Read Dikateny Iombonana Eto Madagasikara Jodita 3 Bible Online

Jodita 3 - Dikateny Iombonana Eto Madagasikara bible

Jodita 3

¹Nandefa iraka ho any amin’i Hôlôferna ireo mponina amoron-tsiraka ireo mba hitondra tenim-pihavanana manao hoe:

²— Indreto izahay mpanompon’i Nebokadnetsara mpanjaka lehibe fa tonga manatrika anao. Ataovy izay tianao hatao aminay.

³Ny toby fambolenay sy fiompianay, ny sahanay, ny tanimbarinay, ny omby sy ondry aman’osinay ary ny tanimbilona rehetra anananay dia samy azonao anaranam-po. Ataovy izay hataonao aminy.

⁴Anao ny tanànanay, ary mpanomponao ny mponina ao aminy. Tongava amin’ireo tanànanay ireo araka izay sitrakao.

⁵Tonga teo anatrehan’i Hôlôferna ireo iraka ireo ka niteny taminy araka ireo tenim-pihavanana ireo.

⁶Tamin’izay no nandroso nanaraka ny morontsiraka i Hôlôferna sy ny tafiny. Nametrahany miaramila mpiambina ireo tanàna mimanda ary narotsany ho anisan’ny mpiantafika miaraka aminy kosa ireo vatan-dehilahy voafantina.

⁷Manerana izany faritany izany, dia olona miravaka fehiloha sy mandihy ombàn’ampongatapaka[6] no nandray azy.

⁸Nandrava ny trano fivavahana[7] i Hôlôferna sady nanapatapaka ny hazomasina. Baiko nomena azy manko ny hamongotra ny andriamanitra rehetra eran’ny tany noteteziny, hany ka hitsaoka an’i Nebokadnetsara irery ihany ny firenena rehetra, ary hiantso azy ho andriamanitra[8] ny fiteny sy ny foko rehetra.

⁹Avy eo i Hôlôferna dia tonga teo anoloan’i Jizrehela[9], tao akaikin’i Dôtàna izay manatrika ny tandavan-tendrombohitr’i Jodea.

¹⁰Niorin-toby teo anelanelan’i Gebà sy i Sitôpôly[10] izy, ka nijanona iray volana teo mba hanangona ny vatsy rehetra ilain’ny tafiny.