Read Dikateny Iombonana Eto Madagasikara Jôba 2 Bible Online

Jôba 2 - Dikateny Iombonana Eto Madagasikara bible

Jôba 2

¹Indray andro raha tonga nanao tatitra tamin’ny TOMPO ireo zanak’Andriamanitra, dia mba tafaraka taminy teo koa i Satàna.

²Dia hoy ny Tompo tamin’i Satàna: — Avy taiza moa ianao? Dia namaly ny Tompo izy hoe: — Avy nitetitety ny tany sy nihaodihaody tany aho.

³Hoy indray ny Tompo taminy: — Efa nahita an’i Jôba mpanompoko ve ianao? Fa tsy misy tahaka azy eny ambonin’ny tany: lehilahy tsy misy hokianina sady mahitsy ary manaja Ahy izy ka mifady ny ratsy. Ary na dia nandrisika Ahy hamely azy tsy amin’antony aza ianao, dia mbola mahatoky ihany izy.

⁴Fa mbola namaly ny Tompo i Satàna ka nanao hoe: — Hoditra solon’ny hoditra. Izay ananan’ny olona dia homeny hiarovany ny ainy.

⁵Fa ahinjiro aminy ange ny tananao ka kasiho ny taolany sy ny nofony e, raha tsy an-kitsirano izao no haniratsirany Anao!

⁶Dia hoy ny Tompo tamin’i Satàna: — Indro eo am-pelatananao izy, ny ainy tokana ihany tsimbinina.

⁷Dia niala teo anatrehan’ny TOMPO i Satàna ka namely aretin-koditra mahatsiravina an’i Jôba hatreo am-paladiany ka hatrany an-tampon-dohany.

⁸Dia nitombina teo an-davenona i Jôba ary naka vakim-bilany tany hihaorany.

⁹Ary hoy ny vadiny taminy: — Mbola mikiry amin’ny fahamarinanao foana ve ianao? Lavy Andriamanitra, dia matesa any ianao!

¹⁰Dia hoy i Jôba namaly azy: — Miteniteny foana tahaka ny vehivavy adala ianao. Raha ekentsika fa avy amin’Andriamanitra ny zavatra tsara, nahoana no tsy ekentsika ny zavatra ratsy ho avy aminy? Tamin’izany fitsapana azy izany, dia tsy mba nanota tamin’ny molony i Jôba na dia kely aza.

¹¹Ary nandre ny fahoriana rehetra nianjady tamin’i Jôba ny sakaizany telo lahy, dia i Elifaza avy any Temàna sy i Bildada avy any Soha ary i Tsofara avy any Nahamà[6], ka samy niala tany aminy avy ary nifanaiky fa haneho aminy ny fiaraha-miory sy hankahery azy.

¹²Saiky tsy nahafantatra azy anefa ireo raha nahatazana an’i Jôba, ka dia nitomany; nandriatra fitafiana izy ary nanopy vovoka teny amin’ny rivotra mba hiraraka eny an-dohany avy.

¹³Dia nijanona nipetraka tamin’ny tany niaraka tamin’i Jôba nandritry ny fito andro sy fito alina ireo sady tsy nisy niteny na inona na inona taminy satria hitany ny halehiben’ny fahoriany.