Read Dikateny Iombonana Eto Madagasikara Jôba 16 Bible Online

Jôba 16 - Dikateny Iombonana Eto Madagasikara bible

Jôba 16

¹Dia namaly i Jôba ka nanao hoe:

²Kabary efa mankaleo ahy izany reko izany: mpampionona mahasorena ianareo rehetra, dia ianareo izay manontany ahy hoe:

³«Hifarana rahoviana izany teny foana izany? Sa inona no manesika anao hamaly toy izany?»

⁴Afaka hiteny tahaka anareo koa aho, raha ianareo no mba teo amin’ny toerako. Hanaovako kabary tsara lahatra ianareo ary hanifikifi-doha ho fangorahana anareo aho.

⁵Hiteny aho hankaherezako anareo, fa ny fampiononana lazaiko no hampitonena.

⁶Kanefa na dia miteny aza aho, dia tsy mihamaivana ny fahoriako; ary na dia mangina koa aza aho, dia tsy misinda akory izany.

⁷Ankehitriny dia nandreraka ahy Andriamanitra, fa naringany avokoa ny ankohonako rehetra.

⁸Ireo ketrona nataony amiko no vavolombelona, ary ny fahiazako no miampanga sy manameloka ahy.

⁹Am-pahavinirana no amiraviran’Andriamanitra ahy; manao haza lambo ahy Izy sy mikitro-nify amiko. ary mivandravandra miseho ho fahavaloko.

¹⁰Misanasana vava handrahona ahy ny olona, ka mamely tehamaina sady manevateva ahy ary koa miara-mioko hamely ahy.

¹¹Efa natolotr’Andriamanitra amin’ny tsivalahara aho ary navelany ho eo an-tanan’ny olon-dratsy.

¹²Tonga nanakotaba ahy Andriamanitra, tamin’iny aho nilamina tsara iny; noraisiny tamin’ny hatoko aho ka naronjiny ary nataony lasibatry ny zana-tsipîkany.

¹³Misavoana manodidina ahy hatraiza hatraiza ireny. Trobarany tsy ananany antra ny voako; ka mifafy amin’ny tany ny ranon’aferoko.

¹⁴Ratra miampy ratra no afitsony ahy ary toy ny mpiady mahery no iantsampazany amiko.

¹⁵Nanjaitra lamba fisaonana aho, mba hanaronako ny hoditro; ary nahosiko tanaty vovoka ny handriko.

¹⁶Ny tavako efa tera-menan’ny fitomaniana; ary alo-pahafatesana no teo amin’ny masoko.

¹⁷Kanefa tsy voaloton-kerisetra ny tanako; ary ny fivavahako dia madio hatrany.

¹⁸Ry tany ô, miraraka ny rako ka aza rakofanao izany, fa aoka ho re hatraiza hatraiza ny fitarainako[37].

¹⁹Dieny izao dia misy vavolombeloko any an-danitra; ary any amin’ny sehatra ambony any misy mpiaro ahy[38].

²⁰Na dia mihomehy ahy aza ny namako dia tomany kosa no ijereko an’Andriamanitra.

²¹Enga anie ilay mpiaro ahy no hanelanelana ny tenako olombelona sy Andriamanitra, toy ny fanaon’ny olona samy olona etỳ an-tany.

²²Hanelanelana anie izy, fa miserana ny taona vitsy iainako; ary hizotra ny lalana ho amin’ny varo-tsy mifody aho.