Read Dikateny Iombonana Eto Madagasikara Jôba 4 Bible Online

Jôba 4 - Dikateny Iombonana Eto Madagasikara bible

Jôba 4

¹Dia nandray fitenenana i Elifaza avy any Temàna ka nanao tamin’i Jôba hoe:

²Tsy misy sahy miteny aminao, satria sorena mafy ianao[10]; nefa tsy azo atao ny hangina ela intsony.

³Indro efa nanabe olona maro ianao ary nampahery ireo niraviravy tanana.

⁴Ny teninao no nampitraka ireo efa saiky lavo; efa nampatanjaka lohalika mangozohozo ianao.

⁵Ankehitriny, tojo izany ianao ka kivy, mby an-koditrao ka mahaketraka anao!

⁶Satria nanaja an’Andriamanitra ianao sy nanana fitondrantena mendrika, ka moa tsy hatoky sy hanantena va?

⁷Tsarovy izao: efa nahita tsy manan-tsiny na olo-marina maty nahantra ve ianao?

⁸Hitako tsara fa izay mamboly tsy fahamarinana sy mamafy fahoriana no hijinja ny vokany.

⁹Ny fofonain’Andriamanitra no andringanana azy; ny fahatezerany no toa rivo-mahery mahalevona azy;

¹⁰na mierona toa liona izy na minaonaona toa tigra, dia tapatapahiny nify ireo toa biby masiaka ireo.

¹¹Lany remby ny bibidia ka maty; ary ny zanaky ny liom-bavy kosa miparitaka.

¹²Nisy teny izay tonga tamiko mangingina; ary bitsika malefaka no reko taminy.

¹³Noho ny eritreritra misafotofoto vokatry ny nofy amin’ny alina raha sondrian-tory ny olona[11],

¹⁴dia nangovitry ny tahotra aho ka nipararetra ny taolako rehetra.

¹⁵Ary nisy rivotra nisafo ny tavako ka nampihoron-koditra ny tenako.

¹⁶Nisy endrik’olona mitsangana nefa tsy fantatro, fa manjavozavo izy no teo anoloan’ny masoko. Dia nangina aloha, vao nisy niteny hoe:

¹⁷«Ho marina sy ho madio ve ny olona eo anatrehan’Andriamanitra Mpahary azy?

¹⁸Indreo ny mpanompony aza tsy atokiany, ary ny anjeliny mbola ahitany tsininy;

¹⁹koa mainka fa izay olombelona mora potika toa tanimanga, sady vovo-tany no fiaviany! ka mety voaporitra tahaka ny fositra.

²⁰Indray andro monja no hahamontsana sy hahalevona azy mandrakizay; ka tsy hisy hahatandrintandrina akory.

²¹Tsy efa tapaka va ny kofehin-dainy? Ho faty tsy manam-pahendrena izy.»