Read Dikateny Iombonana Eto Madagasikara Tôbita 8 Bible Online

Tôbita 8 - Dikateny Iombonana Eto Madagasikara bible

Tôbita 8

¹Rehefa vita ny sakafo, dia samy te hatory avy; ary nentina ilay tovolahy ka nampidirina tao amin’io efitrano voaomana io.

²Tamin’izay i Tôbià dia nahatsiaro ny tenin’i Rafaela, ka naka ny fo aman’atin-trondro tao an-kitapony ary nametraka azy teo ambony vainafo fandoroana ditin-kazo manitra.

³Izany lanin-trondro nidofaka izany no nampihemotra ilay demony; ary lasa izy nisidina teny amin’ny ambony teny ka nandositra tany amin’ny faritr’i Ejipta. Nenjehin’i Rafaela hatrany Ejipta kosa io demony io ary nosamboriny ka nafatony teo no ho eo.

⁴Dia namela an’i Tôbià tao an’efitrano i Ragoela mivady ary nanidy ny varavarana. I Tôbià kosa nitsangana niala teo am-parafara ka niteny tamin’i Sarà hoe: — Mitsangàna, ry vady malalako, fa hivavaka isika ary hitalaho amin’ilay Tompontsika mba hamindrany fo sy harovany.

⁵Dia nitsangana i Sarà; ary nanomboka nivavaka sy nitalaho izy roa mba harovan’ny Tompo. Ka hoy i Tôbià hoe: — Ankalazaina Ianao, ry Andriamanitry ny razanay; ankalazaina ny anaranao amin’ny taona rehetra ho avy. Hankalaza Anao anie ny lanitra sy ny voaary manontolo amin’ny taona rehetra!

⁶Ianao no nanao an’i Adama ary nanao mpanampy sy mpanohana ho azy, dia i Eva vadiny; ka izy roroa no nipoiran’ny taranak’olombelona. Ianao no nilaza hoe: Tsy tsara raha irery ny lehilahy, aoka izy hanaovantsika mpanampy mitovy endrika aminy[32]!

⁷Ankehitriny, Tompo ô, tsy faniriana no nahatonga ahy haka ity havako ity ho vady fa ny firaiketam-po aminao. Koa mba amindrao fo ny tenako sy ny tenany, ary omeo anay roa ny hiaraka ho tratra antitra.

⁸Dia indray nanampy izy mivady nanao hoe: — Amen! Amen!

⁹Avy eo dia natory izy roa tamin’iny alina iny.

¹⁰Taorian’izany i Ragoela no niarina sy niantso an’ireo lehilahy mpanompony, ka niara-nandeha taminy hihady fasana; satria hoy i Ragoela anakampony: «Raha maty ilay tovolahy, dia ho voaeso sy ho voatevateva izahay!»

¹¹Rehefa voahady ny fasana, dia niverina tao an-trano i Ragoela ary niantso ny vadiny

¹²sy nilaza taminy hoe: — Mba aniraho anankiray amin’ireo mpanompovavy hankao an’efitrano ka hijery raha mbola velona aina i Tôbià. Raha tàhiny kosa maty izy, dia ho azontsika atao ny handevina azy tsy hisy mpahalala.

¹³Dia nirahin’izy mivady ity mpanompovavy, ka nomeny jiro voarehitra ary novohany varavarana; dia niditra ny efitrano io mpanompovavy io ka nahita an’i Tôbià sy i Sarà miara-mandry sady renoky ny torimaso.

¹⁴Ka nivoaka ny efitrano izy ary nampandre an’i Ragoela mivady hoe: — Velona aina i Tôbià! Tsy nisy loza nihatra akory!

¹⁵Dia nankalaza an’ilay Andriamanitry ny lanitra i Ragoela ka nanao hoe: — Ankalazaina Ianao, Andriamanitra ô, ankalazain’ireo rehetra madio fo. Aoka izy hankalaza Anao amin’ny taona rehetra!

¹⁶Ankalazaina Ianao naneni-kafaliana ahy, satria tsy nihatra ny zavatra nahîko; araka ny haben’ny indrafonao no nataonao taminay.

¹⁷Eny, ankalazaina ianao namindrafo tamin’ireo zaza samy tokana ireo[33]. Tompo ô, indrafo sy famonjena no asehoy amin’izy roa hatrany; ary ny fiainany ataovy mizotra ombàm-pifaliana sy ombàm-piantrana!

¹⁸Avy eo dia nobaikoin’i Ragoela ireo lehilahy mpanompony hanototra ilay fasana nataony, alohan’ny hiposahan’ny masoandro.

¹⁹Ary nilazan’i Ragoela ny vadiny mba hanao mofo betsaka. Ny tenany kosa nandeha tany amin’ny andiam-biby fiompiny, ka naka omby roa sy ondrilahy efatra teo ary nampanamboatra azy handrahoina. Dia nanomboka ny fanomanan-danonana.

²⁰I Tôbià kosa nantsoin’i Ragoela ka nitenenany nombàm-pianianana[34] hoe: — Mandritra ny efatra ambin’ny folo andro, dia tsy hihetsika teto ianao fa hijanona ato an-tranoko mba hihinana sy hisotro. Hampifalianao fo indray ny zanako vavy, izay efa nianjadiam-pahoriana betsaka.

²¹Raiso dieny izao ny antsasa-pananako, ary hiverina soa aman-tsara any an-tranon-drainao ianao. Ny antsasany hafa kosa dia ho anareo roa, rehefa maty ny tenako sy ny vadiko. Mahereza, anaka, fa ray ho anao ny tenako ary reny ho anao i Ednà. Miraiki-po aminao sy amin’ny vadinao izahay, dieny izao ka ho mandrakizay. Mahereza, anaka!