Read Dikateny Iombonana Eto Madagasikara Salamo 102 Bible Online

Salamo 102 - Dikateny Iombonana Eto Madagasikara bible

Salamo 102

¹Vavaky ny ory, rehefa trotraka izy ka mamboraka ny tarainany amin’ny TOMPO.

²TOMPO ô, mba henoy vavaka aho; aoka ho tonga any aminao ny tarainako!

³Aza lavinao ny hijery ahy amin’ny androm-pahoriako. Anongilano sofina aho ka valio faingana amin’ny andro iantsoako vonjy aminao.

⁴Fa levona toy ny setroka ny androm-piainako, ary kila toy ny tapa-porohana ny faraheriko.

⁵Toy ny ahitra voakapa ny foko ka malazo; hadinoko mbamin’ny homan-kanina aza.

⁶Reraka noho ny fisentoako aho, ka taolana sisa no mipetaka amin’ny hoditro.

⁷Sahala amin’ny vorondreo any an-taniefitra aho ary tahaka ny vorondolo an-tanàna aolo.

⁸Tsy mahita tory aho, fa mitoloko tahaka ny voro-manirery eny an-tafontrano.

⁹Tontolo andro aho latsaim-pahavalo sady iozonany amin-karomotana.

¹⁰Lavenona no toy ny sakafo hohaniko, haroiko ranomaso ny zavatra sotroiko.

¹¹Noho ny fahatezeranao sy ny fahaviniranao, dia ningainao aho ka natsipinao lavitra.

¹²Toy ny fandroson’ny aloka ny androm-piainako; ary mihamalazo toy ny ahitra ny tenako.

¹³Ianao kosa, TOMPO ô, manjaka mandrakizay ary maharitra hatrany hatrany ny lazanao.

¹⁴Hirotsaka an-tsehatra Ianao ka hamindrafo amin’i Tsiôna, fa tonga ny fotoana hiantranao azy; eny, izao no fotoana mety amin’izany.

¹⁵Fa sitrakay mpanomponao i Tsiôna, na dia rava aza ny rari-vatony; ary mampangorakoraka anay izy, na dia voarodana zary vovotany aza.

¹⁶Aoka ny firenen-kafa rehetra haneho fanajana ny TOMPO; ary aoka hiaiky Azy be voninahitra ny mpanjaka rehetra eto an-tany!

¹⁷Fa rehefa hanangana indray an’i Tsiôna IZY ka hiseho miharihary amim-boninahitra,

¹⁸dia hitodika ny vavak’ireo norobaina ary tsy hanositosika ny fangatahany.

¹⁹Soraty izany ho an’ny taranaka any aoriana ka hidera ny Tompo ireo vahoaka mbola ho ary[239].

²⁰Avy any an-Toeramasiny any ambony ny TOMPO no miondrika mba hijery; avy any an-danitra any Izy no nitazana an’ity tany ity,

²¹ka nihaino ny tarainan’ireo voafonja sy namaha ny fatoran’ireo voaheloka ho faty.

²²Dia hambara ao Tsiôna ny lazan’ny TOMPO ary hohiraina ao Jerosalema ny fiderana Azy,

²³rehefa ho tafaray ao ireo vahoaka sy ireo fanjakana mba hanao fanompoam-pivavahana ho an’ny TOMPO.

²⁴Mbola teo antsasa-dalam-piainako aho, Tompo ô, no nahenanao ny heriko ary nohafohezinao ny androko.

²⁵Ka hoy aho hoe: «Andriamanitra ô, aza alainao eny antenatenan’ny androm-piainako aho; fa ny taonanao tsy mba ho tapitra rahoviana.»

²⁶Fahiny elabe no nanorenanao ny tany sy nanamboaranao ny lanitra.

²⁷Mbola ho levona ireo fa Ianao kosa maharitra. Mihatonta toy ny fitafiana ireo; hosoloanao toa akanjo, dia voasolo;

²⁸fa Ianao kosa tsy mba miova ary ny taonanao tsy mba hifarana[240].

²⁹Ny zanakay hiorim-ponenana feizay ary ny taranakay hateza eo anatrehanao.