Read Dikateny Iombonana Eto Madagasikara Jôba 28 Bible Online

Jôba 28 - Dikateny Iombonana Eto Madagasikara bible

Jôba 28

¹Misy ny tany fitrandrahana volafotsy ary ny toerana fanadiovana volamena.

²Ny vy dia alaina avy amin’ny tany, ary ny varahina avy amin’ny vato narendrika.

³Mampisava ny haizina ny mpitrandraka; ka hatrany amin’ny fanambanin’ny tany no ikarohany ny vato miafina ao anatin’ny haizim-pito mangitsokitsoka.

⁴Mihady lavaka lavitry ny fonenana izy; ka any amin’ny toerana tsy fandalovan’olona no ihantonany sy itsingevahevany amin’ny tady.

⁵Ny vohon-tany no mamokatra hanina fa ny ao ambany kosa toa navadibadiky ny afo.

⁶Ny vatony no fitoeran’ny safira[56] ary ny vovony no ahitam-bolamena.

⁷Tsy fantatry ny papango ny lalana mankany sady tsy hitan’ny masom-boromahery.

⁸Tsy mbola nodiavin’ny biby masiaka izany, ary tsy mba falehan’ny liona.

⁹Nefa sahy mihady ny vatomainty ihany ny olona ka misava ny tendrombohitra hatrany ifotony.

¹⁰Anokafany lalana ao anaty vatolampy mba hahitany ny zava-tsarobidy rehetra.

¹¹Hainy ny manampina ny loharano tsy hikorianan’ny renirano; ka avoakany eo amin’ny mazava ny harena miafina rehetra.

¹²Fa ny Fahendrena[57], aiza kosa no hahitana azy? Aiza no toerana ipoiran’ny fahalalana?

¹³Tsy misy olona mahalala ny hasarobidiny, satria tsy hita ao amin’ny tanin’ny velona izy.

¹⁴Fa hoy ny hantsana anaty ranobe: «Tsy aty izy.» ary hoy ny Ranomasina: «Tsy ato amiko izy.»

¹⁵Tsy mahatakalo azy ny vongam-bolamena madio ary tsy mahavidy azy ny antontam-bolafotsy.

¹⁶Tsy mifandanja aminy na ny volamena avy any Ôfira na ny berila sarobidy mbamin’ny safira aza.

¹⁷Tsy mitaha aminy na ny volamena na ny fitaratra[58]. Ary ny vazy tena volamena tsy mahatakalo azy.

¹⁸Tsy misy antony aminy na ny voahangy na ny kristaly, fa mihoatra noho ny perla ny fahazoam-pahendrena.

¹⁹Tsy azo ampitahaina akory ny tôpaza[59] avy any Etiopia; ary tsy mifandanja aminy na dia ny volamena madio aza.

²⁰Fa avy aiza àry ny fahendrena? Aiza no toerana ipoiran’ny fahalalana?

²¹Miafina amin’ny mason’ny velona rehetra izany, ary takona amin’ny vorona eny an-danitra koa aza.

²²Hoy Rafahafatesana sy Rafandravana hoe: «Eny, renay siosio fotsiny ny aminy.»

²³Fa Andriamanitra no mahalala ny lalana mankany, ary Izy ihany no mahafantatra ny misy azy.

²⁴Fa mahatsinjo hatrany am-paran’ny tany Izy ary mahita izao rehetra ambanin’ny lanitra izao.

²⁵Rehefa nametra ny lanjan’ny rivotra sy nandraikitra ny fatran’ny rano Izy

²⁶ary nandrindra lalàna ho an’ny orana sy nanori-dalana ho an’ny kotroka,

²⁷dia nahita ny Fahendrena ka nanambara ny hatsarany nony avy nandinidinika azy ary koa namotopototra ny aminy.

²⁸Dia hoy Andriamanitra tamin’ny olona: «Ny fanajana ny Tompo, izany no Fahendrena; ary ny fialana amin’ny ratsy no fahalalana[60].»