Read Dikateny Iombonana Eto Madagasikara Jôba 36 Bible Online

Jôba 36 - Dikateny Iombonana Eto Madagasikara bible

Jôba 36

¹Nanohy indray ny teniny i Elihò ka nanao hoe:

²Mahareta kely amiko, ry Jôba, fa hampianariko ianao; satria mbola misy teny hiandaniako an’Andriamanitra.

³Ny fahalalako avy amin’ny sehatra midadasika no entiko hanomezan-drariny an’Andriamanitra Mpanao ahy.

⁴Fa tsy misy lainga tsy akory izay lazaiko; satria lehilahy azo antoka amin’ny fahalalana izaho izay eto aminao izao.

⁵Jereo fa mahery Andriamanitra kanefa tsy mba manambany olona; eny, mahery tokoa Izy ka hentitra amin’ny fanapahan-keviny.

⁶Tsy mamela ny olon-dratsy ho ela velona Izy fa manome rariny kosa ny mahantra.

⁷Miahy ny olo-marina mandrakariva Izy ka manandratra voninahitra azy sy mampaharitra azy eo amin’ny fitondrana toy ny mpanjaka eo amin’ny sezafiandrianany.

⁸Fa raha olo-marina no voagadra rojo vy sady voagejam-pahoriana,

⁹dia ny asany no ambaran’Andriamanitra azy: manota ireo, satria niavonavona.

¹⁰Dia manokatra sofina azy Andriamanitra mba hihaino ny fananarany ka mandidy azy hiala amin’ny ratsy.

¹¹Raha mety mihaino an’Andriamanitra izy, dia amin’ny fahasambarana sy ny hamamiana no handaniany ny androny sy ny taonany.

¹²Fa raha tsy mety mihaino kosa izy, dia ho faty hiharan-tsabatra noho izy tsy manam-pahalalana akory[82].

¹³Fa ny ratsy fanahy dia tezitra aminy ka tsy mahataraina na dia gadrainy aza.

¹⁴Koa dia maty tanora sy ratsy fiafara ireo toy ny olona iharan’ny fahafaham-baràka[83].

¹⁵Fa ny fahorian’ny ory kosa no entin’Andriamanitra mamonjy azy, ary ny loza mianjady aminy no entiny mampianatra azy.

¹⁶Fahiny dia nalany tamin’ny fahaterena ianao ka napetrany tamin’ny toera-malalaka, ary dia ny hanim-py no naroso teo ambonin’ny latabatrao.

¹⁷Fa voaheloka toa olon-dratsy ianao izao, ary didim-pitsarana tsy azo ivalozana izany.

¹⁸Aoka tsy hampisendaotra anao ny famaizana, ary tsy hampivily anao ny fanaovan-kolikoly.

¹⁹Hahafa-pahoriana anao ve ny fitarainana sy ny fiezahana mafy rehetra ataonao?

²⁰Aza manantena koa ny alina hanaisotra ny olona amin’ny toerany.

²¹Koa mitandrema sao mivily ho amin’ny ratsy fa hisedrana anao izao fampahoriana izao.

²²Jereo fa mahery ny fiandrianan’Andriamanitra; Iza no mahay mampianatra tahaka Azy?

²³Iza no mahabaiko an’Andriamanitra amin’izay tiany hatao? Ary zovy no sahy hiteny aminy hoe: «Tsy mety ny nataonao»?

²⁴Tsarovy ny mankalaza ny asany izay efa noderain’ny olona an-kira.

²⁵Fa banjinin’ny olona rehetra izany, ary na avy lavitra aza dia tazany.

²⁶Eny, lehibe Andriamanitra ka tsy takatry ny saintsika; tsy tambo isaina velively ny taona naha Andriamanitra Azy.

²⁷Sintoniny tsikelikely ny rano, dia lasa etona ka tonga orana.

²⁸Ary avelan’ny rahona hilatsaka izany ka mifafy amin’ny besinimaro.

²⁹Iza koa no mahafantatra ny amin’ny fivelatry ny rahona sy ny fipoakan’ny kotroka eo amin’ny andohalambo[84] izay fonenan’Andriamanitra?

³⁰Indro Izy fa manapariaka ny tselatra eny ambonin’ny rahona eny ary mandrakotra ny fanambanin-dranomasina.

³¹Amin’ireny no anafaizany ny vahoaka na anomezany azy hanina betsaka.

³²Manafina ny tselatra eny an-tanany Izy ka mibaiko azy hahavoa izay kendreny.

³³Manambara ny fiavian’ny orana ny kotroka; ka na ny biby fiompy koa dia mahatsapa izany.