Read Dikateny Iombonana Eto Madagasikara Eksôdy 2 Bible Online

Eksôdy 2 - Dikateny Iombonana Eto Madagasikara bible

Eksôdy 2

¹Nisy lehilahy iray, anisan’ny fokon’i Levỳ, nandeha naka vady tao amin’ny mpiray foko aminy.

²Bevohòka ravehivavy ka niteraka zazalahy. Hitany fa tsara tarehy ilay zazalahy ka nafeniny nandritra ny telo volana[9].

³Taorian’izany, rehefa tsy afa-nanafina azy intsony izy, dia naka sobika zozoro[10] izay nohosorany dity mineraly sy ditin-kazo, dia napetrany tao ny zaza; ary tao anatin’izany sobika izany no nanaterany azy teny amoron’i Neily teo anivon’ny bararata.

⁴Nijanona lavidavitra ny anabaviny mba hijery izay hanjo azy.

⁵Taoriana kely dia nidina tao amin’i Neily mba handro ny zazavavin’ny Farao, ary ireo mpanotrona azy kosa nitsangantsangana teny amoron’ny ony. Nahatazana ilay sobika teo anivon’ny bararata izy ka naniraka ny mpanompovaviny iray haka azy.

⁶Nosokafan’ny andriambavy ilay sobika, ka intỳ hitany tao zazalahy kely mitomany; ary onena azy izy ka niantso hoe: — Zanaka Hebreo ity!

⁷Fa niteny tamin’ny zanakavavin’ny Farao kosa ilay anabaviny nanao hoe: — Handeha hiantso vehivavy mpitaiza ho anao amin’ny vehivavy hebreo ve aho mba hitaiza ny zaza ho anao?

⁸Dia novalian’ny andriambavy hoe: — Mandehana àry! Dia nandeha razazavavy ka ny renin’ilay zazalahy ihany no nantsoiny.

⁹Ary hoy ity andriambavy tamin-dravehivavy: — Ento ity zaza ity, ka tezao ho ahy fa izaho no hanome ny karamanao. Dia nalain-dravehivavy ny zaza ka notezainy.

¹⁰Ary rehefa lehibe ny zaza, dia nentiny tany amin’ny zanakavavin’ny Farao, ka nanjary zanany. Dia hoy ity andriambavy hoe: — Antsoiko hoe Mosesy izy satria avy tamin’ny rano nisarihako azy[11].

¹¹Indray andro, nony efa lehibe i Mosesy, dia niainga nankany amin’ireo mpiray firenena aminy ka nahita azy tao anatin’ny fanompoana mafy. Hitany fa nisy lehilahy ejiptianina iray nikapoka Hebreo iray isan’ny mpiray firenena aminy.

¹²Nijerijery manodidina i Mosesy ka hitany fa tsy nisy olona; dia novonoiny ho faty ilay Ejiptianina ary nasitriny tao anaty fasika.

¹³Nony ampitso dia nivoaka indray izy ary nahita Hebreo roalahy niady, ka nanao tamin’ilay diso hoe: — Nahoana no mikapoka ny mpiray firenena aminao ianao?

¹⁴Fa novaliany hoe: — Iza no nanendry anao ho lehibe hitsara ny adinay? Sa tadiavinao hovonoina ho faty toy ny namonoanao an’ilay Ejiptianina aho? Fantatr’i Mosesy tamin’izany fa nisy nahalala ilay raharaha ka raiki-tahotra izy.

¹⁵Henon’ny Farao tokoa izany, koa notadiaviny hovonoina ho faty i Mosesy. Dia nandositra lavitry ny Farao i Mosesy, ka lasa nialokaloka tany amin’ny tany Midiana, ary nipetraka teo anilan’ny fantsakana[12].

¹⁶Nanan-janaka fito mirahavavy ny mpisorona Jetrao[13] tao Midiana. Tonga hantsaka rano ireo ary hameno ny tavin-drano mba hampisotroana ny ondry aman’osin-drainy.

¹⁷Fa tonga ireo lehilahy mpiandry ondry ka nandroaka ireto zazavavy; dia nitsangana i Mosesy ka namonjy ireto zazavavy sady nampisotro ny biby fiompy.

¹⁸Nody tany amin’i Rehoela rainy izy fito mirahavavy, ka nanontaniany hoe: — Nahoana no nalaky nody ianareo androany?

¹⁹Dia novaliany hoe: — Nisy lehilahy ejiptianina iray niaro anay tamin’ny tanan’ny mpiandry ondry sady nanovo rano ho anay ka nampisotro ny biby fiompintsika.

²⁰Ary hoy i Rehoela tamin’ny zanany vavy: — Aiza anefa izany lehilahy izany? Nahoana izy no nilaozanareo any? Ndeha alao izy mba hiara-misakafo amintsika.

²¹Nanaiky hipetraka tao amin’i Rehoela io i Mosesy. Nomen’ilay rangahy ho vadin’i Mosesy i Tsipôrà zanany vavy.

²²Niteraka zazalahy ilay ramatoa ka hoy i Mosesy hoe: — Antsoiko hoe Gersôma ity zaza ity satria efa lasa mpitsoa-ponenana atỳ an-tany hafa aho.

²³Tatỳ aoriana ela dia maty ny mpanjakan’i Ejipta. Nitoloko ny Israelita noho ny fanompoany ka niantso vonjy; ary tafakatra hatrany amin’Andriamanitra ny fitarainany noho ny fanompoana.

²⁴Nandre ny fitarainan’ny Israelita Andriamanitra ka nahatsiaro ny fanekempihavanana nataony tamin’i Abrahama sy i Itsehàka ary i Jakôba[14].

²⁵Nijery ny Israelita Andriamanitra ka nahafantatra ny nanjo azy.