Read Dikateny Iombonana Eto Madagasikara Jôba 18 Bible Online

Jôba 18 - Dikateny Iombonana Eto Madagasikara bible

Jôba 18

¹Dia niteny indray Bildada avy any Soha ka nanao hoe:

²Rahoviana no hatsahatrareo roa lahy izany teny izany? Mieritrereta aloha ianareo; izay isika vao miresaka!

³Nahoana no ataon’i Jôba ho donto toy ny biby isika telo lahy? Sa olona tery saina ve isika eo imasonareo?

⁴Ary ianao kosa, ry Jôba, izay mampahory tena amin’ny fahatezeranao, noho ny aminao ve no hahalao ny tany sy hampifindra toerana ny vatolampy?

⁵Eny, ho faty tokoa ny jiron’ny olon-dratsy, ary tsy hirehitra intsony ny lelafony.

⁶Ny hazavana hihamaizina ao an-tranony; ary ho faty ny fanaovan-jiro eo amboniny[39].

⁷Hiambakavaka ilay famindrany matoky iny, ary ho lavon’ny foto-pisainany ihany izy;

⁸satria ny tongony no hitarika azy ho amin’ny harato, ka dia handroso ho voasingotra avy hatrany izy.

⁹Ho azon’ny fandrika ny ombalahintongony, ary hangeja azy mafy ny tadivavarana.

¹⁰Miafina eo amin’ny tany eo ny tady hamingana azy; ary efa misy longoa mitoto-bozaka eny an-dàlany.

¹¹Manemitra azy hatraiza hatraiza ny horohoro ary manara-dia azy amin’izay alehany.

¹²Lanin’ny mosary ny fahavitrihan’ny olon-dratsy ary mitoetra eo anilany ny fahantrana.

¹³Eny, laniny tsikelikely ny sombin-kodiny, ary kikisan’ny areti-mandoza ny rantsam-batany.

¹⁴Hoesorina amin’ny fonenany azo antoka izy ka hoentina eo anatrehan’ilay mpanjaka Rafahafatesana.

¹⁵Tsy misy mpipetraka ny tranony ka azo itoerana, dia hofafazana solifara ny faritra fonenany[40].

¹⁶Fa ho tonga toy ny hazo efa ho faty izy; mihamaina ny fakany avy ao ambany ary mihamalazo ny raviny avy any ambony.

¹⁷Ho foana eto amin’ity tany ity ny fahatsiarovana ny olon-dratsy, ary efa hadino hatrany ivelany ny anarany.

¹⁸Hakifika hiala amin’ny mazava hankamin’ny haizina izy ary horoahina hiala amin’izao tontolon’ny velona izao.

¹⁹Ho lany tamingana tsy hamela taranaka izy ary tsy hisy ho velona ny ao amin’ny fonenany.

²⁰Igagan’ny any Andrefana ny fahavoazany, ka mampihorohoro ny any Atsinanana.

²¹«Toy izany, hoy ireo, no miandry ny fonenan’ny mpanao ratsy; izao no manjo ny toerana izay tsy niekena an’Andriamanitra.»