Read Dikateny Iombonana Eto Madagasikara Jôba 35 Bible Online

Jôba 35 - Dikateny Iombonana Eto Madagasikara bible

Jôba 35

¹Dia nanohy ny teniny i Elihò ka nanao hoe:

²— Moa heverinao ho rariny ve ny filàzanao hoe: «Marina eo anoloan’Andriamanitra aho»,

³na ny fanontanianao hoe: «Mampaninona Anao moa izany? Inona no tombontsoako raha tsy manota aho?»

⁴Izaho no hiteny hamaly anareo miaraka, dia ny tenanao mbamin’ireto namanao.

⁵Andrandrao ny lanitra ka diniho; jereo ny rahona fa manerinerina amboninao!

⁶Raha manota ianao, hahakasika azy va izany? Ary mampaninona azy moa ny fikomianao maro?

⁷Raha manao ny marina ianao, hitondra inona aminy moa izany, na inona no horaisiny avy aminao?

⁸Fa na ny tsara vitanao na ny ratsy nataonao, dia ny olona toa anao ihany no iharany[80].

⁹Rehefa mafy loatra ny famoretana, dia mitaraina ny olona; ka miantso vonjy izy hiaro azy amin’ny famelezan’ireo mahery.

¹⁰Nefa tsy mba misy manao hoe: «Aiza Andriamanitra Mpanao ahy sady mampihira fankalazana Azy amin’ny alina[81]?

¹¹Aiza Andriamanitra Izay mampianatra antsika amin’ny alalan’ireo biby ambonin’ny tany ary koa mampahahendry antsika amin’ny alalan’ireo voromanidina?»

¹²Miantso vonjy ny olona ampahorîna fa tsy mamaly azy Andriamanitra satria mpirehareha sy ratsy toetra ireo.

¹³Eny, ilay Andriamanitra Tsitoha dia tsy mihaino ny fitarainam-poana sady tsy mba miraharaha izany.

¹⁴Ary dia sahinao lazaina aza, ry Jôba, fa tsy mahita an’Andriamanitra ianao sady mbola miandry Azy hatrany, kanefa ny raharahanao efa mby eo anoloany;

¹⁵ankehitriny, heverinao fa tsy mihatra ny fahatezeran’Andriamanitra; ary tsy fantany akory ny fikomian’ny olona.

¹⁶Koa miloa-bava milaza hevi-poana ianao ary mandahatra teny maro tsy misy dikany.