Read Dikateny Iombonana Eto Madagasikara Salamo 10 Bible Online

Salamo 10 - Dikateny Iombonana Eto Madagasikara bible

Salamo 10

¹Nahoana Ianao, TOMPO ô, no mijanona eny lavitra eny? Ary nahoana Ianao no miery amin’ny androm-pahoriana?

²Mirehaka erỳ ny olon-dratsy mitsentsitra ny malahelo; tamina tetika maty paika no namelezany azy ireo.

³Mibitaka erỳ ny olon-dratsy fa mahazo izay nirîny; kanefa ny TOMPO tsiratsirainy sady hamavoiny tokoa.

⁴Ny olon-dratsy mirehareha hoe: «Tsy hanadina Andriamanitra, tsy misy Andriamanitra.» Izany no ambentin-keviny.

⁵Mahomby mandrakariva ny zavatra ataony, vingavingainy avokoa izay manohitra azy, tsy tazany ny fitsaran’Andriamanitra.

⁶Hoy ny olon-dratsy anakampony: «Tsy misy atahorako akory, fa ieren-doza hatrany aho.»

⁷Ozona sy fitaka ary hafetsena no mameno ny teny lazainy[21]; fampahoriana sy faharatsiana no zavatra tiany hambara.

⁸Mamitsaka hanotrika eny akaikin-tanàna izy ary mamono an-katakonana ny tsy manan-tsiny; ny masony mitily ireo fadiranovana.

⁹Manotrika an-katakonana tokoa izy toy ny fanaon’ny liona ao am-pierena; manotrika hisambotra ny malahelo izy ka mitarika azy ho ao anaty haratony.

¹⁰Torotoro ny malahelo fa resy mihitsy ka mianjera ho eo ambany fahefàny.

¹¹Dia hoy ny olon-dratsy anakampony: «Tsy raharahain’Andriamanitra izany sady ikimpiany fa tsy mba jereny ary tsy hitany na oviana na oviana!»

¹²TOMPO Andriamanitro ô, mirotsaha an-tsehatra. Ahinjiro ny tananao hanafay ny olon-dratsy ka aza hadinoina re ireo malahelo.

¹³Nahoana moa ny olon-dratsy no haneso Anao Andriamanitra, ka hiteny anakampo hoe: «Tsy hanadina ahy Izy!»?

¹⁴Hitanao fa mijaly sy ory ny mahantra, ka mivonon-kanampy azy hatrany Ianao; Ianao no itokian’ny malemy, sady mamonjy ny kamboty.

¹⁵Koa poteho ny herin’ny olon-dratsy, adino aminy ny ratsy nataony ary aoka izy tsy ho hita soritra intsony!

¹⁶Ny TOMPO no mpanjaka mandrakizay mandrakizay; ho fongotra amin’ny taniny ny mpanompo sampy.

¹⁷TOMPO ô, renao ny fanirian’ny malahelo ka ampaherezinao tokoa ny fony.

¹⁸Vonon-kihaino hatrany ny kamboty sy ny ampahorîna Ianao mba hanomezanao azy ny rariny. Dia ho foana tanteraka hatreo ny mpanjakazaka etỳ an-tany.