Read Dikateny Iombonana Eto Madagasikara Hezrà 10 Bible Online

Hezrà 10 - Dikateny Iombonana Eto Madagasikara bible

Hezrà 10

¹Raha mbola nanao izany vavaka fieken-keloka izany i Hezrà sady nitomany sy niankohoka teo anoloan’ny tranon’Andriamanitra, dia nisy vahoaka israelita maro, lehilahy sy vehivavy mbamin’ny ankizy madinika, nivory nanodidina azy; ary nitomany mafy dia mafy izy rehetra.

²Tamin’izany no niteny i Sekanià, zanakalahin’i Jehiela sady anisan’ny taranak’i Helama, ka nanao tamin’i Hezrà hoe: — Efa nanao izay mahadiso amin’Ilay Andriamanitsika izahay, satria naka vehivavy hafa firenena anisan’ireo mponin’ity tany ity ho vadinay; nefa na izany aza, dia mbola misy fanantenana ihany ho an’i Israely.

³Aoka hifanaiky amin’Ilay Andriamanitsika izahay fa handroaka mbamin-janany ireo vehivavy rehetra hafa firenena ireo. Harahinay ny anatra nataonao sy naroson’izay fatra-panaja ny didin’Andriamanitra; aoka hatao araka ny lalànany tokoa izany!

⁴Mitsangàna fa adidinao izao raharaha izao; ary izahay koa vonon-kiaraka aminao. Aoka ho sahinao atao izany!

⁵Dia nitsangana i Hezrà ka nampianiana ny lohandohan’ireo mpisorona levita[67] sy ireo filohan’ny Israelita hanao araka izany tolokevitr’i Sekanià izany; ary dia nianiana ireo.

⁶Taorian’izay i Hezrà no niala teo anoloan’ny tranon’Andriamanitra ka nankany amin’ny efitranon’i Jôhanàna zanakalahin’i Eliasiba ary nitoetra tao; saingy tsy nety nihinan-kanina sy nisotro rano izy satria nalahelo tokoa noho ny fahadisoan’ireo Jiosy tafaverina avy any an-tsesitany.

⁷Dia nisy teny nalefa eran’i Jerosalema sy i Joda ho an’ireo Israelita tafaverina avy any an-tsesitany mba hivory ao Jerosalema;

⁸ary na iza na iza tsy tonga anatin’ny telo andro, araka ny tenin’ireo lehibe sy loholona, dia horobaina ny fananany rehetra ary hesorina tsy ho anisan’ny fiangonana israelita izy.

⁹Nony afaka telo andro, izany hoe ny andro faharoapolon’ny volana fahasivy[68], dia vory tao Jerosalema ny lehilahy rehetra tamin’i Joda sy i Benjamîna; ary nipetraka teo an-kianjan’ny tranon’Andriamanitra ny vahoaka rehetra ka samy nangovitra noho izany toe-draharaha izany, ary koa noho ny ranonorana be.

¹⁰Dia nitsangana i Hezrà ka nanao taminy hoe: — Ry lehilahy israelita, efa nanao izay mahadiso tokoa ianareo satria naka vehivavy hafa firenena ho vadinareo ka nampitombo ny fahotan’ny firenentsika.

¹¹Koa samia ianareo miaiky heloka amin’ny TOMPO Andriamanitry ny razanareo sy manao ny sitrapony; ary misaraha amin’ny valovotaka mponin’ity tany ity sy amin’ny vehivavy hafa firenena nalainareo ho vady.

¹²Dia namaly ny olona rehetra tafangona teo ka niredona mafy hoe: — Marina ny anao! Izay lazainao dia tsy maintsy hataonay.

¹³Nefa maro izahay ary ny andro manorana ka tsy mahatoetra eto alatrano izahay; sady raharaha tsy vita indray andro na indroa andro aza izao; fa maro izahay no efa nanota tamin’izany zavatra izany.

¹⁴Koa aoka ny lehibentsika no hisolo toerana ny fiangonana manontolo; dia ny Israelita rehetra izay efa nanambady vehivavy hafa firenena no aoka hankatỳ amin’ny fotoanandro homena azy, miaraka amin’ny loholona sy mpitsara isan-tanànany avy. Hotontosainay mihitsy izany raharaha izany mandra-pialan’ilay fahatezeran’Andriamanitsika mirehitra amintsika.

¹⁵I Jônatàna zanakalahin’i Hasahela sy i Jahizeià zanakalahin’i Tikvà no hany nanohitra izany hevitra izany; ary niandany taminy koa i Mesolama sy ilay levita atao hoe Sabetahy.

¹⁶Fa ny Israelita hafa avy any an-tsesitany dia nanaraka izany avokoa. I Hezrà mpisorona kosa nifidy lehilahy izay loham-pianakaviana[69] araka ny tarika isany avy, sady samy voatonona anarana tsirairay; ka ireo lehilahy ireo no nipetraka handamina izany raharaha izany tamin’ny andro voalohan’ny volana fahafolo.

¹⁷Ka ny andro voalohany, tamin’ny volana voalohan’ny taona manaraka, vao vita lamina ny raharaha ny amin’ireo lehilahy rehetra naka vehivavy hafa firenena ho vady.

¹⁸Tamin’ireo taranaky ny mpisorona dia nisy naka vehivavy hafa firenena ho vady, ka ireto avy: tamin’ny taranak’i Jesoa mirahalahy avy, zanakalahin’i Jôtsadàka, dia ry i Mahaseià sy i Elihezera ary i Jariba sy i Gedalià;

¹⁹nametra-teny izy efa-dahy fa handroaka ny vadiny sy hanolotra ondrilahy iray avy ho sorona fanalana ny otany;

²⁰tamin’ny taranak’i Imera, dia ry i Hanany sy i Zebadià;

²¹tamin’ny taranak’i Harima, dia ry i Mahaseià sy i Elià mbamin’i Semahià sy i Jehiela ary i Hozià;

²²tamin’ny taranak’i Pasehora, dia ry i Eliôhenay sy i Mahaseià mbamin’i Jismahela sy i Netaneela ary i Jôzabada sy i Elehasa.

²³Tamin’ny levita dia ireto avy: ry i Jozabada sy i Simehy mbamin’i Kelaià (atao hoe koa Kelità) sy i Petahià ary i Jehodà sy i Elihezera.

²⁴Tamin’ny mpihira dia i Eliasiba. Tamin’ny mpiandry varavarana dia ry i Saloma sy i Telema ary i Ory.

²⁵Tamin’ny sarambabem-bahoaka israelita dia ireto avy: tamin’ny taranak’i Parehôsy dia ry i Ramià sy i Jizià ary i Malkià mbamin’ny Miamina sy i Elehazara ary i Malkià sy i Benaià;

²⁶tamin’ny taranak’i Helama dia ry i Matanià sy i Zakarià mbamin’i Jehiela sy i Habdy ary i Jeremôta sy i Elià;

²⁷tamin’ny taranak’i Zatò dia ry i Eliôhenay sy i Eliasiba mbamin’i Matanià sy i Jeremôta ary i Zabada sy i Hazizà;

²⁸tamin’ny taranak’i Bebay dia ry i Jôhanàna sy i Hananià ary i Zabay sy i Hatlay;

²⁹tamin’ny taranak’i Banỳ dia ry i Mesolama sy i Malòka mbamin’i Hadaià sy i Jasoba ary i Seala sy i Jeremôta;

³⁰tamin’ny taranak’i Pahata-Môaba dia ry i Hadnà sy i Kelala ary i Benaià sy i Mahaseià mbamin’i Matanià sy i Betsalela ary i Binoy sy i Manase;

³¹tamin’ny taranak’i Harîma dia ry i Elihezera sy i Jisià ary i Malkià sy i Semahià mbamin’i Simehôna

³²sy i Benjamîna ary i Malòka sy i Semarià;

³³tamin’ny taranak’i Hasoma dia ry i Matenay sy i Matatà ary i Zabada sy i Elifelety mbamin’i Jeremay sy i Manase ary i Simehỳ;

³⁴tamin’ny taranak’i Bony dia ry i Mahaday sy i Hamrama ary i Oela,

³⁵i Benaià sy i Bedià ary i Keloho,

³⁶i Vanià sy i Meromôta ary i Eliasiba,

³⁷i Matanià sy i Matenay ary i Jahasay,

³⁸i Banỳ sy i Binoy ary i Simehỳ,

³⁹i Selemià sy i Natàna ary i Hadaià,

⁴⁰i Maknadebay sy[70] i Sasay ary i Saray,

⁴¹i Hazarela sy i Selemià ary i Semarià,

⁴²mbamin’i Saloma sy i Amarià ary i Jôsefa;

⁴³tamin’ny taranak’i Nebao, dia ry i Jehiela sy i Matitià ary i Zabada sy i Zebinà mbamin’i Jadao sy i Jôela ary i Benaià.

⁴⁴Ireo lehilahy rehetra ireo no samy efa naka vehivavy hafa firenena ho vadiny, sady efa niteraka ny vehivavy sasantsasany tamin’ireny[71].