Read Dikateny Iombonana Eto Madagasikara Jôba 1 Bible Online

Jôba 1 - Dikateny Iombonana Eto Madagasikara bible

Jôba 1

¹Nisy lehilahy iray nonina tany amin’ny tany Hotsa, ka nantsoina hoe Jôba[1]. Tsy misy hokianina sady mahitsy ary nanaja an’Andriamanitra izany lehilahy izany ka nifady ny ratsy.

²Nanan-janaka lahy fito sy zanaka vavy telo izy.

³Nanana ondry fito arivo sy rameva telo arivo ary omby arivo sy borikivavy dimanjato mbamin’ny mpanompo marobe koa izy. I Jôba no lehilahy nanan-kaja indrindra tany atsinanan’i Palestinina.

⁴Fanaon’ireo zanakalahin’i Jôba ny mifandimby mifanasa amin’ny sakafo tsara. Koa nasainy ireo anabaviny telo mba hiaraka mihinana sy misotro aminy.

⁵Ary rehefa tapi-nihodina ny fanasana, dia nampiantsoin’i Jôba ny zanany mba hodiovina. Dia nifoha maraina be izy ny ampitso ka nanolotra sorona dorana manontolo araka ny isan’izy rehetra; fa hoy Jôba hoe: «Fandrao nanota na nandà an’Andriamanitra tao am-pony ny zanako.» Izany no nataon’i Jôba mandrakariva.

⁶Indray andro raha tonga nanao tatitra tamin’ny TOMPO ireo zanak’Andriamanitra, dia mba tafaraka taminy teo koa i Satàna.

⁷Dia hoy ny Tompo tamin’i Satàna: — Avy taiza moa ianao? Dia namaly ny Tompo izy hoe: — Avy nitetitety ny tany sy nihaodihaody teny aho.

⁸Ary hoy ny Tompo taminy: — Efa nahita an’i Jôba mpanompoko ve ianao? Fa tsy misy tahaka azy eny ambonin’ny tany: lehilahy tsy misy hokianina sady mahitsy ary manaja Ahy izy ka nifady ny ratsy.

⁹Fa mbola namaly ny Tompo i Satàna ka nanao hoe: — Moa tsy fanantenan-javatra ve no anajàn’i Jôba Anao?

¹⁰Moa tsy Ianao ve no miaro azy sy ny fianakaviany mbamin’ny fananany toy ny fefy manodidina? Notahinao izay asa nataony, ary efa nomenao omby aman’ondry mameno ny taniny izy.

¹¹Fa esory aminy ange izay ananany e, raha tsy ankitsirano izao no haniratsirany Anao!

¹²Dia hoy ny Tompo tamin’i Satàna[2]: — Indro eo am-pelatananao izay ananany rehetra. Nefa aza kasihinao kosa ny tenany. Dia niala teo anatrehan’ny TOMPO i Satàna.

¹³Indray andro raha nihinana sy nisotro tao an-tranon-jokiny lahimatoa ireo zanak’i Jôba,

¹⁴dia nisy iraka tonga tany amin’i Jôba nilaza taminy hoe: «Raha teo am-piasàna iny indrindra ny omby ary raha nihinana teo akaikiny ny borikivavy,

¹⁵dia nidinan’ny Sabeanina[3] tampoka ka norobainy; novonoiny ho faty tamin’ny sabatra ny mpanomponao, ary dia izaho irery no afa-nandositra hampandre anao.»

¹⁶Fa raha tsy mbola tapitra akory ny teniny, dia nisy iray hafa koa tonga nilaza hoe: «Nilatsaham-potaka ny ondry aman’osy sy ny mpiandry azy ka levona, ary dia izaho irery no afa-nandositra hampandre anao.»

¹⁷Fa raha tsy mbola tapitra akory ny tenin’io? dia nisy iray hafa koa tonga ka nanao hoe: «Nasian’ny andian-jiolahy kaldeanina[4] telo toko ny rameva ka norobainy; novonoiny ho faty tamin’ny sabatra ny mpanomponao. Izaho irery no afa-nandositra hampandre anao.»

¹⁸Fa raha tsy mbola tapitra koa ny teniny, dia nisy iray hafa koa tonga ka nanao hoe: «Raha teo am-pihinanana sy teo am-pisotroana tao an-tranon-jokiny ireo zanakao,

¹⁹dia nifofofofo avy any an-taniefitra ny rambondanitra ka nipaoka ny zoron-trano efatra; maty nianjeran’ny trano tao avokoa ireo zatovo, ary dia izaho irery no afa-nandositra hampandre anao.»

²⁰Dia nitsangana i Jôba ka nandriatra ny fitafiany sy nanaratra ny lohany[5] ary niampatra tamin’ny tany ka niankohoka

²¹sady nanao hoe: Nitanjaka no nivoahako avy tao an-kibon’ineny, ary mitanjaka koa no hiverenako avy an-kibon’ny tany. Ny TOMPO no nanome, ny TOMPO no naka. Isaorana anie ny anaran’ny TOMPO.

²²Tamin’izany fahoriana rehetra izany dia tsy mba nanota i Jôba ary tsy nanome tsiny an’Andriamanitra.