Read Dikateny Iombonana Eto Madagasikara Eksôdy 5 Bible Online

Eksôdy 5 - Dikateny Iombonana Eto Madagasikara bible

Eksôdy 5

¹Taorian’izany dia nankany amin’ny Farao i Mosesy sy i Aharôna ka niteny taminy hoe: — Izao no nambaran’ny TOMPO, Andriamanitr’i Israely: «Alefaso ny vahoakako mba hanao fety any an-taniefitra ho fanajana Ahy.»

²Dia hoy ny Farao: — Iza moa ny TOMPO no hoekeko, ka handefasako ny Israelita handeha? Tsy fantatro IZY, koa tsy halefako handeha ianareo!

³Dia hoy indray i Mosesy sy i Aharôna hoe: — Ilay Andriamanitry ny Hebreo, ilay TOMPO Andriamanitray, no niseho taminay. Koa mba avelao izahay handeha lalana telo andro any an-taniefitra hanao sorona aminy, fandrao hamely anay amin’ny areti-mifindra na amin’ny ady Izy.

⁴Fa hoy ny mpanjakan’i Ejipta taminy: — O ry Mosesy sy i Aharôna, nahoana ianareo no manaketraka ny vahoaka israelita amin’ny asany? Mandehana ianareo mankany amin’ny asa fanompoanareo.

⁵Ankehitriny efa tonga marobe eto amin’ity tany ity ireo olona ireo, ka tianareo hitsahatra amin’ny asa fanompoany ve?

⁶Androtr’iny ihany dia nomen’ny Farao baiko ireo Ejiptianina lehiben’ny asa fanompoana sy ireo Israelita mpitandrin-draharaha ka nilazany hoe:

⁷— Aza omenareo mololo toy ny taloha intsony ny Israelita amin’ny fanaovam-biriky, fa izy ireo ihany no aoka handeha hanangona mololo[28] ho azy.

⁸Kanefa ny isan’ny biriky izay fanaony teo aloha dia takio aminy ihany fa aza ahenanareo, satria olona kamo ireo. Koa izany no itarainany handeha hanao sorona ho amin’ilay Andriamaniny.

⁹Hamafiso fanompoana ireo olona ireo, dia hifototra amin’izany ka tsy hanonofinofy teny lainga.

¹⁰Dia nivoaka ny lapa ireo lehiben’ny fanompoana sy ireo mpitandrin-draharaha ka nilaza tamin’ny Israelita hoe: — Izao no lazain’ny Farao: tsy hanome mololo anareo intsony aho.

¹¹Ianareo ihany no mandehana maka mololo ho anareo amin’izay ahitanareo any, kanefa tsy hisy hahena ny asa fanompoanareo.

¹²Dia niparitaka manerana ny tany Ejipta manontolo ny Israelita hanangona vodivary hatao mololo.

¹³Ireo lehiben’ny fanompoana kosa dia nandodona hoe: «Vitao ny asa takîna aminareo isan’andro, tahaka ny tamin’ny mbola nisy mololo ihany!»

¹⁴Nokapohiny aza ny mpitandrin-draharaha israelita notinendriny, sady nanontaniany hoe: «Nahoana omaly sy androany no tsy vitanareo ny isan’ny biriky anjaranareo toy ny teo aloha?»

¹⁵Nankao amin’ny Farao ireo Israelita mpitandrin-draharaha ka nitaraina hoe: — Nahoana no dia ataonao toy izao izahay mpanomponao?

¹⁶Tsy omena mololo izahay kanefa asaina manao biriky ihany. Ary jereo fa nokapohina izahay mpanomponao, ka heloky ny vahoakanao izao[29]!

¹⁷Fa novalian’ny Farao hoe: — Olona tena kamo mihitsy ianareo! Izany no antony nilazanareo hoe: «Handeha hanao sorona ho an’ny TOMPO izahay.»

¹⁸Koa ankehitriny, ndeha miasa fa tsy homena mololo intsony ianareo, nefa ny isam-biriky anjaranareo tsy maintsy homenareo ihany.

¹⁹Hitan’ireo mpitandrin-draharaha israelita fa tafalatsaka amin’ny kizo izy raha nilazana hoe: «Tsy hahenanareo ny isam-birikinareo, fa ny anjara fanao isan’andro ihany.»

²⁰Koa vantany vao nivoaka avy tao amin’ny Farao ry zareo, dia nandeha nihaona tamin’i Mosesy sy i Aharôna izay efa niandry azy rahateo;

²¹ka hoy ireto mpitandrin-draharaha tamin’izy mirahalahy: — Aoka ho hitan’ny TOMPO izao nataonareo izao ka hanamelohany anareo, satria efa nataonareo mangidy hoditra tamin’ny Farao sy ny tandapany izahay; eny, nasianareo sabatra eny an-tanan’ireo mba hamonoany anay!

²²Dia niverina tany amin’ny TOMPO i Mosesy ka niteny hoe — Tompo ô, nahoana no nampidi-doza an’ity vahoaka ity ianao? Ahoana àry no nanirahanao ahy atỳ?

²³Fa hatramin’ny nankanesako tany amin’ny Farao niteny tamin’ny anaranao no nahatonga izao loza izao tamin’ny Israelita, ary ianao dia tsy mamonjy ny vahoakanao akory!