Read Dikateny Iombonana Eto Madagasikara 2 Tantara 8 Bible Online

2 Tantara 8 - Dikateny Iombonana Eto Madagasikara bible

2 Tantara 8

¹Nony afaka ny roapolo taona nanorenan’i Salômôna ny tranon’ny TOMPO sy ny lapa ho an’ny tenany,

²dia namboariny ny tanàna izay nomen’i Hirama azy ka namponenany ny Israelita.

³Dia nanafika an’i Hamata-Tsôbà[58] i Salômôna ka naharesy azy.

⁴Namboariny ny tanànan’i Tadmôra[59] tany an-taniefitra sy ny tanàna izay efa naoriny fahiny tao amin’ny faritr’i Hamata mba ho fitahirizam-bokatra.

⁵Namboariny koa i Bety-Hôrôna ambony sy i Bety-Hôrôna ambany[60], izay samy tanàna mafy mimanda sady misy vavahady tsara hidy;

⁶toraka izany ihany koa i Bahalato[61] sy ny tanàna rehetra fitahirizam-bokatra na fitobian-kalesy na fitoeran-tsoavaly. Natsangan’i Salômôna avokoa izay rehetra tiany haorina tao Jerosalema sy tany Libano ary manerana ny tany nofeheziny.

⁷Mbola nisy sisa tavela teo amin’ny tany ireo antokon’olona isan-karazany, dia ny Hetita sy Amôrita mbamin’ny Perizita sy Hivita ary Jebosita, izay samy tsy anisan’ny Israelita.

⁸Mbola nisy tavela teo tokoa ny taranak’ireo fa tsy naringan’ny Israelita, ka dia nampanaovin’i Salômôna asa fanompoana izay tohiziny mandraka androany.

⁹Ny Israelita kosa tsy mba nampanaovin’i Salômôna izany, fa narotsany[62] ho miaramila na ho manamboninahitra na ho mpitondra kalesy na ho mpitaingin-tsoavaly.

¹⁰Ary ny isan’ireo mpanara-maso ny asa nampanaovin’i Salômôna dia nisy 250 lahy izay nanam-pahefana tamin’ny olona mpiasa.

¹¹Nasain’i Salômôna niakatra avy any an-tanànan’i Davida ho ao amin’ny trano izay nataony ho azy ny zanakavavin’ny Farao; fa hoy i Salômôna anakampony hoe: «Na dia ny vadiko aza tsy hitoetra ao an-dapan’i Davida mpanjakan’i Israely, satria masina ireo toerana izay efa nidiran’ny Vatamasin’ny TOMPO.»

¹²Tamin’izay i Salômôna dia nanolotra sorona dorana manontolo ho an’ny TOMPO teo ambonin’ny alitara izay naoriny ho Azy teo anoloan’ny vavahadin’ny Toeramasina.

¹³Araka ny didin’i Mosesy dia nanatitra izay fanao isan’andro i Salômôna tamin’ny sabata sy ny voaloham-bolana ary ny fety lehibe telo isan-taona, izany hoe ny fety fihinanana mofo tsy misy leviora, ny fetin’ny Pentekôsta ary ny fetin’ny Tranotomboka[63].

¹⁴Araka ny fandaharan’i Davida rainy, dia notendren’i Salômôna ny antokon’ny mpisorona ho amin’ny fanompoany avy ary ny levita ho amin’ny raharahany, dia ny hidera ny Tompo sy hanampy ny mpisorona amin’ny fanompoam-pivavahana fanao isan’andro; notendreny koa ny mpiandry varavarana, araka ny antokony amin’ny isam-bavahady. Izany rahateo no nandidian’i Davida olon’Andriamanitra azy[64].

¹⁵Ary tsy nialan’ireo ny didin’i Davida mpanjaka momba ny mpisorona sy ny levita na amin’inona na amin’inona, indrindra fa ny amin’ny fitahirizan-drakitra.

¹⁶Toy izany no nahatontosana ny asa rehetra nokasain’i Salômôna, hatramin’ny andro nanorenana ny tranon’ny TOMPO ka ambaram-pahavitany; ka dia lavorary ny tranon’ny TOMPO.

¹⁷Tamin’izay i Salômôna dia nankany Hetsiôny-Gebera sy Elôta eo amoron’ny Ranomasin’ny Volotara any amin’ny tany Edôma.

¹⁸Dia nandefa sambo sy matilò mahay ranomasina i Hirama, tamin’ny alalan’ireo tandapany; ary nandeha niaraka tamin’ny tantsambon’i Salômôna ho any Ôfira ireo[65], ka nahazo volamena 13 taonina mahery ary nitondra izany ho an’i Salômôna mpanjaka.