Read Dikateny Iombonana Eto Madagasikara Estera 7 Bible Online

Estera 7 - Dikateny Iombonana Eto Madagasikara bible

Estera 7

¹Dia lasa ny amperôra sy i Hamàna nankany amin’i Estera mpanjakavavy, ho ao amin’ilay fanasana faharoa.

²Ary teo am-pamaranana ny sakafo, dia hoy indray ny amperôra tamin’i Estera: — Inona no angatahinao sy tadiavinao? Fa na dia hatramin’ny antsasaky ny fanjakako aza, dia homeko anao izany ary ho azonao tokoa.

³Dia namaly i Estera mpanjakavavy ka nanao hoe: — Ry andriamanjaka, raha mba mahazo fitia eo imasonao ary raha sitrakao izao, dia aoka hotsimbininao aina ny tenako sy ny mpiray firenena amiko fa izany no angatahiko sy tadiaviko.

⁴Namidy manko ny tenako sy ny mpiray firenena amiko mba haringana sy hovonoina ho ripaka; fa raha tàhiny namidy handevozina fotsiny izahay, dia ho nangina ihany aho satria tsy tokony hanahiranana anao izany fampahoriana izany[25].

⁵Dia nanontany an’i Estera mpanjakavavy ny amperôra Kserksesa nanao hoe: — Iza moa ilay olona mikasa hanao izany ary aiza no misy azy?

⁶Ka novalian’i Estera hoe: — Io Hamàna ratsy fanahy io no fahavalonay sy mpankahala anay! Dia raiki-tahotra teo anatrehan’ny amperôra sy ny mpanjakavavy i Hamàna.

⁷Ary tezitra mafy ny amperôra, dia niala teo amin’ny fanasana ho eny amin’ny zaridainan’ny lapa. I Hamàna kosa nahatsapa fa misy loza hamelezan’ny amperôra azy ka nijanona nangataka tamin’i Estera mpanjakavavy izy mba hotsimbinina ny ainy;

⁸ary niankohoka teo am-parafaran’i Estera mihitsy aza i Hamàna. Tamin’izay indrindra ny amperôra no niverina avy teo an-jaridaina ho ao an’efitrano fanasana ka vaky vava hoe: — Dia sahin’ilehio koa ve ny misavika ny mpanjakavavy, eto anatrehako, ato an-dapako? Vantany vao niloa-bava ireo teny ireo ny amperôra, dia nisy mpanompony nanarona ny tavan’i Hamàna[26].

⁹Fa i Harbonà, anisan’ireo tandapa, dia nilaza tamin’ny amperôra hoe: — Ry andriamanjaka, i Hamàna dia efa nampanamboatra hazo hanantonany an’i Môrdôkay, ilay nanao tatitra hanasoavana anao[27]. Indro miorina eo akaikin’ny tranon’i Hamàna io hazo io, ka 25 metatra ny haavony. Dia hoy ny amperôra hoe: — Ahantony amin’io i Hamàna!

¹⁰Ary nahantona tamin’ilay hazo efa nomaniny hanantonana an’i Môrdôkay i Hamàna. Dia vao izay no nionona ny fahatezeran’ny amperôra.