Read Dikateny Iombonana Eto Madagasikara Eksôdy 29 Bible Online

Eksôdy 29 - Dikateny Iombonana Eto Madagasikara bible

Eksôdy 29

¹«Toy izao no zavatra hataonao rehefa hanokana an’i Aharôna sy ny zanany lahy ho mpisorona ho Ahy ianao: — Makà vantotr’ombilahy iray sy ondrilahy roa tsy misy kilema.

²Makà kobam-barimbazaha, ka manaova mofo tsy misy leviora, mofo mamy misy diloilo saingy tsy misy leviora, ary mofo manify tsy misy leviora sady voararaka diloilo.

³Ataovy ao anaty harona iray ireo, ary ento ao amin’ny Toeramasina miaraka amin’ny vantotr’ombilahy sy ny ondrilahy roa.

⁴«Ento hankeo am-baravaran’ny Tranolay fihaonana i Aharôna sy ireo zanany lahy, dia ampandroy amin’ny rano fandroana.

⁵Avy eo dia ampiakanjoy an’i Aharôna ny fanamiana voatokana: dia ny akanjo lava ivelany, ny akanjo vita peta-kofehy, ny efôda ary ny saron-tratra, ka afatory ny samboadin’ny efôda.

⁶Apetraho eo an-dohany ny satroka fehiloha, ary apetraho amin’ny satroka fehiloha kosa ny marika maha voatokana.

⁷Dia alao ny ilomasina fanokanana ka araraho eo an-dohany, ary atokany izy.

⁸Ampanatony ireo zanakalahin’i Aharôna, ary ampanaovy ny akanjo vita peta-kofehy;

⁹apetaho ny fehikibony sy ny satroka boribory[173]. Manomboka hatreo dia ho anjara raikitra ho azy ireo ny fisoronana. «Ary toy izao no hanamarihanao ny fidiran’i Aharôna sy ny zanany lahy amin’ny raharahany:

¹⁰«Hoentina eo anoloan’ny Tranolay fihaonana ny ombilahy, ka hametrahan’i Aharôna sy ny zanany lahy tanana eo an-dohan’ny ombilahy.

¹¹Hovonoina ho faty eo anatrehako Izaho TOMPO izany, eo akaikin’ny varavaran’ny Tranolay fihaonana.

¹²Hanalanao ny rany ka hatentinao amin’ny fanondro eo amin’ny tandroky ny alitara, ary ny sisa kosa dia haidinao eo am-pototry ny alitara.

¹³Halainao ny sabora izay mandrakotra ny tsinainy mbamin’ny saron’atiny ary ny voany roa mbamin’ny sabora eo aminy, dia hodoranao eo ambony alitara avokoa.

¹⁴Ho sorona fanalana ny otan’ny mpisorona izany. Fa ny sisa rehetra amin’ilay ombilahy kosa, toy ny henany, ny hoditra mbamin’ny tain-drorohany, dia dory amin’ny afo any ivelan’ny toby.

¹⁵«Avy eo dia halaina ny ondrilahy iray, ka hametrahan’i Aharôna sy ny zanany lahy tanana eo amin’ny lohany.

¹⁶Hovonoinao ho faty ilay ondrilahy ary hotantazanao ny rany, dia hafafinao amin’ny lafiny alitara manodidina.

¹⁷Hotetehinao ho vongana madinika ny ondrilahy; hosasanao ny tsinainy sy ny tongony ka hapetrakao eo ambony alitara, eo ambonin’ireo vongana madinika sy ny lohany.

¹⁸Hodoranao ilay biby manontolo mba ho sorona dorana manontolo ho Ahy TOMPO: ho hanitra ankasitrahina ho AHY io sorona io[174].

¹⁹«Avy eo dia halaina koa ny ondrilahy faharoa, ka hametrahan’i Aharôna sy ny zanany lahy tanana eo amin’ny lohany.

²⁰Hovonoinao ho faty ilay ondrilahy, ary hanalanao ny rany ka hatentinao amin’ny tendron-dravintsofina ankavanan’i Aharôna sy ny zanany, ary amin’ny ankiben-tongotra aman-tanany ankavanana avy; avy eo dia hafafinao amin’ny lafin’ny alitara ambony manodidina ny ra sisa.

²¹Hanalanao kely ny ra eo ambony alitara sy ny ilomasina fanokanana, dia hafafinao amin’i Aharôna sy ny fanamiany ary amin’ny zanany lahy sy ny fanamiany; amin’izay dia ho masina i Aharôna sy ny zanany lahy mbamin’ny fanamany.

²²Ny ondrilahy faharoa dia mariky ny fametrahana ny mpisorona amin’ny raharahany. Koa halainao ny hofany[175], ny sabora mandrakotra ny tsinainy sy ny saron’atiny, ny voany roa mbamin’ny sabora eo aminy, ary ny sorony havanana.

²³Hakanao mofo boribory iray sy mofomamy misy diloilo iray, ary mofo manify iray avy ao amin’ny harona misy ny mofo tsy misy leviora izay apetraka eo anatrehako Izaho TOMPO.

²⁴Hapetrakao eo am-pelatanan’i Aharôna sy ny zanany ireo, ka hasainao ahevahevany eo anatrehako ho fanatitra ahevaheva.

²⁵Avy eo dia halainao eny an-tanany ireo ka hodoranao hanetona eo ambony alitara miaraka amin’ny sorona dorana manontolo: ho sorona atolotra Ahy TOMPO izany, ka ho hanitra ankasitrahina ho AHY.

²⁶Ary halainao ny tratran’ny ondrilahy faharoa izay nanokanana an’i Aharôna ka hahevahevanao eo anatrehako Izaho TOMPO toy ny fanatitra ahevaheva fa iny no anjara ho anao.

²⁷«Hambaranao fa masina ny tratrany sy ny sorony nalaina tamin’ny ondry fanokanana an’i Aharôna ka nahevaheva sy nasandratra teo anatrehako.

²⁸Noho izany, rehefa manao sorom-pihavanana amiko ny Israelita rehetra, dia hanavaka ny soron-kena sy ny tratrany amin’ireo biby mba ho anjara raikitra ho an’i Aharôna sy ny taranany: zavatra avahana ho Ahy TOMPO izany.

²⁹«Rehefa maty i Aharôna, dia hafindra amin’ny taranany ny fanamiana masina; ka ireo no hiakanjo azy amin’ny andro hanokanana sy hametrahana azy amin’ny raharahany.

³⁰Ny mpisorona hisolo an’i Aharôna dia hitondra ireo akanjo ireo mandritra ny fito andro, rehefa miditra ao amin’ny Tranolay fihaonana mba hanatanteraka ny raharahany ao amin’ny Toeramasina.

³¹«Halaina ny ondrilahy fanokanana, ilay faharoa, dia handrahoina ao amin’ny toerana iray voatokana ny henany.

³²Hohanin’i Aharôna sy ny zanany, miaraka amin’ny mofo sisa ao amin’ny harona, eo am-baravaran’ny Tranolay fihaonana izany.

³³Izy ireo ihany no mahazo mihinana izay nampiasaina tamin’ny fanokanana sy ny fametrahana azy eo amin’ny raharahany mba hahazoany famelan-keloka amin’ny Tompo. Tsy misy olon-kafa mahazo mihinana ireo, fa sakafo masina ireo.

³⁴Raha misy sisa tsy lany tra-maraina ny hena sy ny mofo, dia hodorana fa tsy azo hanina satria sakafo masina.

³⁵«Mifanaraka tanteraka amin’ny torolalana efa nomeko anao no hataonao amin’i Aharôna sy ny zanany. Haharitra fito andro ny lanonana fametrahana azy amin’ny asany.

³⁶«Isan’andro dia hanolotra ombilahy iray ho sorona ahazoana famelan-keloka ianao. Hataonao izany hanadiovana ny alitara fisoronana; ary horarahanao diloilo ny alitara mba hanokanana azy.

³⁷Haharitra fito andro koa io lanonana io; ka raha afaka izany, dia ho masina indrindra ny alitara, ary izay rehetra mahakasika azy na olona na zavatra dia hiharan-doza.

³⁸«Zanakondry iray taona roa isan’andro no hatolotra tsy tapaka eo ambony alitara.

³⁹Ny iray hatolotra ny maraina, ary ny iray hatolotra ny hariva.

⁴⁰Miaraka amin’ny zanakondry amin’ny maraina sy ny hariva, dia hitondrana koba telopolo kilao efa voakapoka amin’ny diloilo tsara iray litatra sy sasany sy fanatitra divay iray litatra sy sasany. Ireo dia ho sorona atolotra Ahy TOMPO, ka ho hanitra ankasitrahina ho Ahy.

⁴²Amin’ny hoavy dia tsy ho tapaka na oviana na oviana ny fanolorana sorona dorana manontolo ho Ahy TOMPO eo am-baravaran’ny Tranolay fihaonana, fa eo no hihaonako aminareo sy hitenenako aminao.

⁴³«Eo amin’io toerana io no hihaonako amin’ny Israelita, ka ny voninahitro hanome hasina izany.

⁴⁴Ny tenako mihitsy no hanokana ny Tranolay fihaonana sy ny alitara, tahaka ny hanokanako an’i Aharôna sy ny zanany lahy ho mpisorona ho Ahy.

⁴⁵Hitoetra eo anivon’ny Israelita Aho sady ho Andriamaniny.

⁴⁶Ka amin’izay no hiekeny fa Izaho no TOMPO Andriamaniny, dia Izaho Ilay namoaka azy hiala tany Ejipta mba hahazoako miara-monina aminy. «Izaho no TOMPO Andriamaniny.»