Read Dikateny Iombonana Eto Madagasikara Eksôdy 37 Bible Online

Eksôdy 37 - Dikateny Iombonana Eto Madagasikara bible

Eksôdy 37

¹Namboarin’i Betsalela[218] tamin’ny hazo mimôzà ny Vatamasina; ka mirefy 125 santimetatra ny lavany, 75 santimetatra ny sakany ary 75 santimetatra ny haavony.

²Norakofan’i Betsalela takela-bolamena madio ny atiny sy ny ivelany, ary nasiany sisiny volamena manodidina.

³Notefeny ny haba volamena efatra ka naraikiny teo amin’ny zorony efatry ny Vatamasina, dia samy roa an-daniny avy.

⁴Nisy bao roa nataony tamin’ny hazo mimôzà, ary norakofany takela-bolamena.

⁵Natsofony tao amin’ireo haba ireo ny bao roa mba hilanjana ny Vatamasina.

⁶Nanaovany sarony volamena madio ilay Vatamasina, ka io sarony io dia nirefy 125 santimetatra ny lavany ary 75 santimetatra ny sakany.

⁷Nanefeny kerobima roa volamena tamin’ny sakany roa teo ambonin’ny saron’ny Vatamasina.

⁸Novoasany mitambatra amin’ny saron’ny Vatamasina ireo kerobima roa ireo, teo amin’ny sakany avy.

⁹Nifanatrika ny kerobima roa sady nanatrika ny saron’ny Vatamasina izay nalofany tamin’ny elany mivelatra.

¹⁰Nisy latabatra namboarina[219] tamin’ny hazo mimôzà, ka nirefy iray metatra ny lavany, 50 santimetatra ny sakany ary 75 santimetatra ny haavony.

¹¹Norakofana takela-bolamena madio izany, sady nasiana sisiny volamena manodidina.

¹²Nasiana fehivavany mivelatra valo santimetatra manodidina azy sady nasiana sisiny volamena teo ambonin’io fehivava io.

¹³Nisy haba volamena efatra koa notefena, dia napetaka teo amin’ny zorony efatra, nifanila tamin’ny tongony efatra.

¹⁴Natao teo akaikin’ny fehivavany ny haba ka nampidirana bao mba hitondrana ny latabatra.

¹⁵Hazo mimôzà no nanaovana ny bao roa, izay norakofana takela-bolamena; ary ireo no nilanjana ny latabatra.

¹⁶Namboarina koa ny fitaovana fametraka eo ambonin’io latabatra io: dia lovia fisaka lehibe, kaopy, tavoara, tsatokaty ho an’ny fanatitra divay; ka samy natao tamin’ny volamena madio avokoa izy rehetra.

¹⁷Namboarina[220] ny fitoeran-jiro volamena madio; voasana no nanaovana azy, ka ny faladiany sy ny tahony, ny raviny sy ny bokony ary ny voniny dia nitambatra ho tena iray ihany.

¹⁸Nasiana rantsana enina nivoaka avy amin’ny tahobeny, ka samy telo an-daniny avy.

¹⁹Isaky ny rantsana tsirairay dia nisy felam-boninkazo telo miendrika felam-paiso miaraka amin’ny bokony sy ny voniny.

²⁰Teo amin’ilay tahobeny kosa dia nisy felam-boninkazo efatra miendrika felam-paiso miaraka amin’ny bokony sy ny voniny.

²¹Ary teo ambanin’ny rantsana enina izay niainga avy amin’ny tahobeny dia nisy boko iray isaky ny rantsana tsiroaroa.

²²Nitambatra ho iray ihany tamin’ny sisa rehetra ny boko sy ny rantsana, ary samy volamena madio avokoa izy rehetra.

²³Namboarina ny jiro fito sy ny tandra ary ny fitoeran-davenon-jiro, ka samy natao volamena madio avokoa.

²⁴Vongam-bolamena madio telopolo kilao no nampiasaina nanaovana ny fitoeran-jiro sy ny fitaovana rehetra miaraka aminy.

²⁵Namboarina tamin’ny hazo mimôzà ny alitara iray ho fandoroana[221] vovo-javamanitra. Efamira izy io, ka nirefy dimampolo santimetatra avy ny lafiny tsirairay, ary iray metatra ny haavony. Nisy tandrony avy teo amin’ny zorony efatra ambony ary natao miray aminy.

²⁶Norakofana takela-bolamena madio ny tampony sy ny lafiny manodidina mbamin’ny tandrony, sady nasiana sisiny volamena manodidina.

²⁷Haba volamena roa avy no napetany teo ambanin’ny sisiny sady nataony tamin’ny zorony efatra, ka nampidirana bao mba hilanjana ny alitara.

²⁸Namboarina tamin’ny hazo mimôzà ireo bao roa ireo, ary norakofana takela-bolamena.

²⁹Mpamboatra zava-manitra[222] no nanao ny ilomasina fampiasa amin’ny fanokanana mbamin’ny vovo-javamanitra hodorana eo amin’ny alitara.