Read Dikateny Iombonana Eto Madagasikara Jodita 2 Bible Online

Jodita 2 - Dikateny Iombonana Eto Madagasikara bible

Jodita 2

¹Tamin’ny taona fahavalo ambin’ny folo nanjakan’i Nebokadnetsara, mpanjakan’i Asiria, fony andro faharoa amby roapolo tamin’ny volana voalohany, no niadian-kevitra tao an-dapa ny amin’ny valifaty izay efa nianianan’ny mpanjaka hafitsoka amin’ireo vahoaka rehetra nikomy.

²Dia nantsoin’i Nebokadnetsara hivory ny minisitra rehetra sy ny loholona rehetra; ary nanaovany fiaraha-midinika ireo, ka vavany mihitsy no namoaka ny fanapahan-kevitra momba ny sazy isan-karazany hafitsoka amin’ny tanin’iretsy vahoaka nikomy.

³Nankatoavin’ireto mpanolotsaina azy fa tokony hofongorana avokoa ny olona rehetra izay nitsipaka ny baiko navoakan’i Nebokadnetsara.

⁴Rehefa vita ny fiaraha-midinika, dia nantsoin’i Nebokadnetsara i Hôlôferna, izay filohan’ireo komandin-tafika sady olona faharoa eo amin’ny fanjakana, ka nilazany hoe:

⁵— Izaho ilay mpanjaka lehibe, mpifehy ny taniko manontolo, no milaza ireto teny ireto: Ndeha ianao maka ireo miaramila azo antoka ho matanjaka; dia ataovy tsy latsaky ny antokony roapolo amby zato ireo miaramila an-tongotra ary tsy latsaky ny antokony roa ambin’ny folo ireo mpitaingin-tsoavaly.

⁶Avy eo hiainga ianao hamely an’ireo tany rehetra any andrefan’i Eofrata, izay tsy nanaiky ny baiko navoakako;

⁷ary hotakînao amin’ireo vahoaka ny tolotra tany sy rano ho mariky ny fanoavany ahy. Ampahafantaro azy fa mirehi-katezerana aho ka mandefa izao tafika izao hamely azy. Hanenika ny vohon-taniny manontolo ny miaramilako ka avelako handroba azy.

⁸Ireo olona voaratra dia hameno ny hantsana; ka ny lohasahan-driaka sy ny ony dia ho tototra faty hihoatra ny morony.

⁹Ireo babo kosa hasaiko hoentina any am-paran’ny tany.

¹⁰Hotazoninao amin’ny anarako ny faritaniny rehetra.

¹¹Ka rehefa nilavo lefona izy, dia hambenanao ho an’ny andro hitsarana azy; ireo mbola hanohitra ihany, eo amin’ny tany isan-tokony efa azonao, dia tsy hanananao antra fa ampamonoy ho faty ary asaovy robaim-pananana.

¹²Ny aiko sy ny fahefana maha mpanjaka ahy no nianianako fa hampihatra hery aho hanatanterahako izany.

¹³Ianao kosa, ry Hôlôferna, aza misy dikainao ireo baiko nomeko anao ireo na iray aza; fa tanteraho antsakany sy andavany sady tsy misy hataka andro; araka ny nandidiako anao.

¹⁴Dia niala teo anatrehan’ny mpanjaka i Hôlôferna, ary niantso ireo andriana mbamin’ireo komandy sy manamboninahitry ny tafika asirianina.

¹⁵Araka ny nandidian’ny mpanjaka azy, dia namory miaramila voafantina hiantafika izy, ka nisy antokony roapolo amby zato ireo miaramila an-tongotra ary antokony roa ambin’ny folo ireo mpitaingin-tsoavaly.

¹⁶Dia nalahatr’i Hôlôferna ireo ka voarindra ho tahaka ny tafika goavana efa hiady.

¹⁷Naka rameva sy boriky ary mole marobe io filoha io mba hitondra entana; naka ondry aman’osy ary omby tsy tambo isaina koa izy mba ho tohan’aina ara-tsakafo.

¹⁸Teo ny vatsy ho an’ny miaramila tsirairay avy; teo koa ny volafotsy amam-bolamena betsaka hanaramana azy.

¹⁹Dia niainga i Hôlôferna mbamin’ny tafiny manontolo hialoha an’i Nebokadnetsara mpanjaka sy handrakotra ny vohon-tany, ao andrefana ao, amin’ny kalesy sy ny mpitaingin-tsoavaly ary ny miaramila an-tongotra izay voafantina.

²⁰Nisy mpiantafika hafa niaraka taminy, ka tsy tambo isaina toy ny valala na toy ny fasika any an-taniefitra ireo[4].

²¹Niala tao Ninive izy rehetra ireo, ka telo andro ihany dia tonga tao amin’ny lemak’i Bektileta, ary avy teo dia lasa nitoby akaikin’ny tendrombohitra avaratr’i Silisia am-patrana.

²²Tamin’izay no nentin’i Hôlôferna ny tafiny manontolo, na miaramila an-tongotra na mpitaingin-tsoavaly na kalesy, ka nihanaka tany amin’ny faritra be tendrombohitra.

²³Nataony resy i Pota sy i Loda, ary norobainy avokoa ireo taranak’i Rasy na ireo taranak’i Jismahela izay samy niorim-ponenana teo akaikin’ny taniefitra, tao atsimon’i Keleôna.

²⁴Avy eo nita ny ony Eofrata i Hôlôferna, dia namakivaky an’i Mezôpôtamia sy nandrava ny tanàna mimanda rehetra teny amoron’ny ranon-driaka Habrôna ary tafapaka hatrany amin’ny Ranomasina Mediteranea.

²⁵Voatanany koa ny faritr’i Silisia ka nofongorany avokoa ny mpanohitra; ary nianatsimo izy ka tafapaka hatrany amin’ny faritanin’i Jafeta, izay mifanila amin’i Arabia.

²⁶Voahodidin’i Hôlôferna ny Midianita[5] rehetra, nodorany ny tobim-pilasiany ary nataony babo ny biby fiompiny.

²⁷Tamin’ny fotoana fijinjam-bary no namakivakiany ny lemak’i Damasy, ka nodorany avokoa ny vokatra, nataony ringana ny biby fiompy na omby na ondry aman’osy, norobainy ny tanàna, nosimbany ny saha, ary nofongoriny tamim-tsabatra ny zatovo rehetra.

²⁸Tahotra sy horohoro no nianjady tamin’ny mponina rehetra amoron-tsiraka, dia izay nonina tao Tsidôna sy Tiro mbamin’izay tao Soro sy Okinà ary Jamnià. Raiki-tahotra mafy koa ny mponin’i Azôta sy i Askelôna.