Read Dikateny Iombonana Eto Madagasikara 2 Tantara 12 Bible Online

2 Tantara 12 - Dikateny Iombonana Eto Madagasikara bible

2 Tantara 12

¹Rehefa nampandry ny fanjakany sady nanamafy fahefana i Rehabohama, dia nandao ny lalànan’ny TOMPO na ny tenany na ny Israelita rehetra tatsimo.

²Ary tamin’ny taona fahadimy nanjakan’i Rehabohama dia niakatra i Sisàka mpanjakan’i Ejipta mba hamely an’i Jerosalema, satria nivadika tamin’ny TOMPO ireo mponina tao.

³Nitondra kalesy 1 200 sy mpitaingin-tsoavaly 60 000 i Sisàka; ary tsy hita isa ny miaramila nanaraka azy avy any Ejipta, dia ny Libianina sy ny Sokita ary ny Etiôpianina.

⁴Dia azony ny tanànamimanda eran’i Joda, ka tonga hatrany Jerosalema izy.

⁵Noho ny fiavian’i Sisàka, dia tafavory tao Jerosalema i Rehabohama sy ireo mpifehy ny faritr’i Joda. Nanatona ny mpivory kosa i Semahià mpaminany ka nanao taminy hoe: — Izao no lazain’ny TOMPO: «Ianareo efa nandao Ahy; Izaho koa mba mandao anareo ho eo ambany fifehezan’i Sisàka.»

⁶Dia niaiky hadisoana ny mpanjaka sy ireo mpifehy ny Israelita tatsimo ka nanao hoe: — Rariny ny an’ny TOMPO!

⁷Ary nony hitan’ny TOMPO izany fiekena hadisoana izany, dia nisy indray tenin’ny TOMPO tamin’i Semahià nanao hoe: — Efa niaiky hadisoana ireo, ka tsy handringana azy Aho fa tsy ho ela dia hanafaka azy; ary ny fahatezerako tsy hatosako amin’i Jerosalema avy amin’ny famelezan’i Sisàka.

⁸Kanefa hilefitra hanompo an’i Sisàka ihany izy ireo, mba hahafantarany fa tsy mitovy ny manompo Ahy sy ny manompo ireo mpanjakan’ny tany vahiny.

⁹Dia niakatra i Sisàka mpanjakan’i Ejipta mba hamely an’i Jerosalema ka namabo ny raki-tsoa tao an-tranon’ny TOMPO sy tao an-dapan’ny mpanjaka; nobaboiny avokoa ireo, indrindra ny ampinga volamena rehetra izay nataon’i Salômôna[83].

¹⁰Ho solon’ireny kosa dia nampanao ampinga halimo i Rehabohama; ka ny lehiben’ny mpiambina, izay niandry ireo varavaran’ny lapan’ny mpanjaka, no nanankinany azy.

¹¹Ary na oviana na oviana nidiran’ny mpanjaka tao an-tranon’ny TOMPO, dia tonga ny mpiambina naka ireo ampinga ireo, ka avy eo namerina azy ho ao an’efitranon’ny mpiambina indray.

¹²Niaiky hadisoana kosa i Rehabohama, ka niala taminy ny fahatezeran’ny TOMPO mba tsy hahalany ringana azy; sady mbola nisy hatsaram-panahy ihany tao Joda.

¹³I Rehabohama mpanjaka dia nanamafy ny fahefàny tao Jerosalema, ka dia nanjaka; feno 41 taona izy fony tonga mpanjaka, ary naharitra 17 taona no nanjakany tao Jerosalema, ilay tanàna nofidin’ny TOMPO tamin’ireo fokon’i Israely rehetra mba hampitoerany ny vonihahiny. Ny anaran-drenin’i Rehabohama dia i Nahamà izay Hamônita.

¹⁴Ary nanao ratsy i Rehabohama, satria tsy nampifantoka ny fony hitady ny TOMPO.

¹⁵Ny tantaran’i Rehabohama, na tamboalohany na tafara, dia voasoratra ao amin’ny boky milohateny hoe Asan’i Semahià mpaminany sy i Hidao mpahita[84] sady voavisavisa tsara. Ary niady mandrakariva i Rehabohama sy i Jerôbohama.

¹⁶Rehefa lasa nodimandry any amin’ny razany i Rehabohama, dia nalevina tao an-Tanànan’i Davida; ary i Abià[85] zanany lahy no nanjaka nandimby azy.