Read Dikateny Iombonana Eto Madagasikara Jôba 26 Bible Online

Jôba 26 - Dikateny Iombonana Eto Madagasikara bible

Jôba 26

¹Namaly i Jôba ka nanao tamin’i Bildada hoe:

²Endrey ny fahaizanao manampy ny osa sy mampahatanjaka ny miraviravy tanana toa ahy!

³Endrey ny fahaizanao manolo-tsaina sy mizara fahendrena mitafotafo amin’ny adala toy ny tenako izao!

⁴Fa iza moa no nampandahatra anao ireo teninao ireo? Ary fanahin’iza no nampivolana anao toy izany?

⁵[49]Mipararetra ny matoatoa any ambany any, mihorohoro koa ny ranobe sy ny mponina ao aminy.

⁶Mihanjahanja eo anatrehan’Andriamanitra ny toeran’ny maty, ary miharihary eo imasony ny hantsam-pahaverezana.

⁷Izy no mamelatra ny lanitra avaratra eny amin’ny babangoana ambony eny, ary mampihevaheva ny tany eny ana habakabaka.

⁸Angoniny ao amin’ny rahony ny orana kanefa tsy mampitriatra ny fanambanin-drahona.

⁹Takony tsy hitantsika ny tavan’ny volana fenomanana[50], satria amelarany raho-matevina hanarona azy.

¹⁰Hodidininy faribolana ny ranomasimbe, dia amin’izay mampisaraka ny mazava sy ny maizina.

¹¹Vao rahonany fotsiny ny andrin’ny lanitra dia mihozongozona sy tsiravina.

¹²Ny heriny no namolahany ny ranomasina, ary ny fahendreny no handreseny an’i Rahaba[51].

¹³Ny fofonainy no nampahazava ny lanitra, ary ny tanany no namantsika ilay bibilava mpandositra[52].

¹⁴Indreny no ampahany kely amin’ny asany ary ako malefak’izany no mba rentsika fa raha ny fikotrokotroky ny heriny, iza moa no hahatakatra izany?