Read Dikateny Iombonana Eto Madagasikara Jôba 19 Bible Online

Jôba 19 - Dikateny Iombonana Eto Madagasikara bible

Jôba 19

¹Dia namaly i Jôba ka nanao hoe:

²Hafiriana no mbola hampahorianareo ahy ka handrerahanareo ahy amin’ny fitenenana?

³Efa impolo kely izao no nanevatevanareo ahy, ka tsy menatra ve ianareo mampahory ahy toy izao?

⁴Fa raha nisy tokoa aza fahadisoako, dia ahy samirery ihany ny amin’izany.

⁵Nefa raha mihevitra ny hirehareha amiko kosa ianareo ka hanao ny fahoriako ho porofon’ny maha meloka ahy,

⁶dia fantaro fa Andriamanitra no nahatonga izao fahavoazako izao sady nanarona ahy tamin’ny haratony.

⁷Raha miantso mafy aho hoe: «Loza!», dia tsy misy mamaly ahy. Raha mba miantso vonjy aho, dia tsy mahazo rariny.

⁸Bahanan’Andriamanitra ny lalako mba tsy hahafahako mandeha; ary amin’ny sakeli-dalana alehako dia nasiany haizina hiraparapako.

⁹Efa nataony afa-boninahitra aho ary nesoriny teo an-dohako ny satroboninahitro.

¹⁰Toa trano narodany hatraiza hatraiza aho ka potika ary nongotany toa fanongotra hazo ny fanantenàko.

¹¹Dia nirehitra tamiko ny fahatezerany, ka nataony toy ny fahavalo aho.

¹²Tafangona avokoa ireo andia-miaramilany ka nitady lalana hahatrarana ahy ary mitoby nanao fahirano ny laiko.

¹³Ny rahalahiko efa nampanalavirina ahy. Ireo nahafantatra ahy tsy te hahalala intsony.

¹⁴Ny havako akaiky efa nihatakataka tamiko, ireo sakaizako efa nanadino ahy.

¹⁵Ny vahiny nampiantranoiko sy ny mpiasako dia nihevitra ahy ho olon-kafa; eny, tonga tsy fantany intsony aho.

¹⁶Antsoiko ny mpanompoko fa tsy mamaly na dia efa nitalahoako fatratra aza.

¹⁷Tsy mahatanty ny fofonaiko intsony ny vadiko ary tofoka amiko koa ireo zanaka naterako.

¹⁸Mamingavinga ahy hatramin’ny ankizy kely; fa raha mitsangan-kamindra aho, dia esoiny.

¹⁹Tsiravina amiko ireo sakaiza nitokiako; ary nivadika tamiko avokoa ny olon-tiako.

²⁰Taolana mifono hoditra sisa aho ankehitriny; ary ny akanjo-nifiko no hany entiko mandositra.

²¹Iantrao dia iantrao aho, ry sakaizako isany, fa ny tanan’Andriamanitra no namely ahy.

²²Nahoana no manenjika ahy tahaka an’Andriamanitra koa ianareo ka tsy sasatry ny mampijaly ahy?

²³Tiako raha mba voasoratra ny teniko, ka ho voasokitra any ho any.

²⁴Enga anie ka ho voasokitra amin’ny fandrabỳ izany sady harahina loko firaka isaky ny litera ka haharitra mandrakizay eo amin’ny vatolampy.

²⁵Fantatro fa velona ny Mpanavotra ahy; ka hitsangana farany eo amin’ny tany Izy.

²⁶Rehefa mihintsana izao hoditro izao ka ho afaka amin’ny nofoko aho, dia hahita an’Andriamanitra.

²⁷Eny, izaho mihitsy no hijery Azy, ka ny masoko no hahita fa tsy ny hafa. Efa sasa-miandry izany ny foko ato anaty.

²⁸Hoy ianareo hoe: «Ahoana no fanenjika azy, hahitana izay anton-javatra hitsarana azy?»

²⁹Koa matahora ny sabatra ianareo, fa hovalian-tsabatra ny di-dohanareo; ary ho fantatrareo fa misy fitsarana.