Read Dikateny Iombonana Eto Madagasikara Salamo 107 Bible Online

Salamo 107 - Dikateny Iombonana Eto Madagasikara bible

Salamo 107

¹Miderà ny TOMPO ianareo fa tsara Izy: — eny, maharitra mandrakizay ny fitiavany[292]!

²Aoka hiredona izany ny navotan’ny TOMPO, dia ireo navotany ho afaka teo an-tanan’ny mpampahory

³ka nangoniny avy tany amin’ny tany rehetra atsinanana sy andrefana, avaratra sy atsimo[293]!

⁴Tao ireo nirenireny tany an-taniefitra aman-tany foana, tsy nahita tanàna honenana akory,

⁵noana sy nangetaheta, sady reraka aina koa tao anatiny.

⁶Dia niantso vonjy tamin’ny TOMPO izy fa ory ka nafahany tamin’ny fahatereny,

⁷nentiny tamin’ny lala-mahitsy hahatongavana an-tanàna honenana.

⁸Aoka izy hidera ny TOMPO noho ny fitiavany sy ny zava-mahagaga vitany ho an’ny olombelona,

⁹fa ny main’ny hetaheta nomeny hosotroina ary ny reraky ny hanoanana novokisany soa!

¹⁰Tao ireo nipetraka tao am-ponja maizim-pito, voagejam-pahoriana sy voagadra vy,

¹¹satria nikomy tamin’ny tenin’Andriamanitra sady naniratsira ny anatr’ilay Avo Indrindra.

¹²Dia nofolahiny tamin’ny fahoriana ny fony; potraka izy, nefa tsy nisy mpanarina.

¹³Dia niantso vonjy tamin’ny TOMPO izy fa ory ka nafahany tamin’ny fahatereny,

¹⁴navoakany tamin’ny haizim-pito sady novahany fatorana.

¹⁵Aoka izy hidera ny TOMPO noho ny fitiavany sy ny zava-mahagaga vitany ho an’ny olombelona,

¹⁶satria ny vavahady varahina novakîny ary ny hidy vy notapatapahiny[294]!

¹⁷Tao ireo adala toetra nijaly tokoa noho ny hadisoana sy ny heloka vitany,

¹⁸ka nomonamonainan’ny sakafo rehetra ary efa teo ambavahaonan’ny fahafatesana.

¹⁹Dia niantso vonjy tamin’ny TOMPO izy fa ory ka nafahany tamin’ny fahatereny,

²⁰nandefasany ny teniny, dia sitrana ary notsoahany tao anaty lavaka.

²¹Aoka izy hidera ny TOMPO noho ny fitiavany sy ny zava-mahagaga vitany ho an’ny olombelona!

²²Aoka izy hanolotra sorom-piderana sy hihoby mitanisa ny asan’Andriamanitra!

²³Tao ireo niainga hiantsambo an-dranomasina sy nanao raharaha teny ambony ranobe,

²⁴dia indreo nahita ny asan’ny TOMPO sy ny zava-mahagaga nataony an-drano lalina.

²⁵Fa vao niteny ny Tompo, dia nirongatra ny rivo-mahery ka nampisamboaravoara ny onjan-dranomasina.

²⁶Ny sambo nisavoana nanakatra ny lanitra, dia nitontona ao an-davaky ny onja; fadiranovana toa miempo ny ain’ny mpiantsambo.

²⁷Fanina izy sady nivembena toy ny mamo, ka very avokoa izay mba hakingàny.

²⁸Dia niantso vonjy tamin’ny TOMPO izy fa ory ka notsoahany tamin’ny fahatereny.

²⁹Ny rivo-mahery novany ho tsiotsioka, ary ny onjan-drano nihanalefaka;

³⁰dia faly ny mpiantsambo fa nisy fitoniana sady nentin’ny Tompo an-tseranana irîna.

³¹Aoka izy hidera ny TOMPO noho ny fitiavany sy ny zava-mahagaga vitany ho an’ny olombelona!

³²Aoka hanandratra Azy ny vahoaka tafangona ary hidera Azy ny loholona tafavory!

³³Ny Tompo no manova ny ony ho taniefitra sy ny loharano ho tany mangentana

³⁴ary ny tany lonaka ho tanin-tsira, noho ny faharatsian’ny mponina eo.

³⁵Kanefa koa ny taniefitra ovàny ho farihy, ny tany karankaina ho feno loharano

³⁶mba hamponenana ireo noana izay hanorin-tanàna honenana,

³⁷hamafy eny an-tsaha sy hamboly voaloboka ka hanangona ny vokatr’ireny.

³⁸Tahîn’ny Tompo izy ka mihamaro fatratra; ny biby fiompiny koa tsy avelany hihavitsy.

³⁹Fa misy kosa firenena mihavitsy sy mietry noho ny fahoriana sy ny loza ary ny alahelo.

⁴⁰Ataon’ny Tompo rakotra henatra ny mpifehy ka mirenireny an-tany foana tsy misy lalana;

⁴¹fa atrakany ho afa-pahoriana kosa ny mahantra ary hamaroiny toy ny andian’ondry ny fianakaviany[295].

⁴²Mahita izany ny olo-mahitsy ka mifaly; fa mikombom-bava kosa ny olon-dratsy rehetra.

⁴³Izay hendry, aoka hisaintsaina izany sy hahatsapa ny fitiavan’ny TOMPO!