Read Dikateny Iombonana Eto Madagasikara Nehemià 3 Bible Online

Nehemià 3 - Dikateny Iombonana Eto Madagasikara bible

Nehemià 3

¹Dia nanomboka asa i Eliasiba mpisorombe mbamin’ireo mpisorona namany, ka niara-namboatra ny vavahadin’ny Ondry[14]; dia nanamasina izany ry zareo, vao nandatsaka ny lela-vavahadiny. Ary nohamasininy koa ny manda hatrany amin’ny tilikambon’ny Zatolahy sy ny tilikambo Hananela.

²Teo an-kilan’ireo, ny mponin’i Jerikao no namboatra ny manda, ary nanarakaraka ireto indray i Zakora zanakalahin’i Imry.

³Ny vavahadin’ny Trondro dia namboarin’ny terak’i Senaà: napetany ny sakamandimby, ary nalatsany ny lela-vavahady mbamin’ny hidiny sy barany.

⁴Teo an-kilan’ireo no namboatra ny manda i Meremôta zanakalahin’i Onà sy zafin’i Hakôtsa; nanarakaraka azy i Mesolama zanakalahin’i Besekià sy zafin’i Mesezabela; ary nanarakaraka io indray i Tsadôka zanakalahin’i Bahanà.

⁵Teo an-kilan’i Tsadôka dia namboatra koa ny mponin’i Tekôa, nefa ny loholony tsy nety hofehezin’ireo mpiandraikitra ny asa.

⁶Ny vavahadin’i Jesanà[15] dia namboarin’i Jôiadà, zanakalahin’i Pasea, sy i Mesolama, zanakalahin’i Besôdià: napetak’izy roa lahy ny sakamandimby ary nalatsany ny lela-vavahady mbamin’ny hidiny sy barany.

⁷Nanarakaraka ireo, dia i Melatià ilay Gibehônita sy i Jadôna ilay Merônôtita, mbamin’ny mponin’i Gibehôna sy ny mponin’i Mitsepà no namboatra ny manda hatreo akaikin’ny trano fonenan’ny governora[16] mpifehy ny faritra etỳ andafy andrefan’ny ony Eofrata.

⁸Teo an-kilan’ireo no namboatra koa i Hoziela, zanakalahin’i Harahaià sady isan’ny mpanefy volamena, ary nanarakaraka azy i Hananià isan’ny mpanao zava-manitra: tafapaka amin’ny manda malalaka ny asa nanamafisan’izy roa lahy an’i Jerosalema[17].

⁹Namboatra nanarakaraka azy i Refaià zanakalahin’i Hora sady komandin’ny antsasaky ny faritr’i Jerosalema.

¹⁰Nanarakaraka io, dia i Jedaià zanakalahin’i Haromafa no namboatra ny manda tandrifin’ny tranony; ary teo an-kilan’io, dia i Hatosy zanakalahin’i Hasabneià.

¹¹Ny laniny hafa amin’ny manda misy ny tilikambon’ny Fatana kosa dia namboarin’i Malkià, zanakalahin’i Harima, sy i Hasoba zanakalahin’i Pahata-Môaba.

¹²Nanarakaraka azy roa lahy, dia i Saloma zanakalahin’i Lôhesy sady komandin’ny antsasaky ny faritr’i Jerosalema, no namboatra niaraka tamin’ny zanany vavy.

¹³Ny vavahadin’ny Lohasaha dia namboarin’i Hanona sy ny mponin’i Zanôa: ireo no nandrafitra izany sy nandatsaka ny lela-vavahady mbamin’ny hidiny sy barany; ireo koa no namboatra ny manda dimanjato metatra tafapaka amin’ny vavahadin’ny Fanariam-pako[18].

¹⁴Ary ny vavahadin’ny Fanariam-pako dia namboarin’i Malkià zanakalahin’i Rekaba sady komandin’ny faritr’i Bety-Kerema: izy no nandrafitra izany sy nandatsaka ny lela-vavahadiny mbamin’ny hidiny sy barany.

¹⁵Ny vavahadin’ny Loharano[19] dia namboarin’i Salona zanakalahin’i Kôla-Hôze sady komandin’ny faritr’i Mitsepà: izy no nandrafitra ny nanafo izany ary nandatsaka ny lela-vavahadiny mbamin’ny hidiny sy barany; izy koa no namboatra ny manda manamorona ilay farihin’ny lakan-drano mankany amin’ny sahan’ny mpanjaka, ary tafapaka amin’ny ambaratonga midina avy any an-Tanànan’i Davida.

¹⁶Nanarakaraka an’i Saloma, dia i Nehemià, zanakalahin’i Hazboko sady komandin’ny antsasaky ny faritr’i Bety-Tsora, no namboatra ny manda ka tafapaka tandrifin’ireo fasan’i Davida sy ny dobo izay natao ary ny trano fonenan’ny miaramila maherifo.

¹⁷Nanarakaraka an’i Nehemià, dia namboatra koa ny levita notarihin’i Rehoma zanakalahin’i Banỳ; ary teo an-kilan’ireo i Hasabià, komandin’ny antsasaky ny faritr’i Kehilà, dia namboatra ny manda ho an’ny faritra feheziny.

¹⁸Nanarakaraka azy dia namboatra koa ny levita namany notarihin’i Binoy zanakalahin’i Henadada sady komandin’ny antsasaky ny faritr’i Kehilà;

¹⁹ary teo an-kilan’ireo, i Hezera, zanakalahin’i Jesoa sady komandin’i Mitsepà, dia namboatra laniny hafa amin’ny manda, tandrifin’ny fiakarana ho any amin’ny fitehirizam-piadiana eo amin’ny zoro.

²⁰Nanarakaraka azy dia i Baraka, zanakalahin’i Zabay, no nazoto namboatra laniny hafa manomboka eo amin’ny zoro ka miafara amin’ny varavaran’ny tranon’i Eliasiba mpisorombe;

²¹ary teo ankilan’io i Meremôta, zanakalahin’i Orià sy zafin’i Hakôtsa, dia namboatra laniny hafa manomboka eo amin’ny varavaran’ny tranon’i Eliasiba ka tafapaka amin’ny faran’ny tranon’i Eliasiba.

²²Nanarakaraka an’i Baròka, dia namboatra ny manda koa ny mpisorona avy amin’ny manodidina an’i Jerosalema.

²³Teo ankilan’ireo dia i Benjamîna sy i Hasoba no namboatra laniny tandrifin’ny tranony ihany; ary nanarakaraka azy dia nisy namboarin’i Hazarià zanakalahin’i Mahaseià sy zafin’i Hananià, ny teo anilan’ny tranony.

²⁴Nanarakaraka io, dia i Binoy zanakalahin’i Henadada kosa no namboatra ny laniny hafa manomboka eo amin’ny tranon’i Hazarià ka miafara amin’ny fiolahana eo an-jorony.

²⁵Teo an-kilan’i Binoy, dia namboatra koa i Palala zanakalahin’i Ozay manomboka eo amin’ny zoro ka miafara amin’ny tilikambo ambony eo alohan’ny tranon’ny mpanjaka sady eo akaikin’ny tokotanin’ny Fonja. Nanarakaraka azy dia i Pedaià, zanakalahin’i Parehôsy,

²⁶sy ireo mpanampy ny levita nitoetra tao Hôfela no namboatra laniny tafapaka amin’ny tilikambo mandroso, izany hoe eo atsinanan’ny Vavahadin-drano[20].

²⁷Nanarakaraka ireo, ny mponin’i Tekôa dia namboatra laniny hafa manomboka eo an-tandrifin’ny tilikambo lehibe mandroso ka miafara amin’ny mandan’i Hôfela.

²⁸Manomboka eo amin’ny vavahadin-tsoavaly, dia samy namboatra ny manda tandrifin’ny tranony avy ny mpisorona.

²⁹Teo ankilan’ireo dia namboatra ny laniny tandrifin’ny tranony koa i Tsadôka zanakalahin’i Imera; nanarakaraka azy dia i Semahià zanakalahin’i Sekanià sady mpiandry ny vavahady atsinanana no namboatra ny manda.

³⁰Nanarakaraka an’i Semahià, dia namboatra laniny hafa i Hananià, zanakalahin’i Selemià, sy i Hanona, fahenin’ny zanakalahin’i Tsalafa; nanarakaraka azy roa lahy, dia i Mesolama zanak’i Berekià no namboatra tandrifin’ny efitranony.

³¹Teo ankilan’io, i Malkià isan’ny mpanefy volamena dia namboatra laniny tafapaka amin’ny tranon’ireo mpanampy ny levita sy ny tranon’ireo mpivarotra, izany hoe eo anoloan’ny vavahady Mifikada, ka miafara amin’ny trano fitiliana teo amin’ny zoron’ny manda.

³²Ary ny mpanefy volamena sy ny mpivarotra no namboatra ny laniny teo anelanelan’ny trano fitiliana sy ny vavahadin’ny Ondry[21].

³³Rehefa ren’i Sanebalato fa amboarinay indray ny manda, dia tezitra sady nisafoaka mafy izy; nihomehy anay Jiosy koa izy[22]

³⁴sady niteny teo anatrehan’ny namany sy ny miaramilan’i Samaria hoe: — Inona no ataon’ireo Jiosy osa ireo? Afaka hanamafy ny manda ve ry zareo ka hanolotra sorona amin’Andriamanitra? Hahavita asa anio ihany ve ireo ka hahatsangana ny vato avy amin’ny lavenona miavosa?

³⁵I Tôbià, ilay Hamônita, dia teo anilan’i Sanebalato ka niteny hoe: — Na fosa iray aza no miakatra eo amin’ny manda atsangan’ireo, dia haharava izany!

³⁶Ary hoy aho hoe: «Mihainoa, ry Andriamanitray, fa atao tsinontsinona izahay; koa atsingereno aminy re ny latsa afitsony anay, ary aoka izy ho voatebaka any amin’ny tany izay hamaboana azy.

³⁷Aza avela ny helony ary aza vonoina tsy ho eo anatrehanao ny fahotany, satria Ianao efa notevatevainy teo anatrehan’ireo mpandrafitra.»

³⁸Dia narafitray ihany ny manda ka voatsangana manontolo hatreo amin’ny antsasaky ny haavony; fa nazoto niasa ny olona.