Read Dikateny Iombonana Eto Madagasikara Jôba 13 Bible Online

Jôba 13 - Dikateny Iombonana Eto Madagasikara bible

Jôba 13

¹Indro ny masoko efa nahita izany rehetra izany, ary ny sofiko efa nandre ka nahafantatra.

²Izay fantatrareo, mba fantatro ihany koa; ary tsy manaiky ho ambany noho ianareo aho.

³Fa izaho kosa hiteny amin’Andriamanitra Tsitoha, satria Izy no tiako hitarainana.

⁴Fa ianareo dia mpamoron-dainga, dokotera tsy mahasitrana avokoa.

⁵Tsara kokoa ho anareo ny mangina tanteraka, fa ho mariky ny fahendrenareo izany.

⁶Mba henoy ange ny fiarovan-tenako ary ataovy izay handrenesanareo ny fanoherana aloaky ny vavako.

⁷Fanompoana an’Andriamanitra ve no anaovanareo lahateny tsy mitombina? Fimasoana Azy ve no ilazanareo fitaka?

⁸Hiandany aminy ve ianareo ka handahatra hisolovava Azy?

⁹Ho tsara ve ny hizahany anareo akaiky? Tsy mba olombelona Andriamanitra ka ho azonareo fitapitahina.

¹⁰Hahazo tsiny marimarina aminy ianareo, raha miangatra na dia mangingina aza.

¹¹Tsy mampihorohoro anareo ve ny fahalehibeazany? Tsy mianjady aminareo ve ny fahatahorana Azy?

¹²Toy ny lavenona manidina ihany ny ohabolana ataonareo, ary manda fotaka ihany ny hevi-dalinareo.

¹³Mangina ianareo fa anjarako izao no miteny; ary tsy mampaninona izay hanjo ahy any.

¹⁴Vonona amin’ny zavatra rehetra aho, na dia hihatra amin’ny aiko aza izany[32].

¹⁵Na dia hamono ahy aza Andriamanitra, dia tsy mampaninona; fa efa very ny fanantenako. kanefa mbola hiaro tena eo anatrehany ihany aho.

¹⁶Izany indrindra no fandresena ho ahy, satria ny mpihatsaravelatsihy dia tsy sahy hifanatrika aminy.

¹⁷Koa mba henoy tokoa ny teny lazaiko; ary aoka mba ho ren’ny sofinareo izay ambarako.

¹⁸Indro efa namelabelatra ny adiko aho, satria fantatro fa hanan-drariny ny tenako.

¹⁹Moa misy te hifanandrina amiko ny amin’izany? Fa hangina sy ho faty aho, raha toa ka diso.

²⁰Zavatra roa no aza atao amiko, Andriamanitro ô, dia tsy hiafina intsony ny tavanao aho:

²¹Esory amiko aloha ny tananao izay mampahory ahy; ary aoka tsy hanjohy ahy intsony ny fampitahoranao.

²²Avy eo miantsoa ahy hofotorinao fa hamaly aho; na izaho aloha no hiteny, izay Ianao vao mamaly.

²³Firy àry ny heloka amam-pahotako? Ampahafantaro ahy izay fiodinana amam-pahadisoako.

²⁴Nahoana no manafina ny tavanao Ianao, ka mandray ahy ho toy ny fahavalonao[33]?

²⁵Iza àry no hazainao? Izay ravin-kazo manidina ve! Ary zovy no enjehinao? Izay mololo maina ve!

²⁶No dia didim-pitsarana mangidy loatra no soratanao hamelezana ahy, ka ampanodiavinao ahy mbamin’ny heloky ny fahatanorako.

²⁷Dia manisy gadra ny tongotro Ianao[34] sy manara-maso ny fihetsiko rehetra ary mitsikilo hatramin’ireo dian-tongotro.

²⁸Kanefa mihalevona toy ny hazo boboka ny aiko, mova tsy toy ny fitafiana lanin’ny kalalao.