Read Dikateny Iombonana Eto Madagasikara Salamo 116 Bible Online

Salamo 116 - Dikateny Iombonana Eto Madagasikara bible

Salamo 116

¹Tiako ny TOMPO noho Izy mihaino ny feoko fony aho mitalaho aminy.

²Manongilan-tsofina amiko Izy ka hantsoiko, raha mbola velona koa aho.

³Ny fahafatesana toa efa nitana ahy am-patorana; ny toeran’ny maty toa efa nangeja harato ahy, tojo fahoriana sy tebiteby aho,

⁴ka niantso ny TOMPO nanao hoe: «Miangavy aho, TOMPO ô, mba vonjeo re aho!»

⁵Miantra sy marina ny TOMPO, mamindrafo ny Andriamanitray.

⁶Miaro ny olon-tsotra ny TOMPO; reraka aho ka novonjeny.

⁷«Milamîna indray, ry fanahiko, fa ny TOMPO efa nanisy soa anao».

⁸Ianao tokoa, TOMPO ô, no nanafaka ahy tsy ho faty; ka ny masoko tsy hitomany, ny tongotro tsy ho solafaka.

⁹Dia hiaina eo anatrehanao aho eto amin’ity tany ivelomanay ity.

¹⁰Natoky aho, na dia efa nahateny aza hoe[321]: «Farafahoriana tokoa aho!»

¹¹Taitra loatra aho ka loa-bolana hoe: «Mpandainga avokoa ny olombelona[322]!»

¹²Inona no havaliko ny TOMPO noho ny soa rehetra nataony tamiko?

¹³Hitondra fanatitra divay aho[323] ka hanao antso avo ny lazan’ny TOMPO.

¹⁴Hanefa ny voadiko amin’ny TOMPO aho eo anatrehan’ny vahoakany tafangona.

¹⁵Tsy sitraky ny TOMPO velively ny hahafatesan’ny mpivavaka aminy.

¹⁶TOMPO ô, mpanomponao aho; eny, mpanomponao tokoa aho sady zanaky ny mpanompovavinao, ka novahanao ny fatorako.

¹⁷Hanolotra sorom-piderana aho ary hanao antso avo ny lazan’ny TOMPO.

¹⁸Hanefa ny voadiko amin’ny TOMPO aho eo anatrehan’ny vahoakany tafangona,

¹⁹dia eo an-kianjan’ny tranon’ny TOMPO, eo afovoanao, ry Jerosalema. Haleloià!