Read Dikateny Iombonana Eto Madagasikara Eksôdy 1 Bible Online

Eksôdy 1 - Dikateny Iombonana Eto Madagasikara bible

Eksôdy 1

¹Ireto no anaran’ireo zanakalahin’i Jakôba na Israely[2] tonga tany Ejipta niaraka tamin’ny rainy, samy nombàm-bady aman-janaka:

²Reobèna, Simehôna, Levỳ, Joda,

³Jisakara, Zebolòna, Benjamîna,

⁴Dana, Naftalỳ, Gada ary Asera.

⁵Miisa fitopolo[3] izy rehetra taranak’i Jakôba, fa i Jôsefa dia efa tany Ejipta rahateo.

⁶Tatỳ aoriana dia maty i Jôsefa sy ireo rahalahiny ary ny taranaka indray nihira taminy.

⁷Taorian’izany dia niteraka betsaka ny Israelita ka nihamaro fatratra sady nihanahery tokoa ka nameno ny tany[4].

⁸Mpanjaka vaovao[5] kosa no nanomboka nanjaka tany Ejipta tamin’izay ka tsy nahalala an’i Jôsefa.

⁹Hoy izy tamin’ny vahoakany: — Jereonareo fa betsaka ny vahoaka israelita sady mahery noho isika.

¹⁰Koa tsy maintsy itadiavana tetika hamerana ny isany. Rehefa misy ady manko, dia homba ireo fahavalontsika izy ka hiady amintsika ary hiala ny tany[6].

¹¹Dia nanendry lehiben’ny asa fanompoana ny Ejiptianina mba hampikoy ny Israelita amin’ny asa mafy. Koa nanangana ny tanàna Pitôma sy Rahamsesa ny Israelita mba ho fitahirizam-bokatra ho an’ny Farao[7].

¹²Kanefa arakaraka ny namoretana azy no vao mainka nitomboany sy nahazoany vahana ka natahoran’ny Ejiptianina azy.

¹³Nampanompoin’ny Ejiptianina mafy tokoa ny Israelita

¹⁴sady nataony nangidy ny fiainany tamin’ny fanompoana mafy: dia ny mandona tanimanga sy manao biriky ary manao ny asa any an-tsaha rehetra. Izany hoe ny asa fanompoana isan-karazany no nanereny azy mafy tokoa.

¹⁵Nisy mpampivelona hebreo anankiroa nantsoina hoe Sifrà sy Pohà. Nandidy azy ireo ny mpanjakan’i Ejipta,

¹⁶ka nanao hoe: — Rehefa mampiteraka ny vehivavy hebreo ianareo, dia jereo ny zaza vao teraka; ka raha zazalahy dia vonoy ho faty, fa raha zazavavy kosa dia velomy.

¹⁷Natahotra an’Andriamanitra anefa ireo mpampivelona ireo ka tsy nanao araka izay nodidian’ny mpanjakan’i Ejipta, fa namela ireo zazalahy ho velona.

¹⁸Koa nampanantsoin’ny mpanjaka ireo mpampivelona ka nanontaniany hoe: — Nahoana no nanao izany zavatra izany ianareo, ka namela ireo zazalahy ho velona?

¹⁹Fa namaly ireo mpampivelona hoe: — Tsy mba tahaka ny vehivavy ejiptianina ireo vehivavy hebreo fa matanjaka; koa raha tsy mbola tonga akory ny mpampivelona, dia efa teraka izy.

²⁰Noho izany, dia nihamaro hatrany hatrany ireo Israelita sady nihanahery tokoa. Nasian’Andriamanitra soa ireo mpampivelona,

²¹ka nomeny fara aman-dimby satria natahotra Azy.

²²Fa ny Farao kosa dia nandidy ny vahoakany rehetra ka nanao hoe[8]: — Atsipazo ao amin’ny ony Neily ny zazalahy hebreo rehetra raha vao teraka, fa ny zazavavy kosa avelao ho velona.