Read Dikateny Iombonana Eto Madagasikara Salamo 103 Bible Online

Salamo 103 - Dikateny Iombonana Eto Madagasikara bible

Salamo 103

¹Nataon’i Davida. Aoka hisaotra ny TOMPO aho, hisaotra eram-po ny anarany masina!

²Eny, aoka hisaotra ny TOMPO aho, ka tsy hisy hohadinoiko ny soa nataony!

³Fa Izy no mamela ny heloko rehetra ary manasitrana ny aretiko rehetra.

⁴Avotany tsy ho any an-davaka ny aiko; rakofany fitiavana sy indrafo aho.

⁵Fenoiny fahasambarana ny fiainako, ka tanora sy matanjaka toa voromahery aho.

⁶Omen’ny TOMPO rariny sy hitsiny izay rehetra ampahorîna.

⁷Efa nampahafantatra ny fikasany tamin’i Mosesy Izy ary ny asany mahery tamin’ny vahoaka israelita.

⁸Mpamindrafo sy mpiantra ny TOMPO, tsy mora tezitra ary be fitiavana[241].

⁹Tsy mba mandevilevy lalandava Izy, tsy mitahiry fahatezerana mandrakizay.

¹⁰Tsy araka ny otantsika no anafaizany antsika, tsy araka ny helotsika no amaliany antsika.

¹¹Fa tahaka ny haavon’ny lanitra ambonin’ny tany no haben’ny fitiavany amin’izay manaja Azy;

¹²tahaka ny halavitry ny atsinanana amin’ny andrefana no hampanalavirany amintsika ny hadisoantsika.

¹³Tahaka ny fangoraky ny ray an’ireo zanany no angorahan’ny TOMPO an’izay manaja Azy.

¹⁴Satria fantany ny namolavolana antsika, ka tsaroany tokoa fa vovoka isika.

¹⁵Toy ny ahitra ny androm-piainan’ny olombelona, toy ny voninkazo eny an-tsaha ny famoniny:

¹⁶rehefa tsofin’ny rivotra izy, dia foana ka tsy mahalala azy intsony ny toerany.

¹⁷Fa ny fitiavan’ny TOMPO kosa dia hatrizay ka ho mandrakizay amin’ireo olona manaja Azy; ary ny fahamarinany hihatra amin’ny taranaka mandimby,

¹⁸izay mitandro ny fanekempihavanany ka mahatsiaro hanatanteraka ny baikony.

¹⁹Naorin’ny TOMPO any an-danitra ny sezafiandrianany, mifehy an’izao rehetra izao ny fanjakany.

²⁰Misaora ny TOMPO, ianareo anjeliny izay hery voafantina mpanatanteraka ny teniny ka mankatò Azy raha vao mandre ny baikony.

²¹Misaora ny TOMPO, ianareo andian-tafiny rehetra izay mpanompony mpanatanteraka ny sitrany.

²²Misaora ny TOMPO, ianareo voaariny rehetra amin’ny toeran-drehetra izay anapahany. Izaho koa, aoka hisaotra ny TOMPO!