Read Dikateny Iombonana Eto Madagasikara Jôba 42 Bible Online

Jôba 42 - Dikateny Iombonana Eto Madagasikara bible

Jôba 42

¹Namaly ny Tompo i Jôba ka nanao hoe:

²Fantatro fa mahay ny zava-drehetra Ianao, ary tsy misy maharara izay tianao hatao.

³Hoy Ianao tamiko: «Zovy moa ianao no sahy manivaiva ny fikasàko amin’ireo teny foana tsisy dikany[99]?» Eny, zava-tsy takatry ny saiko no voateniko dia zava-mahagaga loatra amiko sady tsy fantatro!

⁴«Henoy, hoy Ianao, fa mbola hiteny Aho; hanontany anao Aho ka hovalianao[100].»

⁵Tsy nahafantatra ny aminao aho afa-tsy izay henoko momba Anao ihany. Kanefa ankehitriny izao kosa dia ny masoko no nahita Anao.

⁶Izany no anatsoahako izay voambarako, sy iekeko hadisoana ary ietreko tena eto amin’ny vovoka sy ny lavenona.

⁷Rehefa voalazan’ny Tompo tamin’i Jôba ireo teny ireo, dia i Elifaza avy any Temàna no nataotaony hoe: — Tezitra aminao sy ny namanao roa lahy Aho satria tsy mba marina tahaka izay nolazain’i Jôba mpanompoko ny filàzanareo Ahy.

⁸Koa ankehitriny makà ombilahy fito sy ondrilahy fito ianareo, dia mankanesa any amin’ny Jôba mpanompoko. Hatolotrareo ho sorona dorana manontolo noho ny fahotanareo ireo biby ireo; ary hifona ho anareo i Jôba mpanompoko. Fa ho sitrako ny vavak’i Jôba, ka tsy hamaly anareo araka ny hadalànareo Aho na dia tsy marina tahaka izay nolazain’i Jôba mpanompoko aza ny filàzanareo Ahy.

⁹Dia nandeha i Elifaza avy any Temàna sy i Bildada avy any Soha ary i Tsôfara avy any Nahama ka nanao izay nasain’ny TOMPO hataony; ary sitraky ny TOMPO ny vavak’i Jôba.

¹⁰Rehefa avy nivavaka ho an’ireo namany i Jôba, dia naverin’ny TOMPO hanan-karena indray[101] ary nomeny indroan’izay rehetra nananany fahiny aza.

¹¹Dia tonga namangy an’i Jôba avokoa ny rahalahiny sy ny anabaviny mbamin’ny olom-pantany fahiny, ka niara-nihinana taminy tao an-tranony. Naneho fiombonana taminy koa ireo sady nampionona azy noho ny loza rehetra nalefan’ny TOMPO taminy. Ary samy nanolotra fanomezana vola kesita[102] iray sy rojo volamena iray avy ho azy izy rehetra.

¹²Nandritra ny taona sisa niainan’i Jôba, dia heniky ny fitahian’ny TOMPO mihoatra noho ny taloha izy, fa nanana ondry 14 000, rameva enina arivo, omby miasa roa arivo ary borikivavy arivo izy.

¹³Nanan-janakalahy fito ary zanakavavy telo koa izy,

¹⁴ka ny vavimatoa nataony hoe Jemimà, ny vaviaivo Ketsihà ary ny faravavy Kerena-Hapòka[103].

¹⁵Tao amin’ny tany iray manontolo dia tsy nisy vehivavy tsara tarehy tahaka ireo zanakavavin’i Jôba. Ary samy nomen-drainy ny anjara lovany tahaka ireo anadahiny avy izy.

¹⁶Taorian’izany dia mbola velona efapolo amby zato taona i Jôba ka nahita ireo zanany sy zafikeliny hatramin’ny zafindohaliny.

¹⁷Dia maty i Jôba rehefa ela niainana ka tratrantitra.