Read Dikateny Iombonana Eto Madagasikara Jôba 3 Bible Online

Jôba 3 - Dikateny Iombonana Eto Madagasikara bible

Jôba 3

¹Niloa-bava ihany i Jôba tamin’ny farany ka nanozona ny andro nahaterahany[7].

²Nandray fitenenana izy ka nanao hoe:

³Enga anie ka hofoanan’Andriamanitra ny andro nahaterahako sy ny alina izay nanao hoe; «zazalahy no torontoronina»!

⁴Ho tonga haizina anie izany andro izany, ka tsy hotsarovan’Andriamanitra any ambony any ary tsy hisy mazava hamiratra aminy intsony.

⁵Izay aloka mainty indrindra anie handrakotra azy; ary aoka hisy raho-matevina hitatao aminy na koa fanakona-masoandro mahatahotra.

⁶Enga anie ka izany no ho alina maizina indrindra ka tsy ho tafasisika amin’ny marikandro-taona ary tsy hiditra intsony amin’ny fanisàm-bolana.

⁷Ho momba anie izany alina izany ka tsy handrenesam-pihobiana mihitsy!

⁸Hanozona azy anie ny mpanozona andro izay mahay mamoha ilay dragona lehibe[8]!

⁹Tsy hahita ny kintan’ny maraina ka hiandry ny mazava tsy ho tonga ary koa tsy hahatsinjo akory ny fiposahan’ny mazava atsinanana!

¹⁰Satria tsy nahasakana ny hahaterahako izy sy ny hahitako izao fahoriana izao.

¹¹Nahoana aho no tsy maty hatrany am-bohòka, na tsy niala aina fony vao nivoaka avy tany an-kibo?

¹²Nahoana no nisy lohalika roa nandray ahy sy nono roa ninonoako?

¹³Tahaka izay aho mba nilamina tany am-pasana ka nandry am-piadanana feizay

¹⁴niaraka tamin’ny mpanjaka sy ireo mpifehy ny tany izay nanangana indray ny tsangambato efa rava,

¹⁵na niaraka tamin’ny andriandahy be volamena sady manana volafotsy mameno trano.

¹⁶Na koa naleoko fotsiny tsy ary toy ny zaza tsy azo ka nafenina, dia toy ny zaza tsy nahita mazava.

¹⁷Any ny olon-dratsy no mitsahatra amin’ny fampahoriana ary any ny reraka no miala sasatra.

¹⁸Mahita fiadanana koa ny mpigadra, ka tsy handre intsony ny antsoantson’ny mpiambina.

¹⁹Samy tafakambana any na kely na lehibe ary ny mpanompo aza dia ho afaka amin’ny tompony.

²⁰Nahoana no ataon’Andriamanitra mahita masoandro ny olona ory ary ataony velona ireo tototra alahelo?

²¹Miandry ny fahafatesana tsy ho tonga izy[9] sady mitady azy fatratra mihoatra noho ny harena.

²²Hibita-kafaliana tokoa ireo sady ravoravo hahazo fasana!

²³Nahoana no velona ny olona tsy mahita lalan-kombana fa toa voahidin’Andriamanitra ho anaty tamboho.

²⁴Eny, toloko hatrany no sakafo fihinako ka migororoana toy ny rano ny fidradradradrako.

²⁵Izay atahorako ka mampitebiteby ahy no tanteraka sy mihatra amiko.

²⁶Tsy manam-pitoniana na fiadanana aho, tsy misy fitsaharana fa tebiteby lava.