Read Dikateny Iombonana Eto Madagasikara Jôba 8 Bible Online

Jôba 8 - Dikateny Iombonana Eto Madagasikara bible

Jôba 8

¹Dia nandray fitenenana i Bildada avy any Soha ka nanao tamin’i Jôba hoe:

²Hafiriana no mbola hitenenanao toy izany? Ary mandra-pahoviana ny teny aloaky ny vavanao no hisafotofoto tahaka ny rivo-mahery?

³Moa hampandefitra ny rariny ve Andriamanitra? Moa hamadika ny fahamarinana ilay Tsitoha?

⁴Mety ho nanota tamin’Andriamanitra ny zanakao, dia nampanodiaviny azy ny heloka vitany.

⁵Raha ianao kosa no mitady an’Andriamanitra ka manao fitalahoana amin’ilay Tsitoha,

⁶ary raha tsy manan-tsiny sy mahitsy ianao, dia Izy no hijoro hiahy anao ka hamerina indray ny fiadanana amin’ilay fonenam-pahamarinanao.

⁷Ary ho bitika ihany izay nosantarinao taloha raha mitaha amin’ny hoavinao mamirapiratra.

⁸Fa mba anontanio ange ntaolo e! Ka ianaro izay traikefan’ireo razany.

⁹Tsy misy zava-pantatsika izay vao omaly, satria aloka mihelina vetivety ihany ny androm-piainantsika eto an-tany.

¹⁰Ry zareo no hanoro sy hampianatra anao; ary dia hamoaka ny oha-pitenenana izay vokatry ny fieritreretany toy ny hoe:

¹¹«Tsy maniry ivelan’ny heniheny ny zozoro, ary tsy mitombo tsy misy rano ny volotara.

¹²Vao mamelana fotsiny izy, ary mbola tsy voatapaka; saingy rehefa tsy mahazo rano intsony izy, dia malazo alohan’ny ahitra hafa rehetra.»

¹³Izay rehetra manadino an’Andriamanitra dia toy izany no anjara miandry azy; ho levona ny fanantenan’ny tsy mpivavaka.

¹⁴Fa ho maito ny fahatokian-tenany; ary ho marefo tahaka ny tranon-kala ny fianteherany.

¹⁵Miankina amin’ny tranony izy, kanjo mihilangilana izany; mamikitra mafy hitazonana azy izy, nefa mirodana tsy voatana izany.

¹⁶Ny tsy mpivavaka dia tahaka ny hazo izay feno tsiron-tany sady hazavain’ny masoandro. ka ny rantsany misandrahaka eo ambonin’ny tanimboly misy azy.

¹⁷Mifanolanolana eny amin’ny korontam-bato ny fàkany ka tanteraka hatrany an-tsefatsefa-bato any.

¹⁸Rehefa ongotana amin’ny toerany anefa izy, dia handà ho tsy mbola nahita azy akory io.

¹⁹Jereo fa izany no fifaliana miandry ny tsy mpivavaka; ary hisy zava-maniry hafa indray hitrebona avy amin’io tany io.

²⁰Jereo kosa fa Andriamanitra tsy manary ny tsy manan-tsiny ary tsy manome tanana ny mpanao ratsy.

²¹Mbola hofenoiny hehy ny vavanao ary horakora-pifaliana ny molotrao, ry Jôba.

²²Fa ho afa-baràka ireo mpankahala anao; ary hanjavona ny fonenan’ny olon-dratsy.