Read Dikateny Iombonana Eto Madagasikara 2 Tantara 25 Bible Online

2 Tantara 25 - Dikateny Iombonana Eto Madagasikara bible

2 Tantara 25

¹Feno 25 taona i Amatsià fony tonga mpanjaka; ary naharitra roapolo taona no nanjakany tao Jerosalema. Ny anaran-dreniny dia i Jôhadàna, izay avy ao Jerosalema ihany.

²Nanao izay mahitsy eo imason’ny TOMPO i Amatsià, kanefa tsy dia tamin-kafanampo tanteraka.

³Rehefa nohamafisin’i Amatsià ny fahefàm-panjakàny, dia nasainy novonoina ho faty ireo manamboninahitra izay nahafaty an’i Jôasy mpanjaka rainy[143].

⁴Kanefa ny zanakalahin’ireo mpamono an’i Jôasy dia tsy mba novonoin’i Amatsià ho faty, fa nataony araka izay voasoratra ao amin’ny bokin’ny Lalàna, dia ny bokin’i Mosesy; ao manko no nandidian’ny TOMPO hoe: «Ny ray aman-dreny tsy hatao maty amin’ny ataon-janany, ary ny zanaka tsy hatao maty amin’ny ataon-dray aman-dreniny; fa samy ho faty amin’ny fahotany avy ny olona[144].»

⁵Dia novorîn’i Amatsià ny vatan-dehilahy tao amin’ny fanjakany, na Jodeanina na Benjaminita, ka nanendreny mpifehy andia-miaramila sy vondro-miaramila, araka ny tarika nisy azy. Natao fanisana ny vatan-dehilahy feno roapolo taona no ho miakatra ka lehilahy voafantina nisy antokony telonjato no hita fa azo nalefa hiantafika sady kinga fampiasa lefona sy ampinga.

⁶Teo koa ny lehilahy maherifo israelita nisy antokony zato nokaramain’ity mpanjaka volafotsy telo taonina

⁷Kanefa nisy lehilahy olon’Andriamanitra tonga tao amin’i Amatsià ka nanao hoe: — Ry andriamanjaka, aza avela hanaraka anao hiantafika ny miaramila israelita, satria tsy miaraka amin’ireo rehetra taranak’i Efraîma ireo ny TOMPO.

⁸Fa raha miara-manainga aminy ihany ianao, na dia hahery mikatroka an’ady toy inona aza[145], dia hataon’Andriamanitra lavo eo anoloan’ny fahavalonao; Andriamanitra manko no hany mahay mampandresy na mampahalavo.

⁹Hoy kosa i Amatsià tamin’ilay olon’Andriamanitra: — Ka hatao ahoana ny amin’ny volafotsy telo taonina izay nomeko ny miaramila israelita? Dia novaliany hoe: — Ny TOMPO dia mahay manome anao mihoatra lavitra noho izany.

¹⁰Ary navahan’i Amatsià ny miaramila efraimita tonga teo aminy mba halefa hody indray; ka sady lasa nody ireo no nirehi-pahatezerana mafy dia mafy tokoa tamin’ny fanjakàn’i Joda.

¹¹Nanana herimpo i Amatsià, ka nitarika ny tafiny hankao amin’ny Lohasahan-tsira, ary nahafaty antokony folo tamin’ny Edômita taranak’i Sehîra.

¹²Ary ny antokony folo sisa kosa dia nataon’ny Jodeanina sambo-belona, dia nentiny teo antampon’ny hantsam-bato ary navariny teo, ka montsamontsana izy rehetra.

¹³Fa ny miaramila efraimita, izay nalefan’i Amatsià hody mba tsy hiara-miantafika aminy, dia niriotra namely ireo tanàna jodeanina nanomboka teo Migrôna ka nipaka hatrany Bety-Hôrôna ary nahafaty olona telo arivo sady nitondra babo betsaka.

¹⁴Nony niverina avy nanafika ny Edômita i Amatsià, dia nitondra ny sarivongan’ny andriamanitr’ireo taranak’i Sehîra ireo ka nanangana azy ho andriamaniny; ary niankohoka teo anatrehany izy hitsaoka azy sady nanolotra sorona taminy.

¹⁵Dia nirehi-pahatezerana tamin’i Amatsià ny TOMPO, ka naniraka mpaminany anankiray ho any aminy hanontany azy hoe: — Nahoana ianao no mivavaka amin’ny andriamanitr’ireo hafa firenena, dia andriamanitra izay tsy naharo ny olony tamin’ny tananao akory aza?

¹⁶Fa rehefa nitenenan’ity mpaminany izany izy, dia namaly hoe: — Moa ve nisy nanendry anao ho mpanolotsaina ny mpanjaka? Aoka itsỳ, fandrao asian’ny olona eo ianao! Dia niato kely ilay mpaminany, vao nanohy hoe: — Fantatro fa nanapa-kevitra hahafaty anao Andriamanitra, satria nanao izany ianao ka tsy nihaino ny anatro.

¹⁷Hevitra hafa no niandanian’i Amatsià mpanjakan’i Joda; ka tamin’izay izy dia nandefa iraka tamin’i Jôasy, zanakalahin’i Jôahaza sy zafin’i Jehò sady mpanjakan’i Israely mba hilaza aminy hoe: «Avia hifanandrina an’ady isika!»

¹⁸Fa i Jôasy mpanjakan’i Israely dia nandefa iraka tany amin’i Amatsià mpanjakan’i Joda hamaly azy hoe: «Ny kirihitra tsilo izay tany Libano, hono, dia nandefa iraka tany amin’ny sedera izay tany Libano mba hiangavy azy hoe: ‹Omeo ho vadin’ny zanako lahy ny zanakao vavy.› Kanjo nisy bibidian’i Libano namaky teo ka nanosihosy ny kirihitra tsilo[146].

¹⁹Lazainao, ry Amatsià, fa nandresy ny Edômita ianao, ka dia nasesiky ny fonao hirehareha; mitoera ihany re ao an-tranonao, fa nahoana ianao no hanomboka ady handoza anao sady hahalavo ny tenanao mbamin’ny tafik’i Joda?»

²⁰Kanefa tsy nanaiky i Amatsià; avy tamin’Andriamanitra rahateo izany, satria tiany hatolotra eo an-tanan’ny fahavalo i Amatsià sy ny tafiny noho ireo nivavaka tamin’ny andriamanitry ny Edômita.

²¹Dia niakatra hiady i Jôasy mpanjakan’i Israely avaratra; ka ny tafiny sy ny an’i Amatsià mpanjakan’i Joda dia nifanandrina tao Bety-Semesy tanànan’i Joda.

²²Resy teo anoloan’ny tafik’i Israely ny tafik’i Joda; ka samy nandositra ho any an-tranony avy ny miaramila jodeanina.

²³Tao Bety-Semesy no voasambotr’i Jôasy mpanjakan’i Israely i Amatsià, zanakalahin’i Jôasy sy zafin’i Ahazià sady mpanjakan’i Joda, ka nentiny nankany Jerosalema; ary nandravan’i Jôasy roanjato metatra ny mandan’i Jerosalema hatreo amin’ny vavahadin’i Efraîma ka hatrany amin’ny vavahady anjorony[147].

²⁴Dia nalain’i Jôasy avokoa ny volamena sy ny volafotsy ary ny zava-tsarobidy izay hita tao an-tranon’Andriamanitra sady teo ambany fiambenan’i Hôbeda-Edôma na izay hita tao amin’ny raki-tsoan’ny lapan’ny mpanjaka; ary nisy ihany koa olona nalainy hatao takalon’aina. Izay izy vao niverina nankany Samaria.

²⁵Taorian’ny nahafatesan’i Jôasy zanakalahin’i Jôahaza sady mpanjakan’i Israely, dia mbola naharitra 15 taona i Amatsià zanakalahin’i Jôasy sady mpanjakan’i Joda.

²⁶Ny sisa amin’ny tantaran’i Amatsià, na tamboalohany na tafara, dia voasoratra ao amin’ny Bokin’ireo mpanjakan’i Joda sy i Israely[148].

²⁷Nanomboka tamin’ny andro nihatahan’i Amatsià tsy hanaraka ny TOMPO, dia nisy olona nikomy tamin’ity mpanjaka tao Jerosalema, ka nahatonga azy nandositra tany Lakisy[149]; fa nampanaraka azy ireto mpikomy ka nampamono azy ho faty tany an-toerana.

²⁸Dia nampodina an-kalesy tarihin-tsoavaly ny fatiny, ka nalevina tao amin’ny fasam-pianakaviany tao an-drenivohitr’i Joda.