Read Dikateny Iombonana Eto Madagasikara Jodita 1 Bible Online

Jodita 1 - Dikateny Iombonana Eto Madagasikara bible

Jodita 1

¹Efa roa ambin’ny folo taona tamin’izay no nanjakan’i Nebokadnetsara, mpanjakan’ny Asirianina, tao Ninive ilay tanàna lehibe. Tamin’izany andro izany koa i Arfaksada no efa nanjaka tamin’ny Medianina, tao Ekbatàna renivohitra.

²Nanodidina an’i Ekbatàna dia nampanorenan’i Arfaksada manda tamin’ny vato vaventy voapaika efa-joro, dia vato mirefy telo metatra ny lavany ary iray metatra sy sasany ny sakany. Io manda io kosa dia nirefy dimy amby telopolo metatra ny haavony ary dimy amby roapolo metatra ny sakany.

³Teo akaikin’ny vavahadin’ny tanàna dia nampananganany tilikambo izay nahatratra dimampolo metatra ny haavony ary telopolo metatra ny hatevin’ny fanorenany.

⁴Ireo vavahady ireo kosa nahatratra dimy amby telopolo metatra ny haavony ary roapolo metatra ny sakany, satria nokendrena handalovan’ireo tafika matanjaka sy ireo antoko miaramila an-tongotra.

⁵Tamin’izany taona faharoa ambin’ny folo nanjakany izany àry i Nebokadnetsara no niady tamin’io Arfaksada mpanjaka io, teo amin’ny tany lemaka anatin’ny faritr’i Ragao.

⁶Ny mponina rehetra tany an-tendrombohitra sy ny mponina rehetra teo amoron’ny ony Eofrata sy Tigra ary Hidaspa dia nitambatra tamin’i Nebokadnetsara; nomba azy koa ny mponina teo an-tany lemaka sy nofehezin’i Ariôka mpanjakan’i Elimaîda[1]. Tafika avy amin’ny firenena maro no vory hiandany amin’ny Babilônianina[2].

⁷I Nebokadnetsara, mpanjakan’i Asiria, dia nandefa iraka hatraiza hatraiza: na tany amin’ny mponina rehetra any Persia; na tany amin’ny mponina rehetra teo amin’ny faritra andrefana, izany hoe tao Silisia sy Damasy ary Libàno sy Antilibàno ka hatrany amin’ny morontsiraky ny Ranomasina Mediteranea;

⁸na tany amin’ny vahoaka teo amin’ny tendrombohitra Karmela sy tao amin’ny faritr’i Gilehada ary tao Galilea ampatrana sy tao Jizrehela izay lemaka midadasika;

⁹na tany amin’ireo tanànan’i Samaria sy ny faritra ampita atsinanan’i Jôrdàna ka hatrany Jerosalema sy Batanea ary Kelosy sy Kadesa. Nandefasan’i Nebokadnetsara iraka koa hatrany amin’ny lohasahan-driakan’i Ejipta sy hatrany Tapanesa sy Ramsesa ary hatrany amin’ny faritr’i Gôsena manontolo;

¹⁰nandefasany koa aza hatrany ankoatran’i Tanisa sy i Memfisa, tany amin’ireo olona hafa rehetra mponin’i Ejipta, ary hatrany amin’ny sisintanin’i Etiôpia.

¹¹Kanefa ny mponina rehetra tamin’ireo faritra isan-tokony ireo dia tsy niraharaha ny hafatra nalefan’i Nebokadnetsara, mpanjakan’i Asiria, ka tsy mba nivory hiady miaraka aminy; tsy natahorany manko i Nebokadnetsara izay toy ny olona tsotra fotsiny ihany teo imasony. Koa nitondra tanam-polo sy rakotry ny henatra ireo iraky ny mpanjaka ireo, rehefa niverina.

¹²Nisafoaky ny hatezerana tamin’ireo faritra isan-tokony ireo kosa i Nebokadnetsara; ka ny sezafiandrianany sy ny fahefana maha mpanjaka azy no antoka nianianany fa hamaly ratsy ny olona rehetra amin’ny faritr’i Silisia sy i Damasy ary Siria izy, sady hamono hahafaty ny mponina rehetra amin’ny faritr’i Môaba sy i Hamôna[3] ary koa i Jodea manontolo mbamin’ny mponina rehetra any Ejipta na ny eo amoron’ny Ranomasina Mediteranea na ny eo amoron’ny Ranomasina Mena.

¹³Tamin’ny taona fahafito ambin’ny folo nanjakany koa i Nebokadnetsara dia nandahatra ny tafiny hiady amin’i Arfaksada, ka nandresy azy ary nampandositra ny tafik’io Arfaksada io mbamin’ny mpitaingin-tsoavaliny sy ny kalesiny rehetra;

¹⁴dia nalain’i Nebokadnetsara ireo tanànany, ary tafapaka tao Ekbatàna izy ka nahazo ny tilikambony sy nandroba ny kianjany ary nandrava izany tanàna kanto izany.

¹⁵Tany an-tendrombohitr’i Ragao no nisamboran’i Nebokadnetsara an’i Arfaksada, ka notsatotsatohany lefom-pohy izy ary nataony fongotra teo tsy hisy intsony.

¹⁶Dia niverina tany Ninive i Nebokadnetsara niaraka tamin’ny tafiny manontolo nisy miaramila mpiady tsy tambo isaina; ary indray nijanona teo izy rehetra ka niala sasatra sy nanao lanonana nandritra ny dimy amby roapolo amby zato andro.