Read Dikateny Iombonana Eto Madagasikara Jôba 31 Bible Online

Jôba 31 - Dikateny Iombonana Eto Madagasikara bible

Jôba 31

¹Efa nanao fanekena tamin’ny masoko aho, fa tsy hanam-pijery mitsiriritra tovovavy.

²Raha tsy izany dia inona no lova ho ahy avy amin’ilay Andriamanitra Tsitoha any amin’ny toerana ambony any?

³Tsy loza va no anjaran’ny ratsy fanahy, ary fahoriana ho an’ny mpanao heloka?

⁴Moa tsy hitan’Andriamanitra ve ny toetrako? Moa tsy manisa ny diako rehetra ve Izy?

⁵Raha tàhiny nandeha tamin’ny lainga aho na nihazakazaka ho amin’ny fitaka,

⁶dia enga anie holanjain’Andriamanitra amin’ny mizana tsy mandainga hahafantarany fa tsy manan-tsiny aho.

⁷Fa raha niala tamin’ny lalany ny diako na nanaraka ny filan’ny maso ny foko na nisy tsiny niraikitra tamin’ny tanako,

⁸dia aoka olon-kafa no hihinana izay nafafiko na aoka hongotana ny zavatra izay namboleko.

⁹Raha tàhiny sodokam-behivavy iray ny foko ka namitsaka teo am-baravaran’ny namako aho,

¹⁰dia aoka hampiasain’olon-kafa ny vadiko[66], ary aoka ny olon-drehetra no handry aminy!

¹¹Fa fanitsakitsaham-bady izany nataoko izany, eny, heloka melohin’ny mpitsara.

¹²Afo mandevona hatrany am-pahaverezana izany, ka handrava ny vokatro manontolo.

¹³Raha tàhiny nanan-drariny ny mpanompolahiko na ny mpanompovaviko izay nifamaly tamiko, dia tsy nolaviko fa notandroviko tokoa.

¹⁴Raha tsy izany, dia inona no hataoko, rehefa hitsangana hiampanga ahy Andriamanitra? Ary inona no havaliko, rehefa mamototra Izy?

¹⁵Moa tsy Andriamanitra iray ihany no nahary anay tao an-kibon-dreninay, sady Izy koa no namolavola anay tao am-bohoka na ny tenako na ireo mpanompoko ireo?

¹⁶Moa efa nanosi-bohon-tanana ny mahantra ve aho ka nahapahina ny mason’ny mpitondratena,

¹⁷na nihinana samirery ny mofoko, ka tsy namela akory ho an’ny kamboty?

¹⁸Fa hatramin’ny fahatanorako aho dia tahaka ny ray niahy ny kamboty; ary hatramin’ny fahazazako aho ny mpitondratena no nikarakara.

¹⁹Moa efa nahita mahantra mitanjaka ve aho na fadiranovana tsy nanan-kitafy,

²⁰ka tsy nisaotra ahy ny tenany noho izy nomeko akanjo nanafana azy dia akanjo natao tamin’ny volon’ondriko?

²¹Raha naninji-tanana hampahory ny kamboty aho satria mahita fa iandaniam-pitsarana,

²²dia aoka ny soroko hiendaka amin’ny toerany ary ny sandriko hitsoaka amin’ny kihoko.

²³Satria matahotra ny famaizan’Andriamanitra aho ka tsy afa-manoatra manoloana ny fiandrianany.

²⁴Moa nametra-pitokiana tamin’ny volamena ve aho na nanao taminy hoe: «Ianao no aroko»?

²⁵Tsy nifaliako noho ny habetsahan’ny fananako sy ireo harena voaangon’ny tanako.

²⁶Raha nahita ny masoandro mamirapiratra aho na ny volana mizotra mangarangarana,

²⁷moa voababo mangingina hitsaoka azy ve ny foko, ary moa nanoroka tanana ve aho ho fanajana azy?

²⁸Ny fanaovako izany zavatra izany dia heloka melohin’ny mpitsara ihany koa, satria fandavako an’Andriamanitra Avo Indrindra.

²⁹Moa faly tamin’ny fahavoazan’ny fahavaloko ve aho na nibitabitaka raha nianjadiam-pahoriana izy?

³⁰Tsia, fa tsy navelako hanota akory ny vavako ka hanompa azy sy hanozona azy ho faty.

³¹Moa ny fianakaviambeko tsy efa nanao hoe: «Iza no tsy novokisany hena?»

³²Tsy nandry tany alatrano ny vahiny, fa novohako varavarana hatrany[67].

³³Moa nanafina ny fahadisoako tahaka ny sarambaben’olona[68] ve aho na nikobona ny heloko tato anatiko?

³⁴Tsia, tsy natahotra ny vavam-bahoaka aho na nanahy ny fanaratsian’ny fokonolona, ka hoe hangina ary tsy sahy hivoaka ny trano.

³⁵Satriko mba hisy hihaino ahy, fa azoko soniavina izay voalazako[69]! Hamaly ahy anie Andriamanitra Tsitoha. Fa ny amin’ny taratasy fiampangana voasoratry ny mpifanandrina amiko

³⁶dia hiantsorohako tokoa izany ary hisatrohako toy ny satroboninahitra aza.

³⁷Hambarako amin’Andriamanitra ny zavatra tsirairay nataoko; ary toy ny zanak’andriana aho[70] ka tsy matahotra hanatona Azy.

³⁸Raha niantso tody tamiko ny tany voleko ka niara-nitomany ny vavasako,

³⁹raha nihinam-bokatra maimaim-poana aho ka tsy nanaja ny zon’ireo mpiasako,

⁴⁰dia aoka ny tsilo no haniry hisolo ny varimbazaha ary ny ahi-dratsy no hirobona hisolo ny ôrza! Tapitra ny tenin’i Jôba.