Read Dikateny Iombonana Eto Madagasikara Jôba 32 Bible Online

Jôba 32 - Dikateny Iombonana Eto Madagasikara bible

Jôba 32

¹Noho i Jôba nihevi-tena ho marina, dia nitsahatra tsy namaly azy intsony i Elifaza sy i Bildada ary i Tsôfara.

²Koa nirehi-pahatezerana noho izany i Elihò zanakalahin’i Barakela avy amin’ny fokon’i Boza[71] sady anisan’ny tarik’i Rama; tamin’i Jôba no nirehetan’ny fahatezerany, satria mihambo ho marina i Jôba teo anoloan’Andriamanitra.

³Nirehi-pahatezerana tamin’ny sakaizany telolahy koa i Elihò, satria sady tsy nahita valinteny ho an’i Jôba ireo no nanome tsiny an’Andriamanitra.

⁴Fa mbola niandry i Elihò vao niteny tamin’i Jôba, satria be taona kokoa noho izy ny hafa.

⁵Rehefa hitany anefa fa tsy nanan-kavaly intsony izy telolahy, dia nirehitra ny fahatezerany.

⁶Dia niteny i Elihò zanakalahin’i Barakela avy amin’ny fokon’i Boza ka nanao hoe: Mbola tanora loatra aho fa ianareo kosa efa be taona koa dia natahotra aho aloha ary tsy sahy nanambara taminareo izay mba fantatro.

⁷Fa hoy aho anakampoko hoe: «Aoka ny be taona hiteny, ary ny anti-panahy hampianatra ny fahendrena.»

⁸Kanefa ao amin’ny olombelona ao dia ny fanahy, na ny fofonain’ilay Tsitoha, no manome fahalalana azy.

⁹Fa tsy hoe taona na traikefa ananana no mampahendry sy ahalalana ny marina.

¹⁰Noho izany, mangataka anareo aho hihaino ahy fa hambarako aminareo koa izay mba fantatro.

¹¹Mba niandry izay kabarinareo aho ary nampandry sofina tamin’izay halahatrareo, mandra-pandinidinikareo izay holazaina.

¹²Eny, nihaino tsara anareo aho, fa tsy nisy naharesy lahatra an’i Jôba ianareo.

¹³Ary aza manao hoe: «Efa hitanay ny fahendrena: Andriamanitra fa tsy olombelona no hamaly azy.»

¹⁴Tsy nikabary hamely ahy anefa i Jôba, ary tsy ny teninareo no hamaliako azy.

¹⁵Indro fa very hevitra izy telo lahy, ry Jôba, hany ka tsy mamaly anao intsony ary tsy mahita izay hotenenina.

¹⁶Niandry foana aho fa tsy niteny izy sady nijanona tsy namaly intsony;

¹⁷koa anjarako indray no miteny hanambara izay mba fantatro.

¹⁸Fa feno izay tokony holazaina ny foko; fanoitra ato anatiko no manery ahy hiteny[72].

¹⁹Mamorivory toa iotrehan-divay ny ato anatiko ka tahaka ny siny hoditra vaovao efa ho triatra.

²⁰Koa avelao aho hiteny hampahamaivana ahy; dia ho afaka hanoka-bava aho ka hamaly.

²¹Tsy mba hizaha tavan’olona aho na handodoka na iza na iza;

²²fa tsy mahay mandodoka olona aho, sao hofoanan’ny Mpahariko tsy ho ela.