Read Dikateny Iombonana Eto Madagasikara Jôba 41 Bible Online

Jôba 41 - Dikateny Iombonana Eto Madagasikara bible

Jôba 41

¹Nofinofy ny fanantenana handresy ny voay, fa ny fahitana azy fotsiny dia mahaketraka.

²Tsy misy olona sahy mihantsy ady aminy, koa zovy kosa no sahy hifanandrina amiko?

³Fa tsy ananan’olon-trosa Aho: Ahy izay rehetra eny ambany masoandro.

⁴Kanefa mbola holazalazaiko izao ny amin’ny rantsam-batan’ny voay sy ny antsipirian’ireo asa mahery vitany ary ny hatsàran’ny endrika ananany.

⁵Iza no mahainga ny fitafiany ivelany, na handoaka ny akanjovy matevina ifonosany?

⁶Iza koa no sahy hanokatra ny vavany, fa ireo nifiny dia mampihorohoro izay olona eny manodidina?

⁷Ny lamosiny dia voasaron’ampinga milahatra[96] sady tafatambatra mafy sy mifanety.

⁸Mifanakaiky dia mifanakaiky ireo ka tsisy hirika idiran-drivotra akory.

⁹Mifanindry sy mifamikitra koa ireo ka tsy azo sarahina mihitsy.

¹⁰Vao mievina ny voay, dia mamoaka hazavana; ka ny masony manjary manjopiaka toy ny masoandro vao miposaka.

¹¹Ny vavany kosa ivoahan’ny lelafo sy ipariahan’ny kilalaon’afo.

¹²Mivoa-tsetroka ny vavoron’ny voay mova tsy vilany mangotraka notanehina tamin-jozoro.

¹³Mampirehitra arina ny fofonainy, satria lelafo no avoaky ny vavany.

¹⁴Ny vozony no itoeran-kery ka mihorohoro izay mahita azy.

¹⁵Mivalombalona ireo hotraky ny voay, ka mafy sady mihenjana tsy voalefitra.

¹⁶Mafy tahaka ny vato ny fony, eny, mafy toy ny vato fikosoham-bary.

¹⁷Rehefa mitsangana ny voay, dia mangovitra ireo filoha[97] fa tsy afa-manoatra noho ny tahotra.

¹⁸Tsy misy sabatra mahalaitra azy, toy izany koa ny lefompohy na ny firombaka na ny zana-tsipîka.

¹⁹Toy ny mololo ny vy aminy ary toy ny hazo boboka ny varahina.

²⁰Tsy mampandositra azy izay zana-tsipîka, ataony toy ny mololo ny vaton’antsamotady

²¹Toy ny vodivary ny langilangy aminy; ihomehezany ny firimorimon’ny lefona.

²²Feno fantsika miranirany ny takiban’ny voay ka mikisaka mova tsy hersa manditra fotaka.

²³Rehefa misitrika anaty rano lalina izy, dia mampandroadroatra izany toa rano mangotraka ao am-bilany ary manova ny farihy ho fandoroan-java-manitra[98].

²⁴Mamela dindo mazava eo aoriany izy ka ny onja dia tahaka ny volofotsy mitsinkafona eny amin’ny rano lalina.

²⁵Tsy misy tahaka ny voay eny ambonin’ny tany fa noariko tsy hanan-tahotra izy.

²⁶Bandrininy avokoa ny biby goavana; izy no mpanjakan’ny biby masiaka rehetra.