sady niteraka an’i Abià sy i Hatahy ary i Zizà sy i Selômita.

²¹I Mahekà, zanakavavin’i Absalôma, dia notiavin’i Rehabohama mihoatra noho ny vadiny sy ny vaditsidranony rehetra; fa vady 18 ary vaditsidrano enimpolo no nananany, ka niterahany zazalahy 28 sy zazavavy enimpolo.

²²I Abià, zanakalahin’i Mahekà, no nataon’i Rehabohama ho filohan’ireo rahalahiny, satria izy no niriny hampanjakaina.

²³Kinga i Rehabohama ka nanaparitaka ny zanakalahiny hafa rehetra eran’ny faritr’i Joda sy i Benjamîna, dia tany amin’ny tanànamimanda samihafa; nomeny sakafo betsaka ireo sady nitadiavany vady maro.