Read Dikateny Iombonana Eto Madagasikara Jôba 17 Bible Online

Jôba 17 - Dikateny Iombonana Eto Madagasikara bible

Jôba 17

¹Torovana ny aiko ary madiva hilentika ny androko; ny fasana sisa no miandry ahy.

²Moa tsy ireo mpaneso ve no manodidina ahy ka ny filàny misotasota no tsy ahitako tory?

³Andriamanitra ô, meteza ho hany mpiantoka ahy, fa iza moa ankoatra Anao no hety hanao izany?

⁴Efa nataonao very saina ireo sakaizako, koa tsy havelanao hirehareha amiko.

⁵Ireo no tonga amin’ilay ohabolana hoe: Manan-kozaraina amin’ny namana, kanefa dia mahajery voamason-janaka.

⁶Izaho no ambentin-kiran’ny olona sy fandrorany an-tava hatrany.

⁷Efa jembin’ny alahelo ny masoko, ary efa hoatra ny aloka sisa ny tenako.

⁸Ankona noho izany ny olo-mahitsy, ary tezitra ny tsy manan-tsiny satria olona mpihatsaravelatsihy no ahitany ahy.

⁹Fa hoy izy: «Aoka ny marina hifikitra amin’ny lalany, ary aoka ny madio tanana hitombo fiezahana.»

¹⁰Avia ka miverena avokoa, ianareo sakaizako. Fa tsy mahita izay olon-kendry teo aminareo aho.

¹¹Lasa ny androko; foana ny fikasàko, dia izay zavatra nirin’ny foko fatratra.

¹²Fa ny alina ataon’ny sakaizako ho andro; ary rehefa tonga ny haizina, dia lazainy fa antomotra ny mazava.

¹³Inona indray no mbola antenaiko, afa-tsy ny toeran’ny maty ho fonenako? Ao amin’ny haiziny no hamelarako fandriana!

¹⁴Hoy aho amin’ny fasana: «Ianao no raiko», ary amin’ny olitra: «Ianareo no reniko sy anabaviko»

¹⁵Fa aiza àry ny fanantenako? Iza no mbola mahita azy?

¹⁶Miara-midina amiko any amin’ny toeran’ny maty izany, ary hiara-mihitsoka amiko eo amin’ny vovoka.