Read Dikateny Iombonana Eto Madagasikara Salamo 118 Bible Online

Salamo 118 - Dikateny Iombonana Eto Madagasikara bible

Salamo 118

¹Miderà ny TOMPO ianareo fa tsara Izy: — eny, maharitra mandrakizay ny fitiavany[325]!

²Aoka ny Israelita hilaza hoe: — eny, maharitra mandrakizay ny fitiavany!

³Aoka ny taranak’i Aharôna[326] hilaza hoe: — eny, maharitra mandrakizay ny fitiavany!

⁴Aoka ireo mpanaja ny TOMPO hilaza hoe: — eny, maharitra mandrakizay ny fitiavany!

⁵Tao an-katerena aho no niantso ny TOMPO, ka novaliany aho, nomeny halalahana.

⁶Miandany amiko IZY ka tsy hatahotra aho; hahavita inona amiko ny olombelona[327]?

⁷Miandany amiko ny TOMPO ka manampy ahy; ireo mpankahala ahy hitako fa resiny.

⁸Aleo mialoka amin’ny TOMPO toy izay mialoka amin’ny olombelona;

⁹aleo mitoky amin’ny TOMPO toy izay mitoky amin’ny mpifehy.

¹⁰Nanodidina ahy avokoa ireo hafa firenena, fa ny anaran’ny TOMPO no nandringanako azy.

¹¹Nitangorona tamiko ireo, indray nanarona ahy, fa ny anaran’ny TOMPO no nandringanako azy.

¹²Nanodidina ahy toa renitantely ireo, kanjo nalaky maty toy ny afo-mololo, fa ny anaran’ny TOMPO no nandringanako azy.

¹³Natosik’ireo aho mba ho lavo, fa ny TOMPO no nanampy ahy.

¹⁴Ny TOMPO no heriko sy reharehako, satria Izy no mampandresy ahy[328].

¹⁵Feo fihobiana sy horakora-pandresena no ao an-dain’ny olona afaka: «Naneho hery ny tanan’ny TOMPO,

¹⁶nanandratra anay ny tanan’ny TOMPO, naneho hery ny tanan’ny TOMPO.»

¹⁷Tsy ho faty aho fa ho velona mba hitanisa ny asan’ny TOMPO.

¹⁸Nofaizin’ny TOMPO tokoa aho, kanefa tsy nafoiny ho faty[329].

¹⁹Vohay ny vavahady fidiran’ny olo-marina[330] mba hidirako hidera ny TOMPO.

²⁰Ity no vavahady mankao amin’ny TOMPO; ny olo-marina no aoka hiditra eo!

²¹Hidera Anao aho, Tompo ô, fa novalianao ary Ianao no nahazoako fandresena.

²²Ny vato nolavin’ny mpanao trano no efa tonga vatofehizoro[331].

²³Avy amin’ny TOMPO izany ka mahagaga eo imasontsika[332].

²⁴Ity no andro nataon’ny TOMPO mba hifaliantsika sy hiravoantsika.

²⁵Miangavy re, TOMPO ô, omeo fandresena izahay[333]; miangavy re, TOMPO ô, omeo fanambinana izahay.

²⁶Hotahîna amin’ny anaran’ny TOMPO anie ilay avy. Ianareo koa rarînay fitahiana avy ato an-tranon’ny TOMPO[334].

²⁷Ny TOMPO no Andriamanitra, ka hanazava antsika anie Izy! Milahara mitana sampan-drofia, ka manatòna ny zoron’ny alitara[335].

²⁸Andriamanitro Ianao ka hoderaiko, eny, Andriamanitro ka hasandratro.

²⁹Miderà ny TOMPO ianareo fa tsara Izy: — Eny, maharitra mandrakizay ny fitiavany!