Read Dikateny Iombonana Eto Madagasikara Eksôdy 16 Bible Online

Eksôdy 16 - Dikateny Iombonana Eto Madagasikara bible

Eksôdy 16

¹Niala tao Elima[82] ny vahoaka Israelita manontolo, ka tonga tao amin’ny taniefitra Sina, eo anelanelan’i Elima sy ny tendrombohitra Sinay, tamin’ny volana faharoa, andro faha-15 taorian’ny nialany tany Ejipta.

²Nimonomonona tamin’i Mosesy sy i Aharôna tany an-taniefitra ny fiangonana Israelita tsivakivolo,

³ka nanao taminy hoe: — Inay anie izahay mba novonoin’ny Tompo ho faty tany Ejipta, fony izahay nanodidina ny vilanin-kena iny, ka nihinana araka izay lany! Fa izao dia nentinareo ho faty noana atỳ an-taniefitra atỳ izahay rehetra!

⁴Ary hoy ny TOMPO tamin’i Mosesy: — Handatsaka mofo avy any an-danitra ho anareo Aho. Hivoaka hanangona izay sahaza azy isan’andro ny Israelita mba hizahako toetra anareo na handeha araka ny lalànako ianareo na tsia[83].

⁵Fa amin’ny andro fahenina rehefa hanomana izay hoentinareo ianareo, dia hahita indroa heny[84] noho izay fanangonareo isan’andro.

⁶Ary i Mosesy sy i Aharôna dia niteny tamin’ny Israelita hoe: — Anio hariva ny TOMPO dia hanome hena hohaninareo, satria henony tokoa ny fimonomononanareo taminy; izany no hahafantaranareo fa Izy TOMPO no namoaka anareo tany Ejipta. Ary rahampitso maraina dia hanome mofo hahavoky anareo Izy, ka izany no hahitanareo ny voninahiny. Ny aminay kosa, inona moa izahay no imonomononanareo? Raha manao izany manko ianareo, dia tsy izahay no imonomononanareo fa ny TOMPO.

⁹Avy eo dia nanome baiko an’i Aharôna i Mosesy hoe: — Ilazao avokoa ny vahoaka Israely mba ho tonga hiseho eo anatrehan’ny TOMPO, satria efa reny ny fimonomononan’izy ireo.

¹⁰Raha mbola niteny tamin’ny vahoaka Israelita manontolo i Aharôna, dia nitodika nanatrika ny taniefitra izy ireo, ka ny voninahitry ny TOMPO no hitany niseho teo amin’ny rahona[85].

¹¹Ary hoy ny TOMPO tamin’i Mosesy:

¹²— Reko ny fimonomononan’ny Israelita. Ilazao izy ireo hoe: Anio hariva dia hihinan-kena ianareo, ary rahampitso maraina dia ho voky mofo ianareo; amin’izay dia ho fantatrareo fa Izaho no TOMPO Andriamanitrareo.

¹³Nony hariva, dia tonga tokoa ny papelika ka nipetraka teny amin’ny toby; ary nony maraina, dia nisy ando matevina manodidina ny toby.

¹⁴Rehefa nisava ny ando dia indro nisy zavatra mivaingana nijanona teny an-taniefitra, boriborikely toy ny fanala nifafy tamin’ny tany.

¹⁵Hitan’ny Israelita ireny nefa tsy fantany, ka nifanontany izy hoe: — Inona itony? Fa novalian’i Mosesy hoe: — Itony no mofo izay nomen’ny TOMPO hohaninareo[86].

¹⁶Ary izao no zavatra nandidian’ny TOMPO anareo: «Samia manangona izay tokony ho sahaza azy avy; manangòna ankevitry ny inefatry ny zingan-drano isan’olona, araka ny isan’ny olona miara-belona ao amin’ny isan-dainy avy.»

¹⁷Notanterahin’ny Israelita izany, ka nisy nanangona betsaka, ary nisy kosa nanangona kely.

¹⁸kanefa rehefa nafatra tamin’ny famarana, dia tsy nanana tombony ireo nanangona be, ary tsy nanana ny tsy ampy ireo nanangona kely, fa samy nahazo ny sahaza hohaniny avy ny tsirairay[87].

¹⁹Dia hoy i Mosesy tamin’ny Israelita: — Aoka tsy hisy olona hamela sisa ho tra-maraina.

²⁰Nisy ihany anefa olona tsy nankatò an’i Mosesy ka namela sisa ho tra-maraina, saingy nivoaka olitra ireny ka maimbo; koa tezitra tamin’ireo i Mosesy.

²¹Hatreo dia nanangona izay sahaza hohaniny avy isa-maraina ny olona; ary rehefa nafana ny andro dia nitsonika ireny.

²²Tamin’ny andro fahenina dia sakafo indroa heny no nangonin’ny olona, izany hoe imbalon’ny zingan-drano isan’olona. Dia lasa nanao tatitra tamin’i Mosesy ireo mpitarika ny vahoaka,

²³ka hoy i Mosesy hoe: — Izany indrindra no nandidian’ny TOMPO anareo. Rahampitso dia sabata, andro fitsaharana voatokana ho an’ny TOMPO; koa andrahoy izay tokony handrahoina, ary ampangotrahy izay tokony hampangotrahina, fa ny ambiny kosa dia tehirizo ho tra-maraina[88].

²⁴Dia navahan’izy ireo hotahirizina mandra-maraina ny ambiny araka izay nodidian’i Mosesy, nefa tsy maimbo na feno olitra.

²⁵Ary hoy i Mosesy taminy: — Hano izany anio, fa sabata ho an’ny TOMPO anio, ka tsy hahita an’ireny eny an-tsaha ianareo androany.

²⁶Andro enina no ahazoanareo manangona sakafo; fa amin’ny andro fahafito, andro sabata, dia tsy hisy.

²⁷Tamin’ny andro fahafito anefa dia mbola nisy ihany Israelita sasany nivoaka ny toby mba hanangona, fa tsy nahita na inona na inona.

²⁸Ka hoy ny TOMPO tamin’i Mosesy: — Mandra-pahoviana no handavanareo tsy hitandrina ny didiko sy ny lalànako?

²⁹Fantaro tsara fa ny nanomezako anareo ny sabata dia ny mba hitsaharanareo. Izany no antony anomezako mofo sahaza ny indroa andro amin’ny andro fahenina; ka amin’ny andro fahafito dia samia mitoetra ao an-tranony avy, fa aoka tsy hisy olona hiala tao.

³⁰Dia nitsahatra ny vahoaka Israelita tamin’ny andro fahafito.

³¹Nataon’ny Israelita hoe mana ny anaran’izany[89] sakafo izany. Mitovy amin’ny voarafy izy sady fotsy, ary tahaka ny mofo misy tantely ny tsirony.

³²Hoy i Mosesy tamin’ny Israelita: — Izao no zavatra nandidian’ny TOMPO: «Fenoy mana ny vata hômera iray mba hotehirizina ho an’ny taranakareo. Amin’izay dia mba ho hitany ny mofo izay nomeko hohaninareo tany an-taniefitra fony Aho namoaka anareo hiala tany Ejipta.»

³³Dia hoy i Mosesy tamin’i Aharôna: — Makà siny tany ka asio mana inefatry ny zingan-drano, dia apetraho eo anatrehan’ny TOMPO mba hotahirizina ho an’ny taranakareo[90].

³⁴Araka izay nandidian’ny TOMPO an’i Mosesy dia teo anoloan’ny Raki-tsoratry ny fanekempihavanana no napetrak’i Aharôna ilay siny tany misy mana mba hotahirizina.

³⁵Nandritra ny efapolo taona no nihinanan’ny Israelita ny mana, ambara-pahatongany tany amin’ny tany misy mponina, izany hoe mandra-pidirany teo amin’ny sisin-tanin’i Kanahàna[91].

³⁶Ny fatran’ny mana fanangona dia efatra zingan-drano eo ho eo, izany hoe ampahafolon’ny famarana mahazatra.